Askha runakunan rimarqanku calendario maya nisqan hina 2012 watapi, diciembre killa 21 p’unchaypi kay pachaq tukukapunanmanta. ¿Ima ninkin kunan chaymanta? Yaqapaschá thak kashanki otaq phiñasqa otaq mana imapas qokusunkichu. ¿Ñawpa tiempokunapi hinachu rimaylla karqan?

Bibliapas willanmi ‘kay pachaq tukukuyninmanta’, ¿ima ninkin chaymanta? (Mateo 24:3, Diosmanta Qhelqasqa.) Wakin runakunan manchakunku kay pacha ruphaykusqa kananmanta. Hukkunataq kay pachapi sinchi manchakunapaq imapas kananmanta admirakunku. Wakintaq sayk’usqaña kashanku tukukuymanta rimaqta uyarispa. Ichaqa imaymana cuentokunata uyarisqankuwan tupachispan wakinqa chhaynata yuyaykunku.

Bibliaq willasqanta yachaspaqa admirakunkichá. Kay pachaq tukukuyninmanta willasqanqa kusikuywan suyakunapaqmi. Ichaqa willanmi yuyaykusqanchis p’unchaypi mana chayamuqtin pisikallpayananchistapas. Chaymi kunan yachasun runakunaq tawa tapukuyninmanta.

BIBLIA KUTICHIN: “Qanmi kay pachata allinta teqsicharqanki sayashasqanmanta ama hayk’aqpas kuyurinanpaq” (SALMO 104:5).

Kay pachataqa manan imapas chinkachinqachu nitaq ruphaykusqachu kanqa, aswanmi Biblia willan runakuna chaypi wiñaypaq tiyanankuta. Salmo 37:29 texton nin: “Chanin runakunaqa kay hallp’atan hap’ikapunqaku, chaypin wiñaypaq tiyanqaku”, nispa (Salmo 115:16; Isaías 45:18).

Diosmi Hallp’ata kamashaspa nirqan tukuypas “ancha allin kasqanta”, kunanpas chhaynatan qhawarin (Génesis 1:31). Payqa manan hayk’aqpas kay pachata chinkachinqachu, aswanmi ‘kay pacha waqllichiqkunata [qhellichaqkunata] wañuchinqa’. Arí, Diosqa manan hinallatachu qhawanqa kay pacha qhellichasqa kananta (Apocalipsis 11:18).

Ichaqa 2 Pedro 3:7 textopipaschá yuyaykushanki, chaypin nin: “Hanaq pachawan kay pachawanmi [...] Diospa kikin siminwan ninapaq waqaychasqa kashan”, nispa. ¿Kay pacha ruphaykusqa kananmantachu chaypi willashan? Manan, mayninpiqa hanaq pacha, kay pacha otaq nina nisqa simikunaqa rikch’anachiyllan. Salmo 96:11 textopin nin: “Kay pacha q’ochukuchun”, nispa. Chaypiqa manan kay Hallp’a ‘pachamantachu’ rimashan aswanpas runakunamantan.

2 Pedro 3:7 textoq hawanpi uranpi nisqanmi rikuchin hanaq pacha, kay pacha, nina nisqa simikuna rikch’anachiylla kasqanta. 5, 6 versiculokunan willan Noepa tiemponpi Hatun Para, hanaq pachata kay pachatawan chinkachisqanta, ichaqa manan tiyasqanchis Hallp’aqa chinkarqanchu. Arí, chay Hatun Paran ‘kay pachata’ otaq millay runakunata millp’upurqan, ‘hanaq pachata’ otaq kamachikuqkunatapas chinkachipurqan (Génesis 6:11). 2 Pedro 3:7 textopas willanmi millay runakuna kamachikuqkuna ima, ninawan ruphachisqa hina chinkachisqa kanankumanta.

BIBLIA KUTICHIN: “Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa” (1 JUAN 2:17).

‘Kay pachaq’ tukukapunanmanta rimaspaqa manan kay Hallp’amantachu rimashan, aswanmi Diosta mana kasukuq runakunamanta. Imaynan huk doctor runaq cuerponmanta  cancerniyoq tumorta horqon mana wañunanpaq, chhaynatan Diospas kay pachamanta millay runakunata wikch’unqa chanin runakuna kusisqa kawsanankupaq (Salmo 37:9). Chhaynapin ‘kay pachaq tukukuyninqa’ allin kanqa.

‘Kay tiempon p’uchukapunqa’ nisqanpin Biblia willashan ‘kay pachaq tukukuynin’ allinpaq kasqanta (Mateo 24:3). Manataq Hallp’apas nitaq runakunapas tukukunqachu chayqa mosoq tiempon kapunqa. Chay ‘qhepa tiempomantan’ Bibliaqa willan (Lucas 18:30).

Jesusmi willarqan chay tiempopi ‘tukuy imapas mosoqyachisqa kananta’, qallariypi runakunapaq Diospa munasqan hina (Mateo 19:28). Chay tiempo chayamuqtinqa kaykunan kanqa:

• Hallp’an paraisoman tukupunqa, tukuy imanchismi kapuwasun manataqmi imamantapas manchakusunchu (Isaías 35:1; Miqueas 4:4).

• Allin llank’anayoq kasun (Isaías 65:21-23).

• Onqosqakunan qhaliyachisqa kanqaku (Isaías 33:24).

• Yuyaq runakunan wayna-sipasman tukupunqaku (Job 33:25).

• Wañusqakunan kawsarimpunqaku (Juan 5:28, 29).

‘Diospa munayninta ruwasun’ chayqa, manan tukukapuy p’unchayta manchakusunchu, aswanmi kusisqa suyakusunchis.

BIBLIA KUTICHIN: “Kaykuna hunt’akusqanta rikuspaykichisqa Diospa qhapaqsuyun qayllaykamushasqanta yachankichis” (LUCAS 21:31).

Profesor Richard Kyle qelqarqan: “Imaymana sucedesqanta rikuspa, llaqtakunapi ch’aqwaykunata rikuspan runakunaqa astawan kay pachaq tukukuyninmanta rimashanku”, nispa (The Last Days Are Here Again). Chay sasachakuykuna qonqaylla rikhurimusqanraykun astawan chay rimaykuna kan.

Chaywanpas Bibliapi profeciakunata qelqaqkunaqa manan chaykuna imarayku kasqanta yachanapaqchu qelqarqanku. Aswanpas Diosmi paykunataqa yuyaycharqan tukukuy p’unchay imaynapi chayamunanta willanankupaq. Yachasun wakin profeciakunamanta, qan kikiykitaq qhawariy hunt’akushanchus icha manachus chayta.

• Guerrakuna, terremotokuna, yarqay, mana hampiy atiy onqoykuna ima (Mateo 24:7; Lucas 21:11).

•   Wañuchiy, suwakuy yapakusqan (Mateo 24:12).

• Kay Hallp’ata runakunaq qhellichasqan (Apocalipsis 11:18).

• Qolqetapas paykuna kikinkutapas munakuqkuna, aycha kusichiyllapi puriqkuna, Diosta mana munakuqkuna (2 Timoteo 3:2, 4).

• Familiakunaq t’aqanakapusqan (2 Timoteo 3:2, 3).

• Tukukuy p’unchaymanta señalkunata mana reparay munaqkuna (Mateo 24:37-39).

• Kay pachantinpi allin willakuykunaq willakusqan (Mateo 24:14).

Jesuspa nisqan hina, “tukuy chaykunata” rikuspan yachasunman kay pachaq tukukuynin asuykamusqanta (Mateo 24:33). Jehová Diospa testigonkunaqa manan iskayaykuchu chay señalkuna hunt’akusqanmanta, chaymi 236 nacionkunapi huk llaqtakunapipas predicashayku.

BIBLIA KUTICHIN: “Runakunan nishanqaku: Thak-kaypin kashanchis, allin waqaychasqan kashanchis, nispa. Chayllamanmi qonqaylla manchay wañuray paykunata hap’inqa, imaynan onqoq warmita wachakuy nanay qonqaylla hap’in hinata, manataqmi ayqeytaqa atinqakuñachu” (1 TESALONICENSES 5:3).

Kay pachaq tukukuynin tiempotan onqoq warmiwan rikch’anachikunman, tukukuy p’unchaytataq Biblia rikch’anachin warmiq onqokusqan p’unchaywan, chay p’unchayqa qonqayllan nanay hap’inqa. Onqoq warmiqa killakunaq hunt’akusqanman hinan reparanqa onqokunan p’unchay chayamusqanta. Manaña doctorpa nisqan p’unchaypichu onqokunqa chaypas, payqa yachanmi onqokunanta. Chhaynatan ‘tukukuy qaylla p’unchaypas’ chayamunqa, manaña suyasqanchis p’unchaypichu chayamunqa chaypas chayamunqapunin (2 Timoteo 3:1).

Yaqapaschá nishanki: “Chhaynaqa, ¿imaraykutaq mana wakin runakuna reparankuchu señalkuna hunt’akusqanta?” nispa. Biblian willarqanña tukukuy p’unchay qayllaykamushaqtin asipayakuqkuna rikhurimunanta. Kay tiempo hukniray kasqanta mana reparayta munaspan ninkuman: “Kurak taytakunaq wañukapusqanmantapachan lliw imaymanapas kaqllapuni kashan, imaynan kamay qallariymantaña karqan chay  hinallapunin kashan”, nispa (2 Pedro 3:3, 4). Tukukuy p’unchaypi kasqanchista yachashaspapas manan kasukunankuchu karqan (Mateo 24:38, 39).

Kay qelqapiqa manan tukukuy p’unchaypaq Bibliaq willasqan llapa pruebakunamantachu willashan. * ¿Munawaqchu astawan yachayta? Chhaynaqa Jehová Diospa testigonkunata niy gratislla Bibliamanta yachachinasuykipaq. Paykunan yachachisunkikuman wasiykipi, telefononta otaq may munasqaykipipas. Chaypaqqa tiempollaykitan t’aqanayki, chaypi yachasqaykitaqmi allinniykipaq kanqa.