¿Diospa llaqtanpichu ñawpaqpi karqanki? Kutimpuytapaschá munashanki ichaqa yaqapas mana chaskinasuykipaq yuyaykunki. Chhayna kaqtinqa, kallpachaykikun kaypi nisqanta leenaykipaq, chaykunaqa qanpaq hinapunin ruwasqan kashan.

HUK warmin nin: “Sapa kutinmi Diostan rogakushallarqani hukmanta chaskiwananpaq sonqonta k’irisqaytapas pampachawananpaq”, nispa. Chay warmiqa Diospa llaqtanpin uywasqa kasqa ichaqa tiempowanmi karunchakapusqa. Chay warmiq ñak’ariyninpi yuyaykuspa, ¿sonqoyki nananchu? ¿Imaynatataq Diosri chhayna llakikuq runakunata qhawarin? ¿Yuyarinchu paykunata? ¿Munanmanchu kutimpunankuta? Chhaynaqa anchatachá sonqochasunki Jeremías libropi qelqasqa simikuna (leey Jeremías 31:18-20).

Chaypaq qhawarisun imaraykus chay simikunata nikurqan chayta. Manaraq Jeremías naceshaqtinmi Jehová Diosqa hinallata qhawasqa Israelmanta 10 ayllukunata Asiria suyu apapunanta, chaymi karqan 740 watakunapi manaraq Jesús naceshaqtin. * Israelitakunaqa huchapin kawsasharqanku manataq profetankunawan Diospa anyachisqanta kasukurqankuchu, chaymi Diosqa wanachinanpaq decidikurqan (2 Reyes 17:5-18). ¿Iman sucederqan llaqtankumanta Diosninkumantapas karupi tarikuspanku? ¿Cambiarqankuchu yuyaykusqankuta? Diosri, ¿qonqapurqanchu paykunata? ¿Hukmanta chaskinmanchu paykunata?

“Yuyayniyta hap’ikurqani”

Israelitakunaqa wanachisqa kasqankuwanmi yuyayninkuta hap’ikurqanku hinaspa anchata pesapakurqanku. Jehová Diosqa rikurqanmi chay ruwasqankuqa sonqomanta kasqanta. Chaymanta leespa reparanchis Jehová Dios allinpaq qhawarirqan chay ruwasqankuta.

“Uyarinin Efraín llaqtaq waqasqanta: ¡Ikiraqmi! ¡Imaraqmi! nispa.” (Versículo 18.) Diosqa uyarirqanmi israelitakuna huchankumanta pesapakusqankuta. Hebreo rimaypi huk diccionarion “¡Ikiraqmi! ¡Imaraqmi!” simimanta nin: “Umata maymiymi”, nispa. Imaynan huk mana kasukuq wawa huchanmanta pesapakuspa umanta maymispa wasinman kutipuyta munanman hinata (Lucas 15:11-17). ¿Imaynatan israelitakuna pesapakusqankuta rikuchinku?

‘Wanachiwarqankin [...] mana llank’ay yachaq torillota hina.’ (Versículo 18.) Israelitakunaqa reparakurqanku wanachisqa kananku kasqanta. Yaqapaschá imayna runa kasqanku yuyarichirqan mana mansayachisqa torilloman. Torokuna samp’ayachiymantan huk libro nin: “Toro chhukuna otaq toro t’oqsina k’aspitan necesitanku”, nispa.

“Wakmanta sayarichiway, hinan qanman kutimpusaq, qanpunin Diosniy Señor Diosqa kanki.” (Versículo 18.) Sinchitan huchankumanta pesapakurqanku chaymi Diosta rogakurqanku. Diosmanta karunchakuspan pay contra huchallikurqanku. Ichaqa pampachasqa kayta munaspan yanapayninta mañakurqanku. Huk Biblian chay rogakuymanta t’ikrarqan: “Wakmanta chaskiykuway,  kutimpuytan munani; qanllapunin YHWH, [Diosniyqa] kanki”, nispa (Versión Israelita Nazarena, español simipi).

“Qhepatañan yuyayniyta hap’ikurqani [...], p’enqakuymantan yanaraq oqeraq tukurqani.” (Versículo 19.) Israel runakunaqa huchankuta reqsikuspan mayta pesapakurqanku. Sinchi llakiq ñit’isqanmi tarikurqankupas (Lucas 15:18, 19, 21).

Pesapakusqankuqa sut’i reparaymi karqan. Sinchi p’enqasqan kasharqanku, chaymi Diosman huchankuta willakuspa mana allin ruwasqankuta saqepurqanku. Chhayna sientekusqankuta qhawarispa, ¿pampachanmanchu? ¿Kutichimpunmanchu llaqtankuman?

“Cheqaqtapunin paytaqa khuyapayasaq”

Jehová Diosqa anchatan Israel llaqtantaqa munakurqan. Jeremías 31:9 texton Jehová Diospa nisqanmanta willan: ‘Israelpa taytanmi kani, Efrainpas phiwi churiymi’, nispa. Chhaynaqa, ¿imaynataq huk taytari mana chaskinmanchu munasqan churinta huchanmanta pesapakuqtin? Qatimuqpi Jehová Diospa siminkunan chayta reparachiwasun.

“Efraín llaqtaqa munasqay wawaypunin, Efraín llaqtaqa luylusqay churiypunin. Anyaspayñapas manapunin paytaqa qonqanichu.” (Versículo 20.) ¡Ancha munaymi chay simikunaqa! Chaywanmi reparanchis Diosqa ancha munakuq tayta kasqanta. Chaywanpas Jehová Diosqa ‘churinkunatan anyarqan’, chaywanmi nisharqan chay ruwasqanku mana allinpi tukunanta. Sapa kutin anyasqanta mana uyarikuqtinkutaq muchuchirqan, chaymi mana hark’arqanchu huk nación apapunanta. Chaywanpas manan paykunataqa qonqarqanchu, imaynan huk munakuq taytapas churinkunata mana qonqanchu hinata. ¿Imaynan sientekurqan llaqtan pesapakusqanmanta?

“Sonqoyraqmi ch’allaq niwan, cheqaqtapunin paytaqa khuyapayasaq.” (Versículo 20.) Diosqa maytan munasharqan wawankuna kutimpunankuta. Sinchi pesapakusqankun sonqonman chayarqan hinan anchata munarqan kutimunankuta. Imaynan chinkasqa churimanta Jesuspa willasqan rikch’anachiypi huk tayta churinta khuyapayarqan, chay hinatan Diospas llaqtanta ‘khuyapayaykurqan’ (Lucas 15:20). Maytan churinkunata yapamanta chaskiykuyta munasharqan.

“Jehová Diosqa wakmantan chaskiykuwarqan”

Jeremías 31:18-20 textopin allinta rikuchiwanchis Diospa khuyapayakuyninta. Payqa manan serviqninkunataqa qonqanchu. Kutimpuyta munaqkunapaqqa makillan kashan ‘pampachananpaq’ (Salmo 86:5). Huchankumanta kutirikamuqkunataqa manan hayk’aqpas saqerparinchu (Salmo 51:17). Aswanpas sonqomanta chaskiykun (Lucas 15:22-24).

¿Yuyashankichu Diospa llaqtanman kutimpuy munaq warmita? Diosman kutimpuyta munaspan llaqtanpi kaq Testigonkunata maskharqan. Ichaqa khaynata sientekurqan: “Diospa mana pampachananmi kani”, nispa. Chaywanpas umalli cristianokunan anchata kallpacharqanku. Paymi nin: “Jehová Diosqa wakmantan chaskiykuwarqan chaymi anchata agradecekuni”, nispa.

Sichus Diospa llaqtanmanta t’aqakurqanki hinaspa kutimpuyta munashanki chayqa, Jehová Diospa testigonkunaq iñiq t’aqanman rispa yanapayta mañakuy. Ama qonqaychu, Jehová Diosqa khuyapayanmi huchanmanta kutirikuspa khaynata niqta: “Wakmanta chaskiykuway, kutimpuytan munani”, nispa.

[Uranpi willakuy]