Atipasunmanmi llakichiwaqninchis yuyaykuykunata

YAQA llapa runakunan mayninpi llakichikuq yuyaykuykunawan atipachikunchis. Llapa runakunan imaymana sasachakuykunapi tarikushanchis qolqe pisiyasqanwan, millay kawsay, mana chanin ruwaykuna ima yapakusqanwanpas. Chayraykun askha runakuna llakiq ñit’isqan, huchachakuspa otaq pisipaq qhawarikuspa kawsanku. ¿Chhaynachu qanpas tarikushanki?

Chhayna kaqtinqa reparakushankichá chay yuyaykuykuna mana allinpaq kasqanta. Sichus chay yuyaykuykuna sonqonchispi saphichakunqa chayqa yuyayninchistan tutayachinqa, manañan ima ruwasqanchistapas allinpaqchu qhawarisun, llakisqataqmi purisun. Biblian nin: “Llaki-phutiy p’unchaypichus pisi kallpayanki chayqa, pisi kallpapunin kashanki”, nispa (Proverbios 24:10). Chaymi kallpata hap’inanchis kay pachapi sasachakuykunata atipanapaq. Umanchisman mana allin yuyaykuykuna hamuqtinqa kaqpachan yachana dominayta. *

Ichaqa manan sapanchischu tarikunchis, Jehová Diosmi Simin Qelqata qowanchis yanapawananchispaq. Payqa ancha munakuq Diosmi manataqmi munanchu llakisqa kananchista nitaq pisi kallpayananchistapas (Salmo 36:9). Chaymi kunan llakichiq yuyaykunata atipanapaq Bibliapi kinsa yanapaykunamanta yachasun.

Diosqa interesakunmi sapankanchispi

“Diosqa imaymana ruwanayoqchá kakun, manan ñoqanchistaqa reparawasunmanchu”, nispan wakin runakuna ninku. Ichaqa Biblian kayta nin: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin”, nispa (Salmo 34:18). ¿Manachu kusikunchis llakipi tarikuqtinchis tukuy atiyniyoq Dios qayllallanchispi kasqanta yachaspa?

Bibliaq nisqan hina, “Diosqa munakuymi”, payqa qhawawashanchismi yachanmi imapi ñak’arisqanchistapas (1 Juan 4:8). Arí, payqa munakuwanchis interesakunmi ñoqanchispi chaymi mana munanchu ñak’arinanchistapas. Kinsa waranqa phisqa pachaq wata ñawpaqtan Israel llaqta kamachi kaspa ñak’arishaqtinku Jehová Dios nirqan: “Allintan rikuni llaqtaypa Egipto suyupi muchushasqanta, uyarinin muchuchiqkuna hawa waqyakamusqankuta, yachanitaqmi ñak’arishasqankutapas. Egipto runakunamanta kacharichiqmi uraykamuni”, nispa (Éxodo 3:7, 8).

Hinaspapas Jehová Diosqa allintan yachan imayna sientekusqanchista, Biblian nin: “Paymi ruwawarqanchis, paypataqmi kanchispas”, nispa (Salmo 100:3). Sichus mayninpi mana pipas entiendenqachu imayna sientekusqanchista chayqa yuyarinanchismi Jehová Dios entiendewasqanchista. ¿Imaraykun chayta ninchis? Diosmi nin: “Manan ñoqaqa runa hinachu patallanta qhawani, runallan rikch’aynintaqa qhawan, ñoqan ichaqa sonqonta qhawani”, nispa (1 Samuel 16:7). Arí, paypaqqa kichasqa libro hinan sonqonchis kashan, chaymi lliwta yachan.

Diosqa rikumushanmi pantasqanchistapas. ¡Ichaqa ama mancharikuychu! Davidmi Diospa yuyaychasqan nirqan: “Imaynan taytaqa wawankunata khuyayta munakun, ahinatan Señor Diosqa manchakuqninkunata khuyayta munakun. Payqa reqsiwanchismi imayna  kasqanchista, yuyarikuwanchismi ñut’u hallp’a kasqanchista”, nispa (Salmo 103:13, 14). Arí, Diosqa khuyay munakuqmi entiendewanchistaqmi kanpas. Mayninqa ñoqanchismi juezpas kasunman hina kikinchista sinchita huchachakunchis. Jehová Diosqa manan sonqonchispi yuyaykusqanchista hinachu yuyaykun, payqa allinkuna ruwasqanchistan astawanqa qhawarin, pampachawanchismi huchallikusqanchismanta kutirikuqtinchispas (Salmo 139:1-3, 23, 24).

Sichus qan pisipaq qhawarikushanki otaq imamantapas huchachakuspa kawsashanki chayqa, munakuywan Diospa qhawariwasqanchispi yuyaymanaymi yanapasunki chay yuyaykuykunata atipanaykipaq (1 Juan 3:20).

Kallpachakuy Diospa amigon kanaykipaq

Jehová Dios ñoqanchispi interesakusqanta yachasqanchismi tanqariwasun kaytañataq ruwananchispaq: Diospa amigon kananchispaq. Ichaqa, ¿atisunmanchu Diospa amigon kayta?

Arí, atisunmanmi. Kikin munakuq Diosninchismi munan amigon kananchista. Biblian nin: “Diosman asuykuychis, hinan payqa asuykamusunkichis”, nispa (Santiago 4:8). ¿Manachu chayta yachaspa sonqonchis kusikun? Arí, pantaq runakunaña kanchis chaypas llapallanchismi Tukuy atiyniyoq Diospa amigon kasunman.

Diospa amigon kanapaqqa Biblian yanapawasun, chaypin yachasun imayna Dios kasqanta. Sapa p’unchay leespan yachasunman sumaq Dios kasqanta. * Yachasqanchispi yuyaymanaytaqmi astawan payman asuykachiwanchis. Chaykunata ruwaspan yachanchis khuyapayakuq munakuq Tayta kasqanta.

Jehová Diospa imayna yuyaykusqanta yachayqa yanapawallasuntaqmi imayna yuyaykusqanchista cambianapaq, allin ñantan pusawasun, sonqochawasuntaqmi kanpas. Chaymi sasachakuykuna otaq ima llakikuykunapas kaqtinqa tiempota hap’inanchis yuyaymanananchispaq. Salmistan nirqan: “Sonqoyta llakikuna ñit’iykushaqtinmi, qanqa sonqochaykuwanki kusirichiwanki”, nispa (Salmo 94:19). Diospa Siminqa sonqonchistan thak niyachin. Yachachisqanman hina imatapas ruwaqtinchisqa llakikuyninchiskunan pisiyapun, runakuna mana aypay atisqan thak kaytataqmi Dios qowanchis. Jehová Diosqa munakuq tayta hinan qayllallanchispi kashan yanapawananchispaq sonqochawananchispaqpas.

Diospa amigon kanapaqqa parlashanallanchismi paywan. Biblian nin: ‘Munayninman hina imatapas Diosmanta mañakuqtinchisqa payqa uyariwanchismi’, nispa (1 Juan 5:14). Arí, imaña llakichiwasunman chaypas Jehová Diospa yanapaynintan mañakushanalla. Payman tukuyta willakusun chayqa sonqonchismi thak ninqa. Apóstol Pablon nirqan: “Tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta  qoychis. Hinan Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas Jesucristopi Diosqa waqaychanqa”, nispa (Filipenses 4:6, 7).

Kayta yuyariy: sichus sapa p’unchay Bibliata leenki, yachasqaykipi yuyaymananki, Diosmantapas mañakushallanki chayqa, hanaq pacha Taytanchispa amigonmi kapunki. Paywan amigontin kasqaykitaqmi escudo hina mana allin yuyaykuykunamanta hark’aykusunki. Kunanqa kinsa kaq yanapaymantañataq yachasun.

Yuyaykushallay suyakuyninchispi

Imayna hatunña sasachakuyninchiskuna kanman chaypas sonqonchispiqa kusisqan kananchis. ¿Imarayku? Qhepa tiempoman allin kawsay chayamunanta Dios prometewasqanchisrayku. Chaymantan apóstol Pedro nirqan: “Diospa prometewasqanchis mosoq hanaq pachata mosoq hallp’a pachatawan suyashanchis, chaykunapiqa tukuy imapas chaninkaman kanqa”, nispa (2 Pedro 3:13). Ichaqa, ¿imatan chaywan nisharqan?

‘Mosoq hanaq pacha’ nispaqa Diospa Gobiernonmantan rimasharqan. ‘Mosoq hallp’a pacha’ nispataq Diosta kasukuq runakunamanta rimasharqan, paykunan qhepaman kay Hallp’api tiyanqaku. ‘Mosoq hanaq pacha’ ‘mosoq hallp’a pachata’ kamachimuqtinmi manaña kapunqachu llakichiwaqninchis yuyaykuykuna. Biblian chay tiempopi kawsaq runakunamanta nin: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu”, nispa (Apocalipsis 21:4).

¿Manachu chayta yachasqanchis sonqonchista llanllarichin? Chaymi Biblia Diosta kasukuq runakunapaq sumaq kawsay kananmanta rimaspa nin: “Kusisamiyoq suyakuyninchis”, nispa (Tito 2:13). Sichus chay promesakunapi yuyaykusun chayqa sonqonchismantan wikch’usun ima llakikuytapas (Filipenses 4:8).

 Chay suyakuytan Biblia tupanachin soldadoq casconwan (1 Tesalonicenses 5:8). Ñawpa tiempokunapi guerra kaqtinqa manan mayqen soldadopas mana cascoyoqqa rinanchu karqan. ¿Imarayku? Soldadoqa yacharqanmi cascoyoq kaqtinqa mana imapas umanman chayananta. Imaynan huk casco umata pakaykun chhaynatan suyakuyninchispas yuyayninchista pakaykun. Diospa prometewasqanchispi yuyaykuqtinchisqa manan manchasqachu purisun nitaqmi llakichikuq yuyaykuykuna kanqachu.

Kunan yachasqanchis hina, sichus ñawpaqllaman purisun, manataq pisikallpayasunchu chayqa atipasunmi llakichikuq yuyaykuykunata. Ama qonqaychu Dios qanpi interesakusqanta, kallpachakuy paypa amigon kanaykipaq, suyakushallaytaq Diospa prometesqanta. Ñan mosoq p’unchay illarimunqaña, chaypiqa manañan kanqachu llakikuykunapas mana allin yuyaykuykunapas. Chayrayku, ¡kallpachakushallay llakichiq yuyaykuykunata atipanaykipaq! (Salmo 37:29.)

[Uranpi willakuykuna]

[19 paginapi willakuy]

‘Yachanin ñak’arishasqankuta.’ ÉXODO 3:7, 8

[20 paginapi willakuy]

“Sonqoyta llakikuna ñit’iykushaqtinmi, qanqa sonqochaykuwanki kusirichiwanki.” SALMO 94:19

[21 paginapi willakuy]

“Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas Jesucristopi Diosqa waqaychanqa.” FILIPENSES 4:7

[20, 21 paginakunapi foto recuadropiwan]

Jehová, sonqochakuq Dios: yuyaymananapaq textokuna

“Khuyapayakuq sumaq sonqo Diosmi kani! Manan usqhaylla phiñakuqchu kani, tukuy tiempo munakuqmi cheqaqtaqmi kani.” (ÉXODO 34:6)

“Señor Diosqa kay pachantintan qhawashan tukuy sonqo payta serviqkunarayku atiyninta rikuchinanpaq.” (2 CRÓNICAS 16:9)

“Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin.” (SALMO 34:18)

“Señor Diosníy, qanqa sumaqmi, hucha pampachaykuqmi kanki.” (SALMO 86:5)

“Allinmi Señor Diosqa llapapaq, khuyapayaspan llapa ruwasqanta qhawashan.” (SALMO145:9)

“Ñoqaqa Diosniyki Señor Diosmi kani, paña makiykimantan hap’ishayki, ñoqan niyki: ‘Ama manchakuychu, ñoqan yanapasqayki’, nispa.” (ISAÍAS 41:13)

“Yupaychasqa kachun Señorninchis Jesucristoq Yayan Diosqa, payqa khuyapayakuq Yayan, tukuy imapi sonqochakuq Diostaq.” (2 CORINTIOS 1:3)

“Diospa ñawpaqenpiqa mana manchakusunchischu, sonqonchisña imamanta huchachawaqtinchispas. Diosqa aswanraqmi sonqonchismantaqa, payqa tukuy imaymanatan yachan.” (1 JUAN 3:19, 20).

[22 paginapi fotokuna recuadropiwan]

Atiparqankun mana allin yuyaykuykunata

“Taytaymi nishuta tragota ukyan, chaymi sinchita ñak’arichiwarqan. Yuyayta hap’isqaymantapachan mana ima valorniyoqpaq hina qhawarikurqani. Ichaqa huk p’unchaymi Jehová Diospa testigonkunawan Biblia estudiayta qallarirqani, chaypin yacharqani Dios kay Hallp’api wiñay kawsayta prometewasqanchista. Chay promesamanta yachaspan kawsayta may sumaqpaq qhawarirqani. Chaymantapachan sapa p’unchay Bibliata leeni. Bibliataqa hap’inipunin, llakisqa sientekuspaytaq leeni wakin kallpachawaq textokunata. Diosqa may sumaq kasqanpi yuyaykuymi yuyarichiwan payqa munakuwasqanta anchata valorawasqantapas.” (33 watayoq Katia) *

“Ñoqaqa sinchitan machaq kani, hinallataq drogakuq kani pegamentowan, marihuanawan, cocainawan, crack nisqawan ima. Mana imayoq kapuspaytaq callekunapi limosnata mañakuspa purirqani. Ichaqa chayllamanmi Jehová Diospa testigonkuna Bibliamanta huk cursota munachiwarqanku, chaymi estudiayta qallarirqayku. Yachasqayman hinan Diosqa ñoqapaq cheqaq karqan, kawsayniytapas cambiapurqanin. Atipanayraqmi ñawpaqpi ruwasqaymanta sonqoypa huchachawasqanta, mana valorniyoqpaq qhawarikusqaytapas, ichaqa anchatan kallpachawan Jehová Dios munakuq khuyapayakuq kasqan. Payqa yanapawashallanqan mana allin yuyaykuykuna atipanaypaq. Ñoqapaqqa Bibliamanta yachasqaymi imamantapas aswan chaniyoqqa.” (37 watayoq Renato)

“Huch’uy kasqaymantapachan kurak turaywan tupanachikuq kani. Chayta ruwasqayraykun mana valeqpaq qhawarikuq kani. Kunankamapas nishutan iskayani, imata ruwanay kaqtinpas mana atinaypaqmi yuyaykuni. Ichaqa manan pisipasaqchu. Jehová Diosmantan kallpata mañakunipuni kallpachawananpaq, payqa manan hayk’aqpas saqerpariwarqanchu. ¡Ancha kusisqan sientekuni Dios munakuwasqanta ñoqapi interesakusqanta yachaspay!” (45 watayoq Roberta)

[Uranpi willakuy]