Jesucristoq yachachisqanqa qanpaqpunin

“Ñoqan ichaqa hamuni kawsanankupaq, t’ikarishaq kawsayniyoq kanankupaqwan.” (JUAN 10:10.)

JESUCRISTOQA allin regalotan qowarqanchis kay pachapi kashaspa. Chay regaloqa Diosmanta munayninmantawan cheqaq kaqta yachachiwasqanchismi. Chayraykun kay tiempopi millonninpi cheqaq cristianokunaqa sumaqta kawsashanku. * Jesusqa qowallarqanchistaqmi huk ancha allin regalotawan, chayqa karqan ñoqanchisrayku wañusqanmi. Chayman hina kawsasunchis chayqa, wiñaypaqmi kawsasunchis.

¿Ima regalotan Dioswan Jesuswan qowarqanchis? Jesusqa yacharqanmi sinchita ñak’arispa wañunanta (Mateo 20:17-19). Chaywanpas hamurqanmi kay pachaman. Chaymanta rimashaspan nirqan: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Chaymantapas nillarqantaqmi: ‘Ñoqaqa manan servichikunaypaqchu hamurqani, aswanpas servinaypaqmi, hinaspa askha runa kacharichisqa kananrayku wañunaypaq’, nispa (Mateo 20:28).

Chhaynaqa Diosqa ancha munakuq kaspan sapan Churin Jesusta kay pachaman kachamurqan runakunarayku wañunanpaq, chhaynapi huchamanta wañuymantawan runakunata kacharichinanpaq. Jesusqa munarqanmi hamuyta, runakunarayku wañuytapas. Chhaynapin Diosqa huk ancha hatun regalota qowarqanchis, chaywanmi wiñay kawsayman aypasunman.

¿Imatan ruwanayki chay regalowan? * Pipas huk regalota haywasunkiman chayri, ¿imatan ruwawaq? Makiykita haywaspachá chaskikuwaq chay regalota. Chayta ruwaqtillaykin chay regaloqa qanpa kapunman, allinniykipaqtaq kanmanpas. Chhaynallatataqmi Diospa regalontapas chaskikunanchis, mana chayqa manan allinninchispaqchu kanman. ¿Imatan chaypaq ruwana?

Jesuspin iñinanchis. Paymi willarqan paypi iñiqkunalla wiñay kawsay chaskinankuta. Paypi iñisqanchista rikuchinapaqtaq yachachisqanman hina, imayna ruwasqanman hina kawsana (Santiago 2:26). Chaypaqmi allinta reqsina Jesustapas Taytantapas. Jesusmi nirqan: “Chay wiñay kawsayqa kaymi: Qan sapallayki cheqaq Diosta, kachamuwasqayki ñoqa Jesucristotawan reqsiyninku”, nispa (Juan 17:3, Edición 1988).

Iskay waranqa wata hinañan Jesusqa kay pachapi yachachirqan. Chaywanmi waranqaq waranqanpi runakuna kawsayninkuta cambiarqanku. ¿Imatawanmi Jesús yachachirqan? ¿Imaynatan paymanta yachay qantapas familiaykitapas yanapanman? Chaykunamanta yachayta munanki chayqa, Jehová Diospa testigonkunata niwaq yachachinasuykipaq, paykunaqa liston kashanku qanwan rimanankupaq.

Qatiqnin paginakunapiqa astawanmi willakushan Señor Jesucristomanta, paypa yachachisqankunaqa ancha allinniykipaqmi kanman.

[Uranpi willakuykuna]