ISRAEL llaqta Babiloniamanta 537 watapi (m.J.h.) Jerusalenman kutipushaqtinkun, Jehová Diosqa wakin Israel runakunata nirqan: “Ñanta llaqtaypaq wakichiychis, hatun ñanta allichaychis, rumikunata pallaychis”, nispa (Is. 62:10). Yaqapaschá chayta kasukuspa wakin runakunaqa ñawparirqanku, hinaspa ñanpi t’oqokunata hallp’awan hunt’achirqanku otaq ima mana allin kaqkunatapas allicharqanku. Chhaynapi llaqta mana sasachakuspalla purinanpaq.

Imaynan Israel runakunapas purinanku ñanta allichananku karqan, chay hinatan Jehová Diosqa munan iñiyninchispi ñawparinanchispaq ñanninchista allinta allichananchista. Chaymi niwanchis: “Purinaykita allinta tanteay [allichay, NM], allillantapuni sarunaykipaq”, nispa (Prov. 4:26). Waynaña kurakña kanchis chaypas, chay yuyaychaykunaqa llapanchistan yanapawasun.

Wayna-sipaskunaqa ratullan imatapas yachanku, kallpankupitaqmi kashanku ima ruwanankupaqpas. Chaymi runakunaqa ninku: “Waynapaqqa manan imapas sasachu”, nispa. Bibliapas nillantaqmi: “Waynakunaq sumaq-kayninqa kallpankun”, nispa (Prov. 20:29). Sichus wayna-sipaskuna decidikunqaku tukuy kallpankuwan Jehová Diospa munayninta ruwanankupaq chayqa, astawanmi Diospa llank’ayninpi yanapakunqaku kusisqataq kawsanqakupas.

Colegiopi allin notakunayoq Jehová Diospa testigonkunatan profesorkuna, estudiaqmasinkuna ninku universidadpi estudianankupaq. Chhaynapi allin reqsisqa kanankupaq qhapaq kayta tarinankupaqpas. Bola hayt’aypi allin pukllaq kaqtintaq, pukllaspa askha qolqeta ganananpaq kallpachanku. ¿Hayk’aqllapas chhaynapi  tarikurqankichu? ¿Pillatapas chhaynapi tarikuqta reqsinkichu? ¿Iman yanapasunkiman allinta decidinaykipaq?

Biblian yanapasunki allin ñanpi purinaykipaq. Chaypin nin: “Wayna-sipasllaraq kashaspa Kamaqniykimanta yuyarikuy”, nispa (Ecl. 12:1). ¿Imaynatan kamaqniykimanta yuyarikuwaq? ¿Imaynatan llapanchispas kamaqninchismanta yuyarikusunman?

Chaymi sucederqan África lodomanta Eric * waynawan. Paymi allinta bola hayt’ayta yacharqan, chaymi 15 watallanpiraq kashaqtin nacionninpa equiponpi kananpaq qhawasharqanku. Chaymantaqa Europa ladopi allin yachachisqan kanman karqan. Chayta ruwaspaqa askha qolqetan gananman karqan. Ichaqa, ¿yuyarikushanmanchu karqan kamaqninmanta? ¿Imatan Eric decidirqan?

Eric waynaqa colegiopi kashallasparaqmi Jehová Diospa testigonkunawan Biblia estudiayta qallarirqan. Chaypin yacharqan Dioslla runakunaq sasachakuyninta allichanan kasqanta. Allintan entienderqan Diospa munayninta ruway aswan importante kasqanta. Chaymi decidikurqan tiempontapas kallpantapas chay ruwayman qonanpaq manataq bola h’aytaymanchu, hinan bautizakurqan. Hinamantaq Diospa llaqtanpi ñawparinanpaq kallpachakurqan. Tiempowantaq yanapakuq qhari kapurqan. Hinamanmi invitarqanku soltero qharikunapaq escuelaman.

Sichus Eric decidikunman karqan bola hayt’aypi kananpaq chayqa, yaqapaschá allin reqsisqa, askha qolqeyoq kanman karqan. Ichaqa allintan entienderqan Bibliapi kay textoq nisqanta: “Qhapaq runaqa hatunkaray perqapas kanman hinatan qhapaq kayninkunata qhawan”, nispa (Prov. 18:11). Chay textoq nisqan hina, runakunaqa qhapaq kaytan qhawarinku ima mana allinmantapas pakaykuqninkuta hina, ichaqa qhapaq kayqa tukukuqllan. Chaymi qhapaq kayta maskhaq runaqa ‘imaymana llakikunapi rikukun’ (1 Tim. 6:9, 10).

Ichaqa askha wayna-sipaskunan decidikurqanku tukuy tiemponkuwan Dios serviyta, chhaynapin kusisqa kawsanku. Ericpas precursormi kapurqan. Paymi nin: “Precursor kayqa ima equipomantapas aswan allinmi. Jehová Diostan gracias nini allin ñanpi kashanallaypaq yanapawasqanmanta, chaypin cheqaq kusikuyta tarini”, nispa.

Qanpas wayna-sipas, precursor kayta akllakuy, chay ruwaymi aswan allin kay pachapi imakunatapas ruwaymantaqa (qhaway “ Universidadpi mana tarisqaytan tarirqani” nisqa recuadrota).

Huk casarasqa iñiqmasikunan Estados Unidos nacionpi Betel wasiman visitaq rirqanku. Chaypitaqmi rikurqanku llapa betelitakuna kusisqa llank’asqankuta. Chaykunata rikuspan paykunaqa decidikurqanku astawan Diosta servinankupaq. Ñawpaqpi imayna kasqankumantan hermana nirqan: “Ñoqaykuqa llakhin kasharqayku ima ruwasqaykuwanpas”, nispa.

Tukuy tiemponkuwan Diosta serviyta qallarinankupaqqa sasachakurqankun. Ichaqa huk p’unchaymi Diospa Siminta sapa p’unchay t’aqwisun nisqa folletopi leerqanku Juan 8:31 textota. Chay textopin Jesús nirqan: “Qankunachus rimasqayta hunt’ankichis chayqa, cheqaqtapunin yachachisqaykuna kankichis”, nispa. Chay textopi yuyaymanasqankun yanaparqan ama manchakuspa tukuy tiemponkuwan Diosta servinankupaq. Chaymi wasinkuta venderqanku kaqninkutapas pisiyachirqanku. Hinamantaq huk iñiq t’aqaman yanapakuq astakurqanku. Kunanqa precursormi kanku, huñunakuna wasikunata hatarichiypi yanapakunku, hatun huñunakuykuna kaqtinpas yanapakunku. Paykunan ninku: “Manaña ñawpaqpi hinachu imaymanakunayoq kayku chaypas, Jehová Diospa munasqanta ruwaspan kusisqa kashayku”, nispa.

Salomonmi nirqan: “Ñawpaqllatapuni qhaway, ñawiykikunaqa ñawpaqllatapuni qhawachun”, nispa (Prov. 4:25). Arí, ñoqanchispas ñawpaqllamanpunin qhawananchis imaynan carro manejaq qhawan hinata. Chay hinapin Diospa llaqtanpi llank’aykunaman aypasun.

 Chay llank’aykunan kanman kaykuna: Tukuy tiempowan Diosta serviy, yanapanata necesitaq iñiq t’aqaman astakuy. Hinaspapas yaqapaschá huk iñiq t’aqapi umallikunapas yanapakuq qharikunapas pisilla kanku, chaykunamanpas riwaqmi yanapakuq. Chaypaqmi watukuq umallita tapukuwaq, paymi nisunki ima iñiq t’aqakunapi yanapakunaykipaq. *

Isaías 62:10 textopi leesqanchista yuyarisun. Wakin judío runakunaqa allintachá llank’arqanku ñanta allichaspa. Chay hinapin llapa Israel runakuna llaqtankuman allillan chayapurqanku. Chay hinata qanpas kallpachakushanki Diospa llaqtanpi astawan llank’anaykipaq chayqa ama pisipaychu, Diospa yanapayninwanqa aypallankin. Aswanpas kallpachakuy ama imawanpas hark’achikunaykipaq, Diospa yuyaychaynintataq mañakuy. Chhaynapin rikunki Diospa yanapayninta (Prov. 4:26).