Leeqkunaq tapukusqan

“May llakikuymi Señor Diospaqqa payman sonqollikuqkunaq wañupusqanqa.” ¿Ima ninanmi chay simikuna?

▪ Jehová Diosqa ancha sumaqpaqmi qhawarin llapa hunt’aq serviqninkunaq kawsayninta. Ichaqa, Diospa yuyaychasqan Salmo 116:15 textopi qelqakusqanqa, manan huk runaq wañupusqallanmantachu rimashan.

Wañupuqkunapaq discursota qospaqa manan chay textota leenachu, wañupuqña Diospaq hunt’aq karqan chaypas. ¿Imarayku? Salmistaqa kaymantan rimasharqan: llapa hunt’aq siervonkunata wañuchiqtinkuqa anchatan Diosqa llakikunman, chaymi mana hinallatachu qhawanqa chinkachisqa kanankuta (qhaway Salmo 72:14; 116:8).

Salmo 116:15 texton sut’ita rikuchin Diosqa llaqtan chinkachisqa kananta mana dejananta. Kay tiempopi Jehová Diospa testigonkuna sasachakuypi tarikusqankun chayta rikuchin. Qatiykachaykunata atipasqankun rikuchin chinkachisqa kanankumanta Dios hark’asqanta.

Diosqa tukuy atiyniyoqmi, hunt’anqapunin munayninta. Chayraykun manapuni hayk’aqpas hinallatachu qhawanqa llaqtan chinkachisqa kananta. Chhayna kaqtinqa, enemigonkunachá aswan atiyniyoq kankuman, ichaqa Diostaqa manan pipas atipanmanchu. Chaymantapas, llaqtan chinkachisqa kaqtinqa manachá kay pachapi hunt’aq runakuna tiyananpaq Diospa yuyaykusqan hunt’akunmachu (Isa. 45:18; 55:10, 11). Espiritual templo hawa patiopin (kay pachapi Dios serviqkuna) manaña Jehová Dios yupaychaqkuna kanmanchu. Hinaspapas, manan ‘mosoq hallp’a pachapi’ tiyaqkuna kanmanchu ‘mosoq hanaq pachaq’ kamachisqan (Apo. 21:1). Hallp’api mana tiyaqkuna kaqtinqa, manan Cristoq Waranqa Wata Kamachikuynin kanmanchu (Apo. 20:4, 5). ¡Diosqa manapunin chaykuna sucedenanta dejanqachu!

Chaymantapas, sichus Dios hinallata qhawanman kay pachapi llaqtanta enemigonkuna chinkachinanta chayqa, Ancha Hatun Kamachikuq kasqanpas imayna Dios kasqanpas iskayachisqan kanman. Payrayku, ch’uya sutinrayku iman manapuni chaytaqa dejanmanchu. Kaypi yuyaykusun: Diosqa ‘chaninmi’, chayraykun llapa hunt’aq serviqninkunata pakaykunqa (Deu. 32:4; Gén. 18:25). Biblian nin: ‘Manan saqerparinqachu qhapaq sutin ama sarunchasqa kananpaq’, nispa (1 Sam. 12:22). Arí, “Señor Diosqa manan llaqtan runakunataqa wikch’urparinqachu, manan paypa kaqkunataqa saqerparinqachu” (Sal. 94:14).

Ancha kusikunapaqmi Diospa llaqtan kay pachamanta mana chinkananta yachayqa. Chhaynaqa Diospaq hunt’aq kasun, confiasuntaq kay promesanpi: “Manan ima ruwasqa armapas imanasunkipaschu, llapa huchachaqniykitapas upallachinkin. Chaytan kamachiykikunapaq ruwani, chay hinatan atipachishani” (Isa. 54:17).

[22 paginapi willakuy]

Diosqa manan hinallatachu qhawanqa llaqtan chinkachisqa kananta