Yayaq, Churiq, santo espirituq sutinpi bautizasqakuna

“Chayrayku, rispa [...] yachachimuychis, yachachisqaykuna kanankupaq, hinaspa Yayaq, Churiq, Santo Espirituq sutinpi paykunata bautizamuychis.” (MAT. 28:19.)

1, 2. a) ¿Iman Jerusalenpi sucederqan Pentecostés fiestapi? b) ¿Iman askha runakunata kallpacharqan bautizakunankupaq?

JERUSALENPIN 33 watapi runakuna hunt’a kashanku. Askha nacionkunamantan millonninpi runakuna Pentecostés fiestaman chayamunku. Chay fiestapin mana hayk’aq rikusqanku suceden, chay qhepamantaq apóstol Pedro huk sumaq discursota qon. Sonqoman chayaqtapunin riman, chaymi kinsa waranqa judiokuna judío runaman t’ikrakuqkunapas pesapakuspa bautizakunku, hinaspa huñukunku chayllaraq qallariq congregacionman (Hech. 2:41). Chhaytukuy runaq bautizakusqanta rikuqkunaqa anchatachá admirakurqanku.

² ¿Iman sucederqan chhaytukuy runaq bautizakunanpaq? Bibliaq willasqanman hina, chay ñawpaqllatan altos patapi Jesuspa qatikuqninkuna huñusqa kashaqtinku “hanaq pachamanta qonqaylla huk suenay uyarikurqan, sinchi wayraq suenasqan hina”, chaymi 120 Jesuspa qatikuqninkunaman santo espiritu huntaykurqan. Chayta qhawaq riq Dios sonqo runakunaqa anchatan admirakurqanku discipulokuna “wak rimaykunapi” rimasqankuta uyarispa. Chaymantataq Pedro sumaq discursota qorqan, chaypin rimarqan Jesuspa wañusqanmanta. Chayta uyariqtinkun runakunaq sonqon ch’allaq nirqan, chaymi tapukurqanku ima ruwanankuta, apostoltaq kutichirqan: “Huchaykichista saqepuspa Diosman kutirikuychis, hinaspa Jesucristoq sutinpi sapankaykichis bautizachikuychis, [...] hinan Santo Espirituq atiy qokuyninta chaskinkichis”, nispa (Hech. 2:1-4, 36-38).

3. ¿Imatan ruwananku karqan Pentecostés fiestapi pesapakuq judiokuna judío runaman t’ikrakuqkunapas?

 ³ Yuyaykusun Pedrota uyariq runakunapi. Religionninkuraykun Jehová Diosta reqsirqankuña. Chaymantapas, Hebreo Qelqakunapin yacharqanku santo espíritu Diospa kallpan kasqanta, chaywan ñawpaqpi tukuy kamasqanta hinallataq qhepaman ruwasqantapas (Gén. 1:2; Jue. 14:5, 6; 1 Sam. 10:6). Ichaqa, manan chayllatachu ruwananku karqan. Runakunata qespichinanpaq Diospa qosqan Jesustan Mesiasta hina chaskinanku karqan. Chayraykun Pedro paykunata nirqan “Jesucristoq sutinpi” bautizakunankupaq. Kawsarimpusqan qhepallamanmi Yachachiqninku, apostolta wakin qatikuqninkunatawan kamachisqa “Yayaq, Churiq, Santo Espirituq sutinpi” bautizanankupaq (Mat. 28:19, 20). Qhawarisunchis imaynatan qallariy siglopi cristianokuna chay kamachikuyta hunt’arqanku chayta, kay tiempopipas imayna hunt’asqankuta.

Yayaq sutinpi

4. ¿Imatan Dios ruwasqa Israel runakunawan?

⁴ Nisqanchis hina, Pedroq discursonta uyarispa kasukuq runakunaqa Jehová Diosta serviqmi karqanku, paywanmi amigontin karqanku. Chaymantapas kallpachakusqakun Diospa kamachikuyninta kasukunankupaq. Arí, qharu llaqtakunamantan hamurqanku huknin kamachikuyta huntanankurayku (Hech. 2:5-11). Ichaqa, manañan Diosqa Israelta llaqtanta hinachu qhawarisqa. Chayraykun manaña Diospa favorecesqan kayta atirqankuchu Kamachikuy Simiq nisqanta hunt’aspa (Mat. 21:43; Col. 2:14). Sichus chay runakuna Jehová Dioswan amigollantin kayta munarqanku chayqa, hukkunatawanmi ruwananku karqan.

5, 6. ¿Imatan askha judiokuna huk nacionmanta runakunapas ruwarqanku Dioswan allinpi kanankupaq?

⁵ Paykunaqa manan Diosmanta karunchakunankuchu karqan, paylla kawsay qoyta atisqanrayku (Hech. 4:24). Aswanpas, chayraqmi aswanta entiendenkuman Taytanku khuyapayakuq kasqanta. Payqa Mesiastan kachamusqa huchamanta kacharichinanpaq, Jesusta wañuchiq runakunata pampachananpaqpas liston kasharqan, Pedron nirqan: “Llapallan Israel miray runakuna, allintapuni yachaychis, qankunaq chakatasqaykichis [‘k’aspipi warkusqaykichis’, NM] Jesustan Diosqa churarqan Señor kananpaq, Cristo kananpaqwan”, nispa. Apostolpa nisqanta kasukuq runakunaqa imaymanamantan Diosta agradecekunanku karqan (Hechos 2:30-36).

⁶ Chay judiokuna judío runaman t’ikrakuqkunapas reconocerqankun Jehová Dios Jesuswan salvación apamusqanta, chayta ruwaspallan paymanqa asuykuyta atinkuman karqan. Chaymatapas Jesusta wañuchinankupaq yanapakusqankuraykun huchankumanta nanachikurqanku. Qhepamantaq ‘apostolkunaq yachachikuyninpi allinta sayarqanku’ (Hech. 2:42). Chhaynapin atirqanku ‘mana manchakuspa Diospa khuyapayakuq qayllanman chimpaykuyta khuyapayasqa’ kanankupaq (Heb. 4:16).

7. Manaraq Yayaq sutinpi bautizakushaspa, ¿ima cambiokunatan askha runakuna ruwarqanku Diosta imayna qhawarisqankupi?

⁷ Kunanpas, imaymana clase runakunan lliw nacionkunamanta Jehová Diosta reqsinku Bibliata estudiaspa (Isa. 2:2, 3). Wakinmi ateo karqanku, wakintaq Diospi creerqanku ichaqa piensarqanku kamasqanpi mana interesakunanpaq. Qhepamanmi ichaqa entienderqanku huk Kamaq kasqanta paywan sumaq amistad ruway atikusqantapas. Hukkunaqa Trinidad nisqapin creerqanku otaq imagenkunata yupaycharqanku, ichaqa yacharqankun Jehová Dios Tukuy-atiyniyoq kasqanta, sutinmanta waqyananku kasqantapas. Chayta yachaspan Jesuspa kamachisqanta kasukurqanku hinaspa Yayaq sutinpi bautizakurqanku.

8. ¿Imatan entiendenanku karqan heredasqanchis huchamanta mana yachaqkuna?

⁸ Chaymantapas chay Biblia estudiaqkunaqa yacharqankun Adán lliw runaman hucha  saqesqanta (Rom. 5:12). Chay runakunaq imayna tarikusqankuta entiendenapaq yuyaykusun huk runapi, payqa manan reparakunchu onqosqa kasqanta. Yaqapaschá yanqallata nanan, manataq doctorman rinchu chayqa qhalilla kananpaqmi piensan. Ichaqa doctorwan qhawachikamuqtinmi tarinku onqoyniyoq kasqanta (tupachiy 1 Corintios 4:4). Chhayna kaqtinqa, allin tratamientota maskhaspan chaywan hanpichikunan. Chayman rikch’akuqmi sucederqan imarayku huchayoq kasqanchismanta yachaqkunata. Bibliapin yacharqanku huchawan onqosqa hina kashasqankuta entienderqankutaq Dioslla chaypaq “hampi” qosqanta. Chaymi lliw Diosmanta karunchasqa runakuna payman asuykunanku hampisqa kanankupaq (Efe. 4:17-19).

9. ¿Imatan Dios ruwarqan hukmanta runakuna paywan allinpi kanankupaq?

⁹ Sichus Diosman qokuspa bautizakurqanchisña chayqa, yachanchismi Jehová Dioswan allinpi kay may sumaq kasqanta, pay anchata munakuwasqanchistapas (leey Romanos 5:8). Adanwan Evawan huchallikurqankuña chaypas, Diosmi allichayta qallarirqan hukmanta miraynin runakunawan allinpi kananpaq. Chaypaqmi ichaqa wawanta ñak’arichispa wañuchisqankuta rikuspa aguantanan karqan. Chayta yachaspan astawan Diosta munakunchis, chaytaq kallpachawanchis Kamachiqninchista hina kasukunapaq. Qanri, ¿ñachu Diosman qopuspa bautizakurqankiña? Rikusqanchis hina, kanmi allin razonkuna chayta ruwanapaq.

Churiq sutinpi

10, 11. a) ¿Imamantan manu kanchis Jesusman? b) ¿Imaynan sientekunki Jesús kawsayninta sacrificiopi qosqanmanta?

¹⁰ Yuyarisunchis Pedroq discursonta. Chaypin rikuchirqan Jesuspi iñiy ancha allinpuni kasqanta, chaymi tupan “Churiq [...] sutinpi” bautizakuywan. ¿Imaraykun chay ruway ancha importante ñawpaqpi karqan, kunanpas? Jesuspi iñispa sutinpi bautizakuspaqa reconocenchismi paypa yanapaynillanwan Dioswan allinpi kasqanchista. Yuyaymanasun ima beneficiokunatas k’aspipi wañuyninwan apamurqan chayta. Ñawpaqtaqa Kamachikuy Simiq ñakayninmantan judiokunata kacharichirqan (Gál. 3:13). Ichaqa aswan allintaraqmi ruwarqan, lliw runakunata huchamanta kacharichispa (Efe. 2:15, 16; Col. 1:20; 1 Juan 2:1, 2). Chaypaqmi ichaqa aguantanan karqan mana chanin ruwaykunata, sarunchaykunata, ñak’arichiykunata chaymantataq wañuchisqa karqan. ¿May allinpaqmi qhawarinki chay sacrificiota? Jesuspa sacrificion ancha valorniyoq kasqantan aswan allinta entiendesun kaypi yuyaykuspa: 12 watanpi kaq wawan Titanic barcopi viajashan 1912 watapi. * Qonqayllan barco unu ukhupi hatun chullunkuman chocan, hinaspa lamar-qochapi chinkayuyta qallarin. Chay wawan salvavidas boteman seqayta munan, ichaqa hunt’aña kaqtinmi manaña haykuyta atinchu. Chaymi huk runa esposanmanta despedikuspa barcoman p’itayuspa chay wawata rantinpi seqachin. ¿Imaynan sientekuwaq karqan chay wawa kaspayki? Ancha agradecesqachá. Chaymantaqa astawanraqmi Jesús qanrayku ruwarqan: wañurqanmi wiñaypaq kawsanaykipaq.

¹¹ ¿Imaynan sientekurqanki Jesús qanrayku ruwasqanta yachashaspa? (Leey 2 Corintios 5:14, 15.) Ancha agradecesqachá. Chayqa kallpacharqasunkichá Jehová Diosman qokuspa manaña qan ‘kikiykipaq kawsanaykipaq, aswanpas wañuspa kawsarimpuq Cristopaq kawsanaykipaq’. Churiq sutinpi bautizakuspaqa Jesús ñoqanchisrayku tukuy ruwasqanta agradecekusqanchistan rikuchinchis, hinallataq ‘Qollana kananpaq, Qespichiq kananpaqwan’ Diospa churasqanta allinpaq hap’isqanchista (Hech. 5:31). Manaraq bautizakushaspaqa manan Jehová Dioswan allinpichu karqanchis, manataq ima suyakuyninchispas hamuq tiempopaq karqanchu. Kunanmi ichaqa Jesuspa sacrificionpi iñispa Yayaq amigon kanchis (Efe. 2:12, 13). Apóstol Pablon qelqarqan: “Qankunapas ñawpaqtaqa  Diosmanta karunchasqan karqankichis, mana allinkunata ruwaspa sonqoykichispi Dios contra yuyaykuspa. Kunanmi ichaqa Cristoq runakayninpi wañusqanwan Diosninchis allipunachisunkichisña, paypa qayllanman ch’uyata, mana huchayoqta, mana huchachanata ima pusaykunasuykichispaq”, nispa (Col. 1:21, 22).

12, 13. Churiq sutinpi bautizakusqanchisrayku, a) ¿imatan huk cristiano ruwanan pipas phiñachiqtin? b) ¿ima ruwananchispaqmi kallpachakunanchis?

¹² Churiq sutinpiña bautizakurqanchis chaypas manan chayraykuchu mana huchayoqña kanchis. Chaypi yuyaykuymi yanapawanchis kawsayninchispi. Ejemplopaq, ¿imatan huk cristiano ruwanan pipas phiñachiqtin? Yuyarinanmi iskayninku huchayoq kasqankuta, chayrayku Diospa pampachayninta necesitasqankuta. (Mar. 11:25). Chaytan Jesús yachachirqan huk runamanta willaspa, chay runan huknin kamachinta waranqa- waranqa qolqe manukusqanta pampachasqa. Ichaqa chay kamachitaq kamachimasinta mana pampachayta munasqachu pachaq qolqe manukusqanta. Chaywanmi Jesusqa kayta yachachisharqan: sichus mana iñiqmasinchiskunata pampachasunchu chayqa, manan Jehová Diospas ñoqanchista pampachawasunchu (Mat. 18:23-35). Churiq sutinpi bautizakuqqa manan kamachikuynillantachu kasukunan, kallpachakunanmi ejemplonta yachachikuyninkunata qatikunanpaq pampachaqtaq kanan (1 Ped. 2:21; 1 Juan 2:6)

¹³ Huchayoq kasqanchisraykuña mana Jesusta llapanpi qatikuyta atisunmanchu chaypas, astawanraqmi chayta ruwananchis, chhaynapi Diosman qokusqanchista hunt’anapaq. Chaymi sapa p’unchay kallpachakunanchis mawk’a runa kasqanchista saqespa mosoq runawan p’achallikunanchispaq (leey Efesios 4:20-24). Huk amigonchista allinpaq qhawarinchis chayqa, pay hina kaytan munanchis. ¿Chaychu mana kallpachakusunman Cristomanta yachaspa pay hina kanapaq?

14. ¿Imaynatan rikuchillanchistaq Jesús hanaq pachapi Rey kasqanta reconocesqanchista?

¹⁴ Chaymantapas, Churiq sutinpi bautizakusqanchistan rikuchinchis Dios ‘tukuy imaymanata Cristoq chaki sarunanman churasqanta, hinallataq llapa iñiq t’aqapipas tukuy imaymanapi qollanata payta churasqanta’ reconocespa (Efe. 1:22, Edición 1988). Chaymi respetananchis Jesús qatikuqninkunata pikunawan umallisqanta. Sapanka congregacionpin churarqan umalliqkunata, huchayoq runaña kanku chaypas, espiritualpi wiñasqa kasqankutan rikuchinku. “Paykunatan churarqan iñiqkuna Diosta servinanpaq yachachiqta, Cristoq cuerponta wiñachinankupaq” (Efe. 4:11, 12). Pipas pantaqtinqa, Rey Jesucristoñan chaytaqa allichanqa, hayk’aqchus allinpaq qhawarinqa chaypi. ¿Confianchischu chay ruwananpi?

15. ¿Ima bendicionkunatan chaskinqaku bautizakuqkuna?

¹⁵ Nisqanchis hina, wakinqa manaraqmi Diosman qokuspa bautizakunkuraqchu. Chhaynapi tarikushanki chayqa, yaqapaschá ñawpa parrafokunapi yachasqanchis yanapasunki Churiq sutinpi bautizakuy yachayniyoq kay kasqanta entiendenaykipaq. Chhaynapin rikuchinki Jesuspa ruwasqanmanta ancha agradecekusqaykita, hinaspa askha bendicionkunata chaskinki (leey Juan 10:9-11).

Santo espirituq sutinpi

16, 17. ¿Iman santo espirituq sutinpi bautizakuy?

¹⁶ ¿Iman santo espirituq sutinpi bautizakuy? Yachasqanchis hina, Pentecostés fiestapi  Pedrota uyariqkunaqa yacharqankun santo espíritu ima kasqanta. Hinaspapas paykuna kikinkun rikurqanku apostolman hukkunamanpas ‘santo espiritu hunt’aykusqanta, hinan wak rimaykunapi rimayta qallarirqanku’ (Hech. 2:4, 8). Wakin runakunan ninku: “‘Santo espirituq sutinpi’ bautizakuy nisqa rimayqa huk runamantan rimashan” nispa, ichaqa ¿cheqaqchu chay nisqanku? Manan. Mayninpin imatapas ruwakuqtin ninchis: “Gobiernoq sutinpin ruwakun” nispa, ichaqa manan chaywanqa nishanchischu chay institución huk runa kasqanta, chay hinallataqmi santo espirituwanpas suceden.

¹⁷ Bibliata estudiaspan santo espiritumantaqa yacharqanchis. Chaypin yacharqanchis Dios espiritunwan Biblia yuyaychasqanta (2 Tim. 3:16). Espiritualpi wiñaspan aswan allinta yachallarqanchistaq Jesuspa prometesqanman hina santo espiritunta qowananchismanta, paymi nirqan: ‘Hanaq pachapi kaq Yayaykichisqa mañakuqninkunamanmi santo espiritunta qonqa’, nispa (Luc. 11:13). Chaymantapas repararqanchismi Diospa kallpan yanapawasqanchista. Qanri, ¿manaraqchu santo espirituq sutinpi bautizakurqanki? Bautizakunki chayqa, rikunkin Jesuspa prometesqan hunt’akusqanta: chaskinkin santo espirituta askha bendicionkunatapas.

18. ¿Ima bendicionkunatan chaskinku santo espirituq sutinpi bautizakuqkuna?

¹⁸ Yachasqanchis hina, Jehová Diosqa ñawpaqpi hinan kay tiempopipas llaqtanta espiritunwan pusarishan. Chay espiritun sapankanchista yanapawallanchistaq sapa p’unchay imaymana ruwasqanchispi. Sutinpitaq bautizakurqanchis chayqa, reconocenanchismi agradecekunanchistaq yanapawasqanchismanta, hinaspapas pusawasqanchisman hinan kawsananchis. Qatiqnin estudiopin yachasunchis imatas ruwasunman Diosman qokusqanchista hunt’anapaq, imaynatas santo espiritu chaypaq yanapawasunman chayta.

[Uranpi willakuy]

¿Yuyashankichu?

• ¿Iman Yayaq sutinpi bautizakuy?

• ¿Iman Churiq sutinpi bautizakuy?

• ¿Imaynatan rikuchinchis Yayaq, Churiq sutinpi bautizakusqanchis entiendesqanchista?

• ¿Iman santo espirituq sutinpi bautizakuy?

[Tapuykuna]

[10 paginapi dibujokuna]

¿Imatan mosoq discipulokuna ruwayta atirqanku 33 wata Pentecostés fiestamantapacha?

[Fotota horqorqan]

Israelpi (Jerusalén) Museoq permisonwan