Kusi kawsaytan tarini

Khaynatan willakun Gaspar Martínez

Hawa llaqta runan kani. Waynallaraq kashaqtiymi llaqtaman ripurani, chaypitaq qhapaqyarani. Ichaqa manan qolqewanchu qhapaqyarani. Chaymantan kunan willasqaykichis.

HUCH’UYCHAYMANTAPACHAN tiyarani España nacionpi La Rioja suyuq huk llaqtachanpi, 1930-1940 watakunapi. Chunka watallaypiraq kashaqtiymi escuelayta saqepurani, ichaqa yacharaniñan leeyta qelqaytapas. Soqta wayqe panaykunawanmi ch’isiyaqta ovejakunata michiq kayku, chakraykupipas llank’aq kayku.

Wakchataq karayku chayqa, maytan munarayku qhapaq kayta. Chaymi envidiakurayku imaymana kaqniyoq runakunata. Chhaynaña kaqtinpas, obispo nisqa sacerdoten huk kutipi niran: “Llapa encargakusqay llaqtakunamantaqa kay llaqtan astawan iñin Diospi”, nispa. Manayá payqa yacharanchu qhepamanqa askha runakuna católica iglesiamanta lloqsipunankuta.

Qhapaq kayta maskhasqay

Mercedes sutiyoq llaqtamasiywanmi casarakurani, pisi tiempollamantataq huk wawayoq kapurayku. 1957 watapin Logroño llaqtaman ripurayku, chay llaqtaqa manan karuchu llaqtaymantaqa. Qhepamanqa wakin familiaykunapas chaymanmi ripuranku. Manataq huk profesionniy karanchu chayqa, sasan ñoqapaq karan familiayta uywanaypaq huk allin llank’anata tariy. Munasharanipunin pipas yuyaychawananta, chaymi huk bibliotecata rirani “ichapas librokunapi imallatapas tariyman” nispa.

Chaymantataq uyarirani radiopi willakamusqankumanta rimasqankuta, qelqakunata apachimuspas runakunata yachachisharanku Bibliamanta. Chaymi mañakurani chay qelqakunata apachimuwanankupaq. Chaykuna estudiayta tukuqtiytaq evangelistakunata reqsichiwaranku. Iskay kutita hinan rirani paykunaq iglesianta, ichaqa ratullan repararani umalliqninkuna ukhupi t’aqanakuy cheqninakuy kasqanta. Chayraykun manaña paykunawan huñukuraniñachu. Hinan nirani: “Chhaynachá llapa religionkunapas kanku”, nispa.

Cheqaq yachayta tarisqay

1964 watapin wasiyta hamuran Eugenio, payqa Jehová Diospa testigonmi kasqa. Chay tiempopaqqa manan hayk’aqpas uyariranichu Testigokunamantaqa, ichaqa munaranipunin Bibliamanta rimayta. Ñoqaqa piensarani Bibliamanta askhata yachanaypaq, chaymi apachimuwasqanku qelqakunapi yachasqay textokunata Eugenioman qhawachirani. Manaña protestantekunaq creenciankunapi allintachu  iñirani chaypas, chay kutipiqa chay creesqankunatan defienderani.

Iskay kutipin Eugeniowan unayta rimarayku, chaymi repararani Bibliamanta allin yachaq kasqanta. Ñoqamanta aswan pisi educacionniyoqña karan chaypas, ratullan payqa Bibliapi textokunata tariq, allintataq chaykunamanta willawaq. Paymi yachachiwaran tukukuy qaylla p’unchaykunapi kasqanchista, hinallataq Diospa Gobiernon kay pachata huk paraisoman tukuchinantapas. Anchatan kusikurani chaykuna yachasqaymanta (Sal. 37:11, 29; Isa. 9:6, 7; Mat. 6:9, 10).

Hinan paywan Bibliamanta estudiayta qallarirani. Tukuy ima yachachiwasqanqa ñoqapaqqa mosoqkaman karan, sonqoymantaq chayaranpas. Chayraqmi allinta entienderani imapaqchus runa kawsasqanta, arí, chayraqmi tarirani imatachus maskhasqayta. Manañan imapas qokuwaranñachu qhapaq kaymantaqa, manañataqmi nishutachu llakikurani allin llank’anayoq kanaymanta. Yacharanitaq onqoypas wañuypas tukukapunanta chayqa, manañan nishutachu llakikurani ima sasachakuykunamantapas (Isa. 33:24; 35:5, 6; Apo. 21:4).

Hinan familaykunaman willayta qallarirani imaymana yachashasqaymanta. Tukuy sonqowanmi willarani kay pachata Dios huk sumaq paraisoman tukuchinanta, chaypitaq Dios sonqo runakunalla kawsanankuta.

Familiaykuna Dios serviyta qallarinku

Pisi tiempollamantan 12 familiaykunawan sapa domingo tardenta huñukuyta qallarirayku Bibliamanta parlanaykupaq, chaytaqa tioykunaq wasinpin ruwaq kayku. Iskay kinsa horasta hinan huñukuq karayku. Askha familiaykunan Bibliamanta astawan yachayta munasharanku, chaymi Eugenioqa sapankankuta yachachiyta qallariran.

Wakin familiaykunaqa Durango llaqtapin tiyaranku, chay llaqtaqa 120 kilómetros hinan Logroño llaqtamantaqa; chaypiqa manan ni huk Testigollapas karanchu. Chaymi kinsa killa qhepamantaqa paykunaqta rirani imachus yachashasqaymanta willaq, ichaqa iskay kinsa p’unchayllapaqmi rirani. Chaymi chunka familiaykunawan sapa tuta huñukurayku, kuska tuta pasanaykukamataq Bibliamanta parlarayku. Llapankun kusikuranku willasqaywan, kutimpunaypaqtaq paykunaman saqerani Bibliakunata huk qelqakunatawan. Kutimpusqay qhepamanpas manan qonqaranichu paykunaman qelqayta.

Jehová Diospa testigonkunaqa maytachá kusikuranku Durango llaqtaman chayllaraq predicaq chayashaspanku, chaypin tarisqaku chunka pusaqniyoq runakunata Biblia estudianankupaq suyashaqta. Chaypin qallarisqaku sapanka familiawan Biblia estudiayta.

Chaykamaqa Mercedes manan Biblia estudiayta munaranchu. Payqa manchasqan kasharan. España nacionpi autoridadkunayá Testigokunata kamachiranku: “Aman predicankichischu”, nispa. Chaymantapas manchakullarantaq iskaynin wawaykuta escuelamanta qarqonankuta, hinallataq runakuna mana allinta qhawariwanankutapas. Llapa familiaykuna Biblia estudiay qallarisqankuta rikuspan ichaqa, paypas estudiayta qallariran.

Iskay watallapin familiaymanta tawa chunka bautizakuranku, chhaynapitaq rikuchiranku Diosman servinankupaq prometekusqankuta. Kunanqa familiaypas ñoqawan kuskan Diosta servishanku, chaymi anchatapuni kusichiwan. Askhatapunin Jehová Diosqa espiritualpi qhapaqyachiwaranku.

Astawanmi espiritualpi qhapaqyani

Iskay chunka watan kallpachakurani iskay wawaykunata allinta uywanaypaq, iñiqmasiykunawan kuska llank’anaypaqpas. Jehová Diosqa iñiqmasiykunata imaymanapi yanapanaypaqmi churawaran. Logroño llaqtapiqa pachak waranqa runakunan tiyan. Mercedeswan chayman chayllaraq hamushaspaykun ichaqa iskay chunka Testigonkunallan chaypi karanku.

56 wataypi kashaqtiymi llank’asqay fabricata wisq’apuranku, chaymi mana llank’anayoq qhepakurani. Ñoqaqa munaranipunin Diospaq hunt’asqata llank’ayta, chaymi precursor kapurani. Chay frabicamanta jubilación nisqataña chaskiq kani chaypas, manan chay qolqe aypawaqkuchu, chaymi Mercedes yanapawaq  llank’apakuspa. Qolqechaykuq kasqanman hinallan imatapas rantikuq kayku, ichaqa manan ima necesitasqaykupas faltawaqkuchu. Kunankamapas precursormi kashani, señoraytaq mayninpi precursor auxiliarta hap’in. Paymanqa gustanmi predicay.

Qayna watakunapin señoray Mercedesqa revistakunata apaq karan Merche sutiyoq sipasman. Chay sipasqa huch’uyllaraq kashaspas Bibliata estudiasqa. Payqa tukuy sonqowanmi revistakunata leeq, chaymi Mercedes repararan sonqonpi Diosta munakusqanta. Hinan Mercheqa Biblia estudiayta qallariran. Ichaqa qosan Vicenten sinchi machaq karan, chaymi mana ima llank’anapipas unaychu kaq, chaymi familiantapas mana manteniyta atiranñachu. Chhayna machaq kasqanraykun yaqalla t’aqanakapuranku.

Mercedesmi Mercheta niran: “Qosaykita niy qosaywan rimananpaq”, nispa. Merchetaq chayta ruwasqa. Chaymi Vicenteqa visitanaypaq niwaran. Askha kutita visitaqtiytaq ñoqawan Biblia estudiayta qallariran. Estudiasqanman hinan payqa pisi pisimanta machayta saqepuran: qallariypiqa iskay kinsa p’unchaylla manaña macharanchu, chaymantaqa semanaña; tiempowantaq qonqapuranpuni machayta. Chhaynapin uyanpas allinmanraq tukuran, hinan familianpipas thak kawsay kapuran. Kunanqa islas Canarias nisqapin ususinkuwan kuska tiyashanku, chaypin wayqe panakunawan Diosta servishanku.

Manan yanqapaqchu kawsarani

Familiaymanta wakin Testigokuna wañukapunkuña chaypas, huk familiaykunaqa astawanmi yapakushan, Jehová Diospa bendicionninkunatapas chaskishanku (Pro. 10:22). Tawa chunka watañan karun wakin familiaykuna Biblia estudiayta qallarisqankumanta. Yaqa llapankun tukuy sonqo Jehová Diosta servishanku wawankuwan nietonkuwan kuska. Maytapunin chaywan kusikuni.

Askhañan familiaymanta Jehová Diospa testigonkuna kanku, wakinmi kanku umalliqkuna; wakintaq, siervo ministerialkuna; wakintaq, precursorkuna. Kuraq kaq wawaymi señoranpiwan Madrid sucursalpi llank’ashanku. Bautizakusqay watapiqa España nacionpi kinsa waranqa Testigokunallan karan, kunanmi ichaqa pachak waranqa masña. Maytan kusikuni Diospaq hunt’asqata llank’aspay. Jehová Diostan agradecekuni paypa sonqota kawsachiwasqanmanta. Manaña escuelaytapas tukuranichu chaypas, mayninpin yanapakuni watukuq umalliqpa rantinpi.

Qayna watakunallan willawanku nacesqay llaqtamanta. Sinchi wakchayay kasqanraykus askha chaymanta ripuranku qhapaq kayta maskhanankupaq. Wakinmi ichaqa Jehová Diosta servishanku. Chaymi qhapaq kaymantapas aswan allinqa. Kunanqa yachankun imapaqchus runa kawsasqanta, ancha kusisqataq kawsashanku Diosta servispa.

[32 paginapi foto]

Yaqa llapa familiaykunan Diosta servishanku