Wakin casarasqakunaqa ima sasachakuymantapas allinta parlashaspan pisi-pisimanta phiñachinakuyta qallarinku, ¿jayk’aqllapas chhaynapi tarikurankichu? ¿Iman yanapasunkichisman mana phiñachinakuspalla parlanaykichispaq? Chayta yachanapaq ñaupaqta qhawarisun imaynatan warmipas qharipas rimanku chayta. *

Yaqa llapa warmikunan lliutaraq willakuyta munanku. Arí, mayninpiqa parlayllatan necesitakun imapas allichakunanpaq.

Silvia * nin: “Qosayman imayna sientekusqayta willaqtiymi sumaqta entiendewan jinan thaj sientekuni. Parlasqayku qhepamanqa manañan imamantapas llakikunichu”, nispa.

Micha nin: “Qosayman imayna sientekusqayta mana willaqtiyqa manan thajchu kani. Imachus llakichiwasqanmanta willakuqtiymi ichaqa sasachakuyniypas allichakunman jina sientekuni”, nispa.

Lurdes nin: “Willakusqayman jinan piensani imaynapi chay sasachakuy qallarisqanta imaynatan allichayman chaytapas”, nispa.

Qharikunaqa sasachakuyta allichaypin astawanqa piensanku. Wakin qharikunaqa ima sasachakuytapas allicharuspan kusisqa sientekunku. Chaytaqa ruwanku esposankuta yanapayta munaspan. Chaymi qosakuna mayninqa phiñakunku esposanku mana kasuqtin. Sebastianmi nin: “Ima sasachakuypas allichakunanta munaspachá riki imatapas willakunku”, nispa.

Siete reglas de oro para vivir en pareja nisqa libron nin: “Consejo qoymantaqa entiendeq kaymi aswan importante. Qosaykiqa otaq esposaykiqa manaraq ima consejotapas qoshaqtiykin munan tukuyta yachanaykita. Payqa  munan uyarisqa kayllatan, manan kaqpacha ima sasachakuytapas allichanaykitachu”, nispa.

Qosakunapaq consejo. Kallpachakuy tukuy yuyaywan uyarinaykipaq imayna sientekusqanta entiendenaykipaqwan. Tomás sutiyoq runan nin: “Esposaywan parlasqayku qhepamanmi manapas sasachakuyta allichaymanchu jina sientekuni. Esposaymi ichaqa uyarinallayta munan”, nispa. Esteban runapas ninmi: “Esposaypa parlasqanta mana tatichispa uyariymi aswan allinqa, chaymi rimayta tukuruspa niwan: ‘Kunanqa thajmi sientekuni’”, nispa.

Kaytan ruwawaq: Sichus esposayki ima sasachakuytapas willasunki chayqa ama kaqpachachu ima consejotapas qoy. Aswanpas payta qhawaspa makilla uyariy. Umaykiwan kutichiy acuerdopi kasqaykita. Willay imatachus entiendesqaykitapas. Carlos sutiyoq runan nin: “Mayninpin esposayqa entiendenallayta munan”, nispa (Bibliaq yachachikuynin: Santiago 1:19).

Esposakunapaq consejo. Qosaykiman willay imaynatachus yanapanasuykita munanki chayta. Elena nin: “Yaqapaschá nisunman: ‘Qosayqa yachanñan imachus necesitasqayta’, nispa. Chaywanpas mayninqa sut’itan willananchis imachus necesitasqanchista”, nispa. Inesmi nin: “Yaqapaschá nisunman: ‘Qanwanmi parlariyta munashani, ichaqa uyariwanallaykitan munani, imayna sientekusqayta entiendewanaykita ima’”, nispa.

Kaytan ruwawaq: Sichus qosayki kaqpacha ima consejotapas qosunki chayqa ama phiñakuychu. Yaqapaschá manaña llakikunaykipaq chayta nishasunki. Ester sutiyoq warmin nin: “Phiñakunaymantaqa sonqoypin nini: ‘Qosayqa munakuwaspa yanapawayta munaspan kaytaqa niwashan’”, nispa (Bibliaq yachachikuynin: Romanos 12:10).

Warmi-qharipaq consejo: Llapanchispas imayna jujkunata tratanchis chay jinallatataqmi munanchis tratawananchista. Ichaqa familiapi ima sasachakuytapas allichanapaqqa esposaykiq otaq qosaykiq munasqanman jinan payta tratanayki (1 Corintios 10:24). Miguel sutiyoq runan nin: “Qosakunaqa kallpachakunankun esposankuta uyarinankupaq, esposakunapas qosankuq consejo qosqantan mayninpi uyarikunanku. Chayta ruwaspan sumaqta kausanqaku”, nispa (Bibliaq yachachikuynin: 1 Pedro 3:8).