1, 2. ¿Imatan mayninpi tapukusunman?

 ¿JAYK’AQLLAPAS tapukurqankichu: “¿Jehová Dios kutichimunmanchu mañakusqayta?”, nispa? Askha iñiqmasinchiskunan chhaynata tapukunku, astawanqa sasachakuykunapi tarikuspan chayta tapukunku. Yaqapaschá noqanchispas sasachakuykunapi tarikuspa chhaynata tapukurqanchis.

² Kay yachachikuypin yachasunchis imaraykus Jehová Dios tukuy ima mañakusqanchista kutichimun chayta (1 Juan 5:15). Chaymantapas yachallasuntaq imaraykus Jehová Dios mana mayninpi munasqanchisman jinachu mañakusqanchisman kutichimun chayta, imaynatas kutichimun chaytapas.

3. ¿Imaraykun Jehová Dios munan paymanta mañakunanchista?

³ Biblian niwanchis Jehová Dios anchata munakuwasqanchista. Arí, paypaqqa ancha valorniyoqmi kanchis (Ageo 2:7; 1 Juan 4:10). Chayraykun payqa paymanta mañakunanchista munan (1 Ped. 5:6, 7), chhaynapi paymanta ama t’aqakunanchispaq sasachakuykunata aguantananchispaqpas.

4. ¿Uyarinchu Jehová Dios serviqninkunaq mañakusqanta? ¿Imaynapin chayta yachanchis? (Qhaway kay parrafopaq dibujokunata).

⁴ Bibliaqa askha kutitan willashan imaynatas Jehová Dios llapa serviqninkunaq mañakusqanta kutichirqan chayta. Jujninmi kashan rey Davidmanta. Payqa imaymana sasachakuykunapin tarikurqan qatikachasqa iman karqan, chaywanpas payqa Jehová Diosmantapunin mañakuq. Chaymi juj kutinpi Jehová Diosta nirqan: “Diosníy Jehová, mañakusqayta uyarimuway, yanapawanaykipaq rogakusqayta uyarimuway. Chanin kasqaykirayku, junt’aq sonqo kasqaykirayku uyarimuway”, nispa (Sal. 143:1).  Jehová Diosqa uyarirqanmi chay mañakusqanta chaymi enemigonkunamanta librarqan (1 Sam. 19:10, 18-20; 2 Sam. 5:17-25). Chayraykun Davidqa mana iskayaspa nirqan: “Jehová Diosqa llapa wajakuqninkunaq qayllanpin kashan”, nispa. Chhaynatan noqanchistapas Jehová Diosqa yanapawasunpuni (Sal. 145:18).

5. ¿Mañakusqankuman jinapunichu Jehová Dios serviqninkunaman kutichirqan? Chayta juj ejemplowan willay. (Qhaway kay parrafopaq dibujokunata).

⁵ Mayninpiqa Jehová Diosqa mana munasqanchisman jinachu mañakusqanchisman kutichimunman. Chaymi pasarqan apóstol Pablowanpas, payqa juj sasachakuypin tarikurqan. Chay sasachakuyqa kiska jinan paypiqa karqan, chaymi kinsa kutita Jehová Diosmanta rogakurqan “chay kiskata” paymanta orqonanpaq. ¿Kutichimurqanchu Jehová Dios chay mañakusqanta? Arí, ichaqa manan mañakusqanman jinachu kutichimurqan, manan chay sasachakuynintaqa tukuchirqanchu. Aswanpas Jehová Diosqa kallpatan qorqan chay sasachakuyninta aguantananpaq, chhaynapi ama pisipaspa payta servishanallanpaq (2 Cor. 12:7-10).

6. ¿Imaraykun mayninpi nisunman: “Jehová Diosqa manan mañakusqayta kutichimushanchu”, nispa?

⁶ Mayninpiqa Jehová Diosqa manan piensasqanchisman jinapunichu mañakusqanchisman kutichimunman. ¿Imarayku? Jehová Diosqa allintan yachan imas allin imas mana allin noqanchispaq chayta, chayman jinataq mañakusqanchisman kutichimuwanchis. “Mañakusqanchismantapas piensasqanchismantapas mana creey atiytaraqmi payqa aswan askhata imatapas ruwanman” (Efes. 3:20). Chayraykun mana piensasqanchisman jina imatapas qowasunman.

7. ¿Imaraykun mayninpi imachus Jehová Diosmanta mañakusqanchista cambiananchis kanqa?

⁷ Yaqapaschá mayninpiqa Jehová Diosmanta mañakusqanchista cambiananchis kanqa chhaynapi munayninman jina imatapas ruwananchispaq. Martin Poetzinger hermanonchismanta yachasun. Pisi tiempollaraq casarasqa kashaqtinmi hermanonchistaqa “campo de concentración nazi” nisqaman aparqanku. Chaypis payqa Jehová Diosmanta mañakusqa chaymanta orqonanpaq; payqa maytas munasharqan esposanwan tupayta, Diosmantapas willaq lloqsiyta. Mañakusqanmantaqa iskay semanañas pasarusqa ichaqa manas chaymanta lloqsisqachu. Chaysi jujmanta Diosmanta mañakusqa: “Jehová Diosniy reparachiway imatan ruwanayta munanki”, nispa. Chayllamansi payqa paywan kuska wisq’asqa kashaq hermanokunapi imaynapichus tarikusqankupi piensayta qallarisqa. Chaypi tarikuq wakin hermanonchiskunapas llakisqas kashasqaku  esposankumanta wawankumanta ima. Chaypis hermanonchisqa reparasqa Jehová Dios mañakusqanman kutichimusqanta. Chaysi nisqa: “Gracias Jehová Diosníy kay mosoq llank’ayta qowasqaykimanta. Kunanqa yanapaway hermanokunata kallpachanaypaq”, nispa. Hermanonchis Martinqa isqon watas hermanonchiskunata wisq’asqa kashasqan tiempopi kallpachasqa.

8. ¿Imatan manaraq mañakushaspa yuyarinanchis?

⁸ Yachasqanchis jina Jehová Diosqa tiempollanpin munayninta junt’anqa. Munashantaqmi llapa llakikuykunata chinkachiyta. Chaymi pisi tiempollamanta unu lloqllakunata, terremotokunata, onqoykunata, wañuyta ima wiñaypaq chinkachipunqa. Tukuy chaykunataqa gobiernonpin tukuchipunqa (Dan. 2:44; Apo. 21:3, 4). Chaykaman ichaqa jinallata qhawashan Satanás kay pachapi kamachikunanta (Juan 12:31; Apo. 12:9). b Sichus Jehová Dios kay tiempopi llapa sasachakuyninchiskunata chinkachipunman chayqa Satanastachá allin kamachikuqta jina qhawarichinman. Chaymi pacienciawan suyakunanchis Jehová Dios gobiernonpi llapa promesankunata junt’ananta. Chay p’unchay chayamunankamaqa payqa yanapallawasunpunin. Kunanqa yachasunchis imakunatas Jehová Dios ruwan yanapawananchispaq chayta.

9. ¿Imatan Jehová Dios qowanchis allinta imatapas ruwananchispaq? Juj ejemplota willay.

⁹ Yachaytan qowanchis. Jehová Diosmi yachayta qowanchis imatapas allinta ruwananchispaq. Runakunaqa Jehová Diospa yanapaynintan necesitanchis allinta imatapas ruwananchispaq. Astawanqa casarakusunchus icha manachus chayta qhawarinanchispaqmi yanapayninta necesitanchis (Sant. 1:5). Yachasun tukuy tiemponwan serviq María hermananchismanta. c Payqa kusisqan Jehová Diosta servisharqan, chayllamansi juj hermanota reqsisqa. Paymi nin: “Chay hermanowanqa pisi-pisimantan allin amigontin kapurqayku. Tiempowanmi ichaqa munanakuyta qallarirqayku, chaymi allinta yuyaykunay karqan imata ruwanaypaqpas. Chaymi Jehová Diospa yanapayninta mañakurqani allinta imatapas ajllakunaypaq”, nispa. Mariaqa repararqanmi Jehová Dios mañakusqanman kutichimusqanta. ¿Imaynatan mañakusqanman kutichimurqan? Qelqanchiskunawanmi. Chaypis hermananchisqa allin yuyaychaykunata tarisqa. Chaymantapas mamansi allin consejokunata qosqa allinta imatapas ruwananpaq. Chay yuyaychaykunawansi hermananchis Mariaqa allinta ruwasqa.

10. Filipenses 4:13 nisqan jina, ¿imaynatan Jehová Dios serviqninkunata yanapan? Juj ejemplota willay. (Qhaway kay parrafopaq fotota).

¹⁰ Kallpatan qowanchis. Jehová Diosqa apóstol Pabloman jinan kallpata qowasunchis ima  sasachakuytapas aguantananchispaq (leey Filipenses 4:13). Yachasun Benjamin hermanonchismanta. Payqa waynacha kasqanmantapachas familianwan kuska África ladopi nacionninkumanta ayqekamuq runakunapaq karpakunapi tiyasqa. Paymi nin: “Noqaqa tukuy tiempon Jehová Diosmanta kallpata mañakuq kani allinta imatapas ruwanaypaq. Payqa uyarirqanmi mañakusqayta chaymi thaj kayta qowarqan, chaymantapas yanapawarqanmi mana manchakuspa paymanta willanaypaq. Allin iñiyniyoq kanaypaqpas qelqanchiskunawanmi yanapawarqan”, nispa. Paymi nillantaq: “Hermanonchiskunaq experiencianta leespan repararqani imaynatas Jehová Dios paykunata yanaparqan sasachakuykunata aguantanankupaq chayta. Chayta yachaymi noqatapas yanapawarqan ama pisikallpayanaypaq”, nispa.

11, 12. ¿Imaynatan Jehová Dios hermanonchiskunawan kallpachawanchis? (Qhaway kay parrafokunapaq fotota).

¹¹ Hermanonchiskunawanmi kallpachawanchis. Manaraq noqanchisrayku vidanta qoshaspan Jesusqa Jehová Diosmanta tukuy sonqonwan mañakurqan. Jesustaqa millay runata jina Diosta k’amiq runata jinan wañuchinanku karqan, chaymantan Jesusqa sinchi llakisqa kasharqan, chaymi Jehová Diosta rogakurqan chhayna wañuymanta librananpaq. Manaña Jesusta millay runata jina wañuchinankupaq jark’arqanchu chaypas, Jehová Diosqa juj angeltan kacharqan Jesusta kallpachananpaq (Luc. 22:42, 43). Chhaynallatataqmi Jehová Diosqa noqanchistapas hermanonchiskunawan yanapachiwanchis. Chaymi mayninpiqa hermanonchiskuna kallpachawananchispaq visitamuwanchis wajarimuwanchis ima. Ichaqa llapanchismi kallpachakunanchis sumaq simikunawan hermanonchiskunata kallpacharinanchispaq (Prov. 12:25).

¹² Yachasun Míriam hermananchismanta. Qosanpa wañupusqan qhepamanqa sinchi llakiq ñit’isqansi tarikusqa, waqayllas waqaq. Chaymi pillawanpas rimayta munarqan, paymi nin: “Manan kallpaypas karqanchu pillatapas wajarinaypaq, chaymi waqakusparaq Jehová Diosmanta mañakurqani, ichaqa manaraq mañakuyta tukushaqtiymi juj umalliq celularniyman wajamuwarqan. Paypas esposanpas amigoykunan karqanku”, nispa. Chay hermanonchiskunaqa sumaqtan hermananchista sonqocharqanku. Chaypin hermananchisqa repararqan Jehová Dios mañakusqanman kutichimusqanta.

13. ¿Pikunawanmi Jehová Dios ñaupa tiempopi llaqtanta yanaparqan? ¿Pikunawanmi kay tiempopipas yanapachiwanchis?

 ¹³ Jehová Diosqa payta mana serviq runakunawanmi yanapachiwanchis (Prov. 21:1). Mayninpin Jehová Diosqa payta mana serviq runakunawan serviqninkunata yanapan. Chhaynatan ñaupa tiempopipas serviqninkunata yanaparqan. Rey Artajerjesmi Nehemiasman permisota qorqan Jerusalén llaqtapi Diospa wasinta jujmanta jatarichinanpaq (Neh. 2:3-6). Kunanpas chhaynatan Jehová Diosqa payta mana serviq runakunawan yanapachiwasunman.

14. ¿Imaynatan Soo Hing hermananchispa willakusqan yanapawanchis? (Qhaway kay parrafopaq fotota).

¹⁴ Soo Hing hermananchismanta yachasun. Payqa sasachakuykunapi tarikushaspan Jehová Diospa yanapayninta repararqan. Hermananchispa wawanqa umanmantas mana allinchu kashan, chaymantapas chay wawantaqa juj accidentes pasasqa. Hermananchisqa qosanwansi llank’anankuta saqepusqaku wawankuta cuidanankupaq, ichaqa mana qolqeyoqsi kapusqaku, chaysi hermananchisqa manaña imanakuytapas atisqachu, manañas imata ruwananpaqpas kallpan kasqañachu. Chaysi Jehová Diospa yanapayninta waqaykuspa mañakusqa, chay qhepallamansi juj doctor willasqa gobiernomanta juj yanapayta chaskikuy atisqanta, chaymantapas chay doctorsi yanapallasqataq pisi qolqellapaq juj wasita tarinankupaq. Soo Hing hermananchismi nin: “Chhayna sasachakuypi tarikuspan Jehová Diospa yanapayninta repararqani. Payqa uyarinpunin llapa mañakusqanchista”, nispa (Sal. 65:2).

15. ¿Imata ruwaspan hermananchis Yoko repararqan Jehová Dios mañakusqanman kutichimusqanta?

¹⁵ Jehová Diosqa manan munasqanchisman jinachu mayninpiqa kutichimuwanchis, aswanpas payta servishanallanchispaq imachus necesitasqanchisman jinan kutichimuwanchis. Chayraykun allinta reparananchis imaynatas Jehová Dios mañakusqanchisman kutichimuwanchis chayta. Yachasun Yoko hermananchismanta. Payqa piensasqas Jehová Dios mañakusqanman mana kutichimusqanta, chaysi payqa Jehová Diosmanta imakunatachus mañakusqanmanta cuadernonpi qelqayta qallarisqa, tiempowantaq cuadernonta jujmanta qhawaspa reparasqa imaynas Jehová Dios yaqa llapa mañakusqanman kutichimusqanta. Hermananchisqa qonqarapusqañas kanpas wakin mañakusqantaqa, ichaqa Jehová Diosqa chay mañakusqantapas kutichimusqañas. Chhaynatan noqanchispas  tiempota t’aqananchis imaynatas Jehová Dios mañakusqanchisman kutichimushawanchis chayta reparananchispaq (Sal. 66:19, 20).

16. ¿Imaraykun Diosmanta mañakuspa allin iñiyniyoq kananchis? (Hebreos 11:6).

¹⁶ Manan Jehová Diosmanta mañakunallanchispaqchu iñiyniyoqqa kananchis, iñiyniyoqmi kanallanchistaq jujniraymanta Jehová Dios mañakusqanchisman kutichimusqanta chaskikunanchispaqpas (leey Hebreos 11:6). Yachasun Mike hermanonchismanta Chrissy esposanmantawan, paykunaqa Betelpis yanapakuyta munasqaku. Mike hermanonchismi nin: “Askha kutitan Betelpi yanapakunaykupaq solicitudta apachirqayku, chaymantapas sapa kutillanmi Jehová Diosmanta mañakurqayku chaypi yanapakunaykupaq, ichaqa manan jayk’aqpas wajamuwarqankuchu”, nispa. Chhaynaña kaqtinpas paykunaqa allintan yacharqanku Jehová Dios maypichus aswan allinta yanapakunkuman chayta yachasqanta. Chaymi paykunaqa kallpachakushallarqanku Diosmanta willanapaq necesitakusqan ladopi tukuy tiemponkuwan yanapakunankupaq. Chaymantapas juñunakuna wasikuna jatarichiypin yanapakullarqankutaq. Kunantaq watukuq umalli jina yanapakushanku. Mike hermanonchismi nillantaq: “Jehová Diosqa kutichimuwarqankun mañakusqaykumanqa, ichaqa mana munasqaykuman jinachu aswanpas paypa munasqanman jinan. Kay chaskisqayku llank’ayqa ancha munaypunin”, nispa.

17, 18. Salmos 86:6, 7 nisqan jina, ¿imamantan manapuni iskayananchischu?

¹⁷ (Leey Salmos 86:6, 7). Rey Davidqa allintan yacharqan Jehová Dios mañakusqanman kutichimusqanta makilla uyarisqantapas. Noqanchispas chaymantaqa manan iskayananchischu. Kaypi yachamusqanchis jina Jehová Diosqa yachaytan qowanchis imatapas allinta ruwananchispaq, jinaspapas kallpatan qowasunchis ima sasachakuytapas aguantananchispaq. Chaymantapas Jehová Diosqa llaqtanpi iñiqmasinchiskunawanmi yanapachiwasunman otaq payta mana serviq runakunawanpas yanapachiwasunman.

¹⁸ Manaña Jehová Dios mañakusqanchista munasqanchisman jinachu kutichimunqa chaypas, payqa kutichimunqapunin mañakusqanchista. Jinaspapas necesitasqanchisman jinan tiempollanpi kutichimuwasun. Chhaynaqa, ama iskayaspa Jehová Diosmanta mañakushallasun, payqa imachus necesitasqanchistan kay tiempopi qowasun, jamuq tiempopitaq llapa munasqanchista qowasun (Sal. 145:16).