1, 2. a) ¿Imata yuyarispan sonqonchisraq nanawanchis? b) ¿Imaniranmi Jesús discipulonkunata manaraq wañupushaspa?

 MAYQEN familianchispas otaq amigonchispas wañukapuqtinqa manan paykunataqa qonqayta atinchischu. Astawanqa wañukapusqanta yuyarispan sonqonchisraq nanawanchis.

² Sapa watanmi millonninpi runakuna juñukunchis señorninchis Jesucristoq wañukapusqan p’unchayta yuyarinanchispaq (1 Ped. 1:8). Chaypin yuyarinchis Jesús noqanchisrayku wañusqanta, wañusqanwan juchamantapas wañuymantapas kacharichiwasqanchista (Mat. 20:28). Jesusqa manaraq wañupushaspan juj tuta ñaupaqta discipulonkunawan juj cenata ruwaran. Chaypin paykunata niran: “Kaytaqa ruwallankichispunin noqata yuyariwanaykichispaq”, nispa (Luc. 22:19).

3. ¿Imakunamantan kay yachachikuypi yachasunchis?

³ Sapa watanmi millonninpi runakuna juñukunchis Jesuspa wañupusqan p’unchayta yuyarinanchispaq. Ichaqa wakillanmi janaq pachapi tiyanankupaq suyakuyniyoqqa kanku, yaqa llapanchispas kay pachapin tiyasunchis. Chhaynaqa, ¿imaraykun sapa watan juñukunchispuni señorninchis Jesucristoq wañupusqanta yuyarinanchispaq? ¿Imaynapin yanapawanchis chay juñunakuyman risqanchis? Chaykunamantan kay yachachikuypi yachasunchis. Ñaupaqtan ichaqa yachasun imaraykus ajllasqa cristianokuna Jesuspa wañupusqanta yuyarinapaq juñunakuyman rinkupuni chayta.

4. ¿Imaraykun ajllasqa cristianokunalla Jesuspa wañusqanta yuyarinapaq juñunakuypi t’antatapas mijunku vinotapas ujanku?

⁴ Ajllasqa cristianokunaqa chay juñunakuymanmi rinkupuni t’antatapas mijunankupaq vinotapas ujanankupaq. ¿Imaraykun paykunalla t’antatapas mijunku vinotapas ujanku? Jesusqa pascua fiesta tukuytan chunka jujniyoq apostolninkunawan juj cenata ruwaran. Chaypin Jesusqa apostolninkunaman t’antatapas vinotapas jaywaran, jinaspa paykunata niran mijunankupaq ujanankupaq. Chay qhepamantaq paykunawan ruwaran juj mosoq rimanakuyta, Diospa gobiernonpi kamachikunankupaq rimanakuytawan (Luc. 22:19, 20, 28-30). * Chay rimanakuyta ruwasqanraykun Jesuspa chunka jujniyoq apostolninkunapas wakin ajllasqa cristianokunapas reykuna sacerdotekuna janaq pachapi kayta atinku (Apo. 5:10; 14:1). Apostolninkunawan Jesuspa rimanakusqanqa kay tiempopi ajllasqa cristianokunapaqwanmi. Chayraykun ajllasqa cristianokunaqa Jesuspa wañupusqanta yuyarinapaq juñunakuypi t’antatapas mijunku vinotapas ujanku.

5. ¿Imaynan ajllasqa cristianokunaq vidanku kanqa janaq pachapi?

⁵ Ajllasqa cristianokunan Jesuspa wañupusqanta yuyarinapaq juñunakuyman rillankutaq janaq pachapi imaynachus vidanku kananpi yuyaymananankupaq. Jehová Diospa nisqan jina paykunaqa janaq pachapiqa mana ismuq cuerpoyoqmi kanqaku, manataqmi jayk’aqpas wañunqakuchu. Chaymantapas Jesuswan kuska 144.000 ajllasqa cristianokunawan kuskan janaq pachamanta kamachikamunqaku, jinaspapas Jehová Dioswan kuskan tiyanqaku (1 Cor. 15:51-53; 1 Juan 3:2). Chhayna kausayta chaskinankupaqmi ichaqa wañupunanku p’unchaykama Jehová Diosta tukuy sonqowan servishanallanku (2 Tim. 4:7, 8). Chayraykun paykunaqa chay juñunakuypi chaykunata yuyarispa kusisqa kanku (Tito 2:13). Waj t’aqa ovejakunarí, ¿imaraykun chay juñunakuyman rillankutaq? Chaytan kunan qhawarisunchis (Juan 10:16).

6. ¿Imaraykun waj t’aqa ovejakunapas Jesuspa wañupusqanta yuyarinapaq juñunakuyman rinku?

⁶ Waj t’aqa ovejakunaqa qhawaqllan rinku Jesuspa wañupusqanta yuyarinapaq juñunakuymanqa. Paykunaqa manan t’antatapas mijunkuchu vinotapas ujankuchu. 1938 watapin kay allpapi tiyanankupaq suyakuyniyoqkunata niranku Jesuspa wañupusqanta yuyarinapaq juñunakuypi kanankupaq. 1938 watapin abril killapaq La Torre del Vigía nisqa revistapi khaynata niran: “Allinpunin kanman waj t’aqamanta ovejakunapas chay juñunakuypi kasqankuqa. Chaypin rikunqaku imaynata chay juñunakuy ruwakusqanta, paykunapas chay p’unchayqa kusisqan kanqaku”, nispa. Chhaynapunitaqmi kanpas, waj t’aqa ovejakunaqa kusisqan chay p’unchayqa kanku.

7. ¿Imaraykun waj t’aqa ovejakunapas Jesuspa wañupusqanta yuyarinapaq juñunakuyman rillankutaq?

⁷ Waj t’aqa ovejakunapas Jesuspa wañupusqanta yuyarinapaq juñunakuyman rispan yuyaymananku imaynas vidanku paraisopi kanqa chayta. Chay juñunakuypin yachachikun imaynatas reyninchis Jesuspas 144.000 ajllasqa cristianokunapas waranqa wata kamachikunqaku chayta. Paykuna kamachikamuqtinkun kay allpaqa sumaq paraíso kapunqa, runakunapas pisi-pisimantan ch’uya kapunqaku.  Chay juñunakuypin rimakullantaq imaynatan Isaías 35:5, 6; 65:21-23 jinallataq Apocalipsis 21:3, 4 textopi nisqan junt’akunqa chayta. Chaykunapi piensaspan waj t’aqa ovejakunaqa kusisqa kanku, chaymi paykunataqa kallpachan Jehová Diosta ama pisipaspa servishanallankupaq (Mat. 24:13; Gál. 6:9).

8. ¿Imaraykun waj t’aqa ovejakuna rillankutaq Jesuspa wañupusqanta yuyarinapaq juñunakuyman?

⁸ Waj t’aqa ovejakunan Jesuspa wañupusqanta yuyarinapaq juñunakuyman rillankutaq ajllasqa cristianokunata munakusqankurayku, paykunata yanapayta munasqankurayku ima. Ajllasqa cristianokunapas kay pachapi tiyanankupaq suyakuyniyoq cristianokunapas juj nisqallan kausanku, chaytan Bibliapas willaranña.

9. Zacarías 8:23 nisqan jina, ¿imatan ruwanku waj t’aqa ovejakuna?

⁹ (Leey Zacarías 8:23). Chay textopin rimashan juj Judío runamanta, chay Judío runaqa ajllasqa cristianokunan (Rom. 2:28, 29). Imaymana rimaykunamanta chunka runakunataq waj t’aqa ovejakuna. Chaypi nisqan jina paykunan juj Judío runamanta otaq ajllasqa cristianokunamanta qaqata jap’ipakunku. Chaywanmi rikuchinku ajllasqa cristianokunata tukuy sonqowan yanapasqankuta, paykunawan kuska Jehová Diostapas yupaychasqankuta. Chayraykun kay pachapi tiyanankupaq suyakuyniyoq cristianokunaqa Jesuspa wañupusqanta yuyarinapaq juñunakuypi ajllasqa cristianokunawan kuska juñunakunku.

10. ¿Imaynatan Jehová Dios junt’ashan Ezequiel 37:15-19, 24, 25 textokunapi profeciaq nisqanta?

¹⁰ (Leey Ezequiel 37:15-19, 24, 25). Chay profeciapin rimashan iskay k’aspimanta. Juj kaq k’aspipin qelqasqa karan: “Judá suyu”, nispa. Paykunan kanku janaq pachapi tiyanankupaq suyakuyniyoq ajllasqa cristianokuna. Juj kaq k’aspipitaq niran: “Efraín suyu”, nispa. Paykunan kanku kay allpapi tiyanankupaq suyakuyniyoq cristianokuna. * Profeciaq nisqanman jinaqa chay iskay k’aspikunan juj k’aspillapas kankuman jina juntasqa kananku karan. ¿Imaynatan chay profecía junt’akushan? Janaq pachapi tiyanankupaq suyakuyniyoq ajllasqa cristianokunapas kay allpapi tiyanankupaq suyakuyniyoq ajllasqa cristianokunapas juj nisqallan Jehová Diosta servinku, paykunaq reyninkutaqmi señorninchis Jesucristo. Chaymi sapa watan kuska juñukunku señorninchis Jesucristoq wañupusqan p’unchayta yuyarinankupaq, manataqmi iskay t’aqapichu juñukunku. Chhaynapin paykunaqa ‘juj t’aqalla kanku juj michiqnillayoqtaq kankupas’ (Juan 10:16).

11. Mateo 25:31-36, 40 nisqan jina, ¿imapin waj t’aqa ovejakuna astawanqa yanapanku ajllasqa cristianokunata?

¹¹ (Leey Mateo 25:31-36, 40). Chay textopin rimashan ovejakunamanta. Chay ovejakunan kanku kay allpapi tiyanankupaq suyakuyniyoqkuna. Paykunan kay allpapi kashaq ajllasqa cristianokunata tukuy sonqomanta yanapanku, astawanqa yanapanku Diospa siminta willaypi yachachiypi iman (Mat. 24:14; 28:19, 20).

12, 13. ¿Imakunata ruwaspan waj t’aqa ovejakuna ajllasqa cristianokunata yanapallankutaq?

¹² Chaymantapas waj t’aqa ovejakunaqa sapa watanmi ajllasqa cristianokunata yanapanku. ¿Imaynata? Waj t’aqa ovejakunaqa señorninchis Jesucristo wañupusqan p’unchayta yuyarinapaq juñunakuymanmi llapa runakunata invitamunku (qhaway “ ¿Imakunatan ruwawaq Jesuspa wañupusqan p’unchayta yuyarinaykipaq?” nisqata). Waj t’aqa ovejakunaqa sapa watanmi Jesuspa wañupusqanta yuyarinapaq  juñunakuyta ruwanku, manaña iñiq t’aqankupi ajllasqa cristianokuna kanchu chaypas. Chhaynapin Cristoq wayqenkunata otaq ajllasqa cristianokunata kusisqa yanapanku. Chayta ruwaspaqa Jesustapas yanapashankuman jinan (Mat. 25:37-40).

¹³ Janaq pachapi tiyananchispaqña kay pachapi tiyananchispaqña suyakuyniyoq kanchis chaypas, ¿imaraykun llapallanchis Jesuspa wañupusqanta yuyarinapaq juñunakuyman rinanchispuni?

14. ¿Imatan Jehová Diospas Jesuspas ruwaranku munakuwasqanchirayku?

¹⁴ Jehová Diospas Jesuspas munakuwasqanchismanta agradecido kasqanchisraykun. Jehová Diosmi llapa runakunata munakuwasqanchisrayku churin Jesusta kay pachaman kachamuran ñak’arispa noqanchisrayku wañunanpaq (Juan 3:16). Jesuspas munakuwasqanchisraykun vidanta noqanchisrayku qoran (Juan 15:13). Chaykunata noqanchisrayku ruwasqankumantaqa manan imawanpas kutichipuyta atisunmanchu. Ichaqa sichus Jehová Diospa munasqanman jina kausasunchis chayqa paykuna munakusqanchistan rikuchisunchis (Col. 3:15). Jesuspa wañupusqanta yuyarinapaq juñunakuyman rispaqa Jehová Diostapas Jesustapas agradecekusqanchistan rikuchishanchis.

15. ¿Imamantan anchata agradecekunku ajllasqa cristianokunapas waj t’aqa ovejakunapas?

¹⁵ Jesús noqanchisrayku wañusqanmanta agradecido kasqanchisraykun (Mat. 20:28). Ajllasqa cristianokunaqa Jesuspa wañusqanpin iñinku, chayraykun Jehová Diosqa chaninpaq paykunata qhawaripun, wawankunata jinataq adoptapun (Rom. 5:1; 8:15-17, 23). Waj t’aqa ovejakunapas Jesuspi iñisqankuraykun Jehová Diosta serviyta atinku, bendicionninta chaskiyta atinku, manchay ñak’ariytapas kausashaqlla pasanqaku (Apo. 7:13-15). Chaykunamanta agradecido kasqanchisraykun señorninchis Jesucristoq wañupusqanta yuyarinapaq juñunakuymanqa rinanchispuni.

16. ¿Imaraykun Jesuspa wañupusqanta yuyarinapaq juñunakuyman llapanchispas rinanchispuni?

¹⁶ Jesuspa kamachiwasqanchista kasukusqanchisraykun. Manaraq wañupushaspan Jesusqa llapanchista kamachiwarachis wañupusqan p’unchayta yuyarinanchispaq. Chaymi payqa niran: “Kaytaqa ruwallankichispunin noqata yuyariwanaykichispaq”, nispa (1 Cor. 11:23, 24).

17. ¿Imaynatan Jesuspa wañupusqanta yuyarinapaq juñunakuyman riy astawan Jehová Diosman achhuykachiwanchis?

¹⁷ Jehová Diosmanmi achhuykachiwanchis (Sant. 4:8). Jesuspa wañupusqanta yuyarinapaq juñunakuyman rispaqa reparanchismi Jehová Dios mayta munakuwasqanchista, paraisopi tiyaypas may sumaq kananta (Jer. 29:11; 1 Juan 4:8-10). Jehová Diosqa munakuwasqanchisraykun llapa prometewasqanchista junt’anqa. Chaykunapi piensaspan Jehová Diostaqa astawanraq munakunchis, aswan jujllachasqataq paywanqa kanchis (Rom. 8:38, 39).

18. ¿Imapin yanapawanchis Jesuspa ejemplonpi piensay?

¹⁸ Jesuspa ejemplonta qatikunanchispaqmi kallpachawanchis (1 Ped. 2:21). Jesuspa wañupusqanta yuyarinapaq juñunakuy manaraq chayamushaqtinqa ñan leeshananchisña imakunatas Jesús ruwaran manaraq wañupusqan p’unchay chayamushaqtin chayta, imaynatas  wañuran, imaynatas kausarimpuran chaytapas. Juñunakuy chayamuqtintaq chay tuta yuyarinchis mayta Jesús llapanchistapas munakuwasqanchista (Efes. 5:2; 1 Juan 3:16). Chaykunata leespa yuyaymanasqanchismi llapanchistapas kallpachawanchis Jesús jina kausananchispaq (1 Juan 2:6).

19. ¿Imatan ruwananchis Jehová Diospa munakuyninpi kashanallanchispaq?

¹⁹ Diospa munakuynillanpi kashananchispaqmi kallpachawanchis (Jud. 20, 21). Jehová Diospa munakuynillanpi kashananchispaqqa Jehová Diostan kasukunanchis, sutinta ch’uyanchananchis, sonqontapas kusichinanchis (Prov. 27:11; Mat. 6:9; 1 Juan 5:3). Chayta ruwananchispaqmi kallpachawanchis Jesuspa wañupusqanta yuyarinapaq juñunakuyman riy. Chay juñunakuymanta lloqsimuspaqa Jehová Diostan ninchis: “Noqaqa wiñaypaqmi amigoyki kayta munani”, nispa.

20. ¿Imaraykun Jesuspa wañupusqanta yuyarinapaq juñunakuyman rinanchispuni?

²⁰ Janaq pachapi tiyananchispaqña otaq kay pachapi tiyananchispaqña suyakuyniyoq kanchis chaypas Jesuspa wañupusqanta yuyarinapaq juñunakuymanqa sapa watanmi rinchis. Chaypin yuyarinchis munakusqanchis señorninchis Jesucristota, kaqllataqmi yuyarinchis Jehová Dios mayta munakuwasqanchista. Chayraykun payqa juchamanta kacharichiwananchispaq wawan Jesusta noqanchisrayku qowaranchis. Kay 2022 watapin Jesuspa wañupusqanta yuyarisunchis viernes 15 abril p’unchayta. Chay juñunakuymanqa imaña kaqtinpas rinanchispunin Jehová Diostapas Jesustapas munakusqanchisrayku.