¿Kutichiwaqchu 2019 wata Qhawaq revistapi lloqsimuq yachachikuykunamanta tapuykunata?

¿Imatan Dios nisharan: “Manan ima armapas imanasunkipaschu”, nisqanwan? (Is. 54:17.)

Imaynan perqaqa sinchi wayramanta jark’awanchis, chhaynatan Diospas enemigonchiskunamanta jark’awanchis (Is. 25:4, 5). Enemigonchiskuna imataña ruwawasunman chaypas, manan wiñaypaqchu kanqa (w19.01, paginakunataq 6, 7).

¿Imaynatan Jehová Dios chanin kasqanta rikuchiran Canaán runakunata mana kasukuq israelitakunatapas trataspa?

Jehová Diosmi castigaran millay jucha ruwaqkunata, warmikunata wawakunata sufrichiqkunatapas. Ichaqa chanin kaqta ruwaqkunata kasukuqkunatapas bendeciranmi (w19.02, paginakunataq 22, 23).

¿Amén ninanchischu pipas mana Testigo kashaspa Diosmanta mañakuqtin?

Chhaynapi tarikuspaqa respetowanmi ch’inlla kananchis. Sichus makinkuta jap’inakuspanku mañakunkuman chayqa, manan chayta ruwananchischu, mañakuyta tukuqtinkupas manan “amén” ninanchischu. Yaqapaschá chay ratopi sonqollanchispi mañakusunman (w19.03, paginataq 31).

¿Imaraykun millay jucha wawakunata violay?

Wawakunata violaqkunaqa wawa contran juchallikunku, juchallikullankutaqmi iñiq t’aqa contra, Dios contra, autoridadkuna contrapas. Wakin nacionkunapiqa kanmi leykuna wawakunata violaq runakunata denuncianankupaq, chaytan umalliqkunaqa kasukunanku (w19.05, paginakunataq 9, 10).

¿Imakunan yanapawasunman mana allin piensaykunata cambiananchispaq?

Kinsa ruwaykunatan ruwananchis: Diosmantan mañakunanchis, yachasqanchispi piensananchis umanchismanta mana allin piensaykunata orqonanchispaq, allin amigokunatataq ajllakunanchis (w19.06, paginataq 11).

¿Imatan ruwana qatikachayta aguantanapaq?

Jehová Dioswan amigontin kananchis, manan jayk’aqpas iskayananchischu munakuwasqanchismanta, sapa p’unchay Bibliata leenanchis, mañakunanchistaq. Manan iskayananchischu Diospa gobiernon bendicionkuna apamunanmanta, jinallataq umanchispi textokunata jap’inanchis Diosta jatunchanapaq takikunatawan (w19.07, paginakunataq 2-4).

¿Imatan ruwananchis familianchiskunata yanapanapaq?

Yanapasunmanmi rimasqanchiswan ruwasqanchiswanpas, jinaspapas imayna sientekusqankuta entiendenanchis, paykunawantaq pacienciakunanchis llamp’u sonqo ima kananchis (w19.08, paginakunataq 15-17).

Mateo 11:28 textopi nisqan jina, ¿imaynatan Jesús samaykachiwanchis?

Munakuq umalliqkunawan pusariwanchis, allin runakunawanmi llank’anchis, sumaq llank’anapitaq yanapakunchis (w19.09, paginataq 9).

¿Imaynatan Dios munayninta ruwanaykipaq kallpachasunki atiynintapas qosunki? (Filip. 2:13).

Bibliata leespa leesqanchispi piensaspan Diosqa atiyninta qowanchis munayninta ruwananchispaq. Santo espiritunwanmi yanapawanchis imatapas allinta ruwananchispaq (w19.10, paginataq 21).

¿Imaynatan allinta imatapas decidisunman?

Diosmantan mañakunanchis yachayta, qelqanchiskunatan leenanchis, allinta qhawarinanchis imaraykuchus imatapas decidisqanchista, imachus ruwananchista qelqananchis, atisqanchisman jinataq ruwananchis (w19.11, paginakunataq 27-29).

¿Yachachisharanchu Satanás Evata mana wañuq almayoq kananmanta?

Manachus jina. Satanasqa manan Evata niranchu: “Cuerpollaykin wañunqa, espirituykitaq kausashallanqa”, nispaqa. Aswanmi niran: “Manapunin wañunkichu”, nispa. Jatun parapin pantasqa religionqa chinkapuran. Chhaynaqa mana wañuq almamanta yachachikuyqa jatun para pasasqan qhepamanmi rijuriran. Babelpi Jehová Dios runakunaq rimayninta pantachiqtinqa ñan yachachikuyqa rijurinmanña karan (w19.12, paginataq 15).