1. ¿Imaraykun nisunman “mana jayk’aq kausasqanchis tiempopin kausashanchis” nispa?

MANA jayk’aq kausasqanchis tiempopin kausashanchis. Bibliaq nisqan jina Jehová Diosmi “lliu nacionkunamanta, lliu ayllukunamanta, lliu llaqtakunamanta, lliu rimaykunamantawan” askha runakunata juñushan. Paykunaqa ñan pusaq millón masña kashanku. May kusisqataqmi ‘adorana wasipi tuta-p’unchay Diosta servishanku’ (Apo. 7:9, 15; Is. 60:22). Paykunaqa Diosta runamasinkuta iman tukuy sonqo munakunku.

2. ¿Imaynan kananku karan Diosta mana serviq runakuna? (Kay paginapi fotota qhaway.)

² Bibliaqa willallarantaqmi kay tiempopi runakuna imayna kanankuta. Diosta mana serviq runakunaqa egoistakuna paykunallapi piensaqkuna iman kananku karan. Arí, apóstol Pabloq willasqan jina kay ‘tukukuy p’unchaykunapi’ runakunaqa ‘paykuna kikinkuta munakuqkuna’ “qolqe sonqokuna” ‘Diosta munakunankumantaqa aycha kusichiyllapi  puriyta munaqkuna’ iman kananku karan (2 Tim. 3:1-4). Chhayna clase runakunaqa manan imaraykupas Diosta munakunkuchu chaymi mana kusisqachu kausanku, aswanpas sasachakuyllapin kausanku.

3. ¿Imatan kay estudiopi yachasun? ¿Imarayku?

³ Pabloqa willaranñan kay tiempopi runakunaqa egoistakuna kanankuta. Chaymi cristianokunata kallpacharan chay runakunamanta cuidakunankupaq (2 Tim. 3:5). Ichaqa, ¿imaynatan millay runakunamanta cuidakusunman? ¿Imatan ruwasunman Diosllata munakunanchispaq? Chayta yachanapaqmi kay estudiopi yachasun imaynas kanku Diosta munakuq runakuna chayta; imaynas kanku 2 Timoteo 3:2-4 textoq nisqanman jina kausaq runakuna chaytawan. Chayta yachaymi yanapawasun imaynachus kashanchis chayta allinta qhawarikunanchispaq.

4. ¿Imaraykun nisunman “manan juchachu noqanchis kikinchista munakuyqa” nispa?

⁴ Apóstol Pabloq nisqan jina ‘runakunaqa paykuna kikinkuta munakuqkunan’ kananku karan. Ichaqa, ¿juchachu noqanchis kikinchista munakuy? Manan. Chaypaqmi Jehová Diospas kamawasqanchis. Jesuspas niranmi: “Runamasiykitan munakunki qan kikiykita jina”, nispa (Mar. 12:31). Manachus noqanchis kikinchista munakusunman chayqa, ¿imaynatataq jujkunatari munakusunman? Chaymantapas Bibliapin nin: “Qosakunapas kikin cuerponkuta jinan esposankuta munakunanku. Esposanta munakuq runaqa pay kikintan munakun. Manan pipas cuerpontaqa jayk’aqpas cheqnikunmanchu, aswanpas sumaqtan mijuchin, munakuywantaqmi uywanpas”, nispa (Efes. 5:28, 29). Chhaynaqa allinmi noqanchis kikinchista munakuyqa.

5. ¿Imaynan kanku paykuna kikinkuta nishuta munakuq runakuna?

⁵ Kikinchis munakuymanta 2 Timoteo 3:2 textopi Pabloq willasqanmi ichaqa mana allinchu. ¿Imarayku? Chaypiqa rimashan egoista runakunamantan. Chay runakunaqa paykuna kikinkutan aswan allinpaq qhawarikunku (leey Romanos 12:3). Chaymantapas chay runakunaqa paykunallapin piensanku, manan jujkunataqa ni reparankupaschu. Imapi pantaspapas jujkunamanmi tumpanku. Chhayna runakunaqqa yanqallan kusikuyninkupas.

6. ¿Imaynan kanku Diosta munakuqkuna?

⁶ Apóstol Pabloqa paykuna kikinkuta munakuq runakunamantan ñaupaqta rimaran. ¿Imarayku? Estudioso runakunaq nisqan jina, paykuna kikinkuta munakuq runakunaq sonqonpiqa mana allinkunallan kashan. Diosta munakuq runakunan ichaqa mana chhaynachu kanku. Aswanmi paykunaqa kusikuyta, thaj kausayta, pacienciakuyta, sumaq sonqo kayta, allin sonqo kayta, iñiyta, llamp’u sonqo kayta, cuerpo kamachiq kayta ima vidankupi rikuchinku (Gál. 5:22, 23). Salmo takita qelqaqpas niranmi: “¡Kusisamiyoqmi Señor Diosniyoq llaqtaqa!”, nispa (Sal. 144:15). Diosninchisqa kusisqa Diosmi, chaymi noqanchispas kusisqa kausanchis. Kusikuywanmi jujkunatapas yanapanchis (Hech. 20:35). Paykuna kikinkuta munakuq runakunan  ichaqa paykunallapi piensanku, manataqmi kusisqachu kanku.

7. ¿Imakunatan tapukunanchis imaynachus Diosta munakuyninchis kashan chayta yachanapaq?

⁷ Pitan astawan munakushanchis, ¿Diostachu icha noqanchis kikinchistachu? Chayta yachanapaq Filipenses 2:3, 4 textopi piensasun, chaypin nin: “Ama imatapas ruwaychischu cheqnipakuspaqa, imapas kawaqchis jinaraq piensakuspapas; aswanpas k’umuykuywan jujkunata qankunamanta aswan allinpaq qhawariychis. Amataq munaynillaykichistaqa maskhaychischu, aswanpas jujkunaq munaynintawan maskhaychis”, nispa. Chaymi tapukunanchis: “¿Chay textoq nisqanman jinachu kausashani? ¿Diospa munaynintachu ruwashani? ¿Yanapashanichu iñiqmasikunata juñunakuypi predicacionpipas?”, nispa. Jujkunata yanapayqa manan facilchu chaywanpas kallpachakunanchismi, chhaynapin kamaqninchispa sonqonta kusichisun.

8. ¿Imatan iñiqmasinchiskuna ruwashanku Diosta munakusqankurayku?

⁸ Askha iñiqmasikunan qolqe maskhaypi kanankutaqa tukuy tiemponkuwan Diosta servishanku, chhaynapin rikuchishanku Diosta munakusqankuta. Chaytan Ericka hermanapas ruwashan. Payqa doctoran ichaqa manan profesionninmanchu qokun. Aswanpas qosanwan kuskan payqa precursora regular jina askha nacionkunapiña Diosta servishan. Paymi willakun: “Munaymi juj nacionkunapi Diosta serviyqa; askhañan amigoykupas kashan. Manan kay vidataqa imawanpas cambiaykumanchu. Doctora jinaña llank’ashani chaypas manan chaymanchu tukuy tiempoyta qoni, aswanmi runakuna Diosta  reqsinankupaq yanapayman. Imaymanapin yanapakushani iñiq t’aqapipas”, nispa.

9. ¿Imaraykun qolqe sonqo runakuna mana kusisqachu kausanku?

⁹ Pabloqa rimallarantaqmi ‘qolqe sonqo’ runakunamantapas. Kay tiempopiqa yaqa llapa runakunan qolqe sonqokuna kanku. Chaypaq yachasun Irlanda ladopi imachus pasaran chayta. Juj hermanos juj runata Diosmanta rimapayasqa, chay runas ichaqa billeteranmanta qolqeta orqomuspa nisqa “¡kaymi diosniyqa!” nispa. Chay runa jinan yaqa llapa runakunapas piensanku. Qolqetan paykunaqa munakunku imamantapas mastaraq. Biblian ichaqa nin: “Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan”, nispa (Ecl. 5:10). Chaypi nisqan jina pipas qolqeta munakuqqa kanqaña qolqen chaypas astawanraqmi munanqa, chhaynapitaq ‘imaymana nanaykunawan k’irikunqa’ (1 Tim. 6:9, 10).

10. ¿Ima niranmi Agur qhapaq kaymanta wajcha kaymantapas?

¹⁰ Bibliaq nisqan jina qolqeqa runatan waqaychan (Ecl. 7:12). Ichaqa ¿atisunmanchu pisi qolqellawan kusisqa kausayta? Arí, atisunmanmi (leey Eclesiastés 5:12). Juj kutinmi Jaquepa wawan Agur, Diosta niran: “Ama wajchayachiwaypaschu qhapaqyachiwaypaschu, sapa p’unchay mijunallayta qoykuway”, nispa. Chaypi nisqan jina, chay runaqa manan munaranchu wajchayayta chhaynapi suwakuspa Diospa sutinta mana sarunchananpaq. Ichaqa, ¿imaraykutaq mana munaranchu qhapaq kaytari? Pay kikinmi niran: “Paqtan askhallaña kaqniyoq kaspa negapuykiman, jinaspa niyman: ¿Pitaq Señor Diosri?”, nispa (Prov. 30:8, 9). Yaqapaschá jayk’aqllapas reqsiranki Diospi confiananmantaqa qolqellapi confiaq runata.

11. ¿Ima niranmi Jesús qolqemanta?

¹¹ Qolqe sonqo runakunaqa manan atinkumanchu Dios serviyta. Jesuspunin niran: “Manan pipas iskay patrontaqa serviyta atinmanchu, jujnintan cheqnikunman jujnintataq munakunman, [...] Manan qankunaqa Diostawan qhapaq kaytawanqa serviyta atiwaqchischu”, nispa. Payqa nillarantaqmi: “Amaña kay pachapiqa qhapaq kaykunata juñuychischu, chaykunaqa ismupuqllan, thutapas thutanmi, suwakunapas suwakunmi. Aswanpas janaq pachapi qhapaq kaykunataqa juñuychis, chaypiqa manan imapas ismuchinqachu, manan thutapas kanchu thutananpaq, manataqmi suwakunapas kanchu”, nispa (Mat. 6:19, 20, 24).

12. Mana afanasqa kausasun chayqa, ¿imata ruwananchispaqmi tiemponchis kanqa? Juj ejemplota willay.

¹² Diosta serviqkunaqa yaqa llapankun mana afanasqachu kausanku. Aswanmi paykunaqa Diosta serviyman masta tiempota qoshanku; chaywanmi kusisqa kausashanku. Yachasun Estados Unidospi Jack sutiyoq hermanomanta. Payqa wasinta vendespa negocionta vendespa iman precursor kapuran. Paymi nin: “Manan facilchu karan wasiyta vendeyqa allpayta vendeypas. Manaraq chaykunata vendeshaspaqa  llank’anapi imaymana problemakuna kasqanwanmi llakisqalla wasiman chayamuq kani. Esposaymi ichaqa kusisqalla kaq, payqa precursoran karan. Paymi niwaq: ‘Noqaq jefeyqa allin jefen’, nispa. Kunanqa noqapas precursormi kani. Iskayniykun llank’ashayku Jehová Diospaq”, nispa.

13. ¿Imatan ruwasunman imapichus masta confiashanchis chayta yachananchispaq?

¹³ Maypin sonqonchis kashan, ¿Diospichu icha qolqepichu? Chayta yachanapaqqa yaqapaschá sapankanchis tapukusunman: “¿Bibliaq nisqanman jinachu qolqeta qhawarini? ¿Qolqe maskhayllapichu yuyayniy kashan? ¿Imaymanakunayoq kaypichu masta piensani icha Dioswan allinpi kaypichu? ¿Confianichu ima necesitasqaytapas Diospa qowananpi?”, nispa. Yachasqanchis jina Diospi tukuy sonqo confiasun chayqa manan jayk’aqpas saqewasunchu (Mat. 6:33).

14. ¿Juchachu juj chikanta kusirikuy? ¿Imarayku?

¹⁴ Kay tukukuy tiempokunapiqa kananmi karan ‘aycha kusichiyllapi puriyta munaq runakunapas’. Ichaqa kaypi yachasqanchis jina manan juchachu noqanchista munakuypas, qolqeyoq kaypas. Kaqllataqmi kusirikuywanpas, manan juchachu juj chikanta kusirikuyqa. Wakinña ninku “manan chayqa allinchu” nispa chaypas, manan Diosqa chhaynatachu piensan. Bibliapipunin Diosta serviqkunata nin: “Phaway, t’antaykita kusisqa mijuykamuy, kusisqallataq vinoykitapas ujakamuy”, nispa (Ecl. 9:7).

15. ¿Imaynan kanku aycha kusichiyllapi puriq runakuna?

¹⁵ Ichaqa 2 Timoteo 3:4 textopi aychanku kusichiypi puriyta munaq runakunamanta rimaspaqa Diosta qonqapuq runakunamantan rimashan. Chay runakunaqa “Diosta munakunankumantaqa” aycha kusichiyllapin puriyta munanku. Chaymanta rimashaspan Bibliamanta yachaq runa niran: “Chay textopiqa rimashan Diosta mana munakuq runakunamantan. Paykunaqa manan chhikantapas Diosta munakunkuchu”, nispa. Aycha kusichiypi puriytachus munapayasunman chayqa Diostan qonqapusunman. Bibliaq nisqan jina aycha kusichiypi puriyta munaqkunaqa, kay kausaypi kusirikuykunawanmi p’ampasqa kanku (Luc. 8:14).

16, 17. ¿Imaynatan Jesús kusirikuykunata qhawariq?

¹⁶ Jesusqa allin yuyaywanmi qhawariq kusirikuykunata. Payqa riranmi ‘casarakuy fiestaman’ juj ‘jatun mijuymanpas’ (Juan 2:1-10; Luc. 5:29). Casarakuy fiestapi vino tukukuqtinpas unutan vinoman tukuchiran. Chaymantapas juj kutinmi runakunaqa mana allinta rimaranku Jesuspa vino tomasqanmanta mijusqanmantawan. Jesuspa nisqan jina chay runakunaqa mana yuyayniyoqkuna jinan chayta rimasharanku (Luc. 7:33-36).

¹⁷ Chaywanpas Jesusqa manan fiestan-fiestanchu puriq, aswanmi Diospa  munaynin ruwayta ñaupaqman churaran. Tukuy atisqantan payqa ruwaran runakunata yanapananpaq. Manan manchakuranchu runakuna salvasqa kananpaq wañuytapas. Chaymi qatikuqninkunatapas niran: “Kusisqa kaychis noqarayku runakuna k’amisuqtiykichis, qatikachasuqtiykichis, llullakuspa tukuy mana allin kaqta contraykichispi rimaqtinkupas. Anchatapuni kusikuychis, janaq pachapi premioykichisqa jatunmi, chhaynatapunin profetakunatapas ñaupa tiempopiqa qatikacharanku”, nispa (Mat. 5:11, 12).

18. ¿Imakunatan tapukusunman ima ruwaysi masta gustawanchis chayta yachananchispaq?

¹⁸ Maypin sonqonchis kashan, ¿Diospa munayninta ruwaypichu icha kusirikuykunapichu? Chaypaqqa sapankanchismi tapukunanchis: “Iman masta gustawan, ¿juñunakuykunaman riychu icha kusirikuykunachu? ¿Predicacionman riychu icha televisionta qhawaychu? ¿Faciltachu ima gustoytapas saqeni Diospa munayninta ñaupaqta ruwanaypaq? Imapiña kusirikuyta munashani chaypas, ¿Jehová Diospa gustonman jinachu chaykunata ajllakuni?”, nispa. Jehová Diostachus tukuy sonqo munakusun chayqa, ayqekusunmi paypa cheqnisqan ruwaykunamanta (leey Mateo 22:37, 38).

19. ¿Imayna runakunan mana jayk’aqpas cheqaq kusikuyta tarinqakuchu?

¹⁹ Satanasqa yaqa soqta waranqa watañan runakunata sufrichishan. Kay tukukuy tiempokunapiqa yaqa llapa runapas paykunapi, qolqepi, aycha kusirichiypi imallan masta piensanku. Chaymantapas chay runakunaqa gustollankumanmi imatapas ruwanku. Paykunaqa manan jayk’aqpas cheqaq kusikuytaqa tarinqakuchu ¿Imarayku? Biblian nin: “Kusisamiyoqmi Jacobpa Diosninpa yanapaykusqan runaqa, kusisamiyoqmi Diosnin Señor Diospi suyakuq runaqa”, nispa (Sal. 146:5).

20. ¿Kusichisunkichu Diosta munakuy? ¿Imarayku?

²⁰ Watakunaq pasasqanman jinaqa astawanraqchá Diosta munakuyninchisqa yapakunqa. Juj runakunapas askhañan payta reqsishanku. Chaykunan rikuchin Diospa gobiernonqa imaymanakunataña ruwashasqanta. Qhepamanqa aswan askha bendicionkunatan apamuwasunchis. Diospa munaynin ruwaypi ocupasqa kasun chayqa kusisqan kausasunchis. Qatimuq estudiopin yachasun imaynas paykunallapi piensaq runakuna kanku chayta, imaynas Jehová Diosta serviq runakuna kanku chaytawan.