1, 2. ¿Imata ruwaspan Diosta serviqkunaqa kusisqa kausanchis? (Santiago 1:​22-25).

 JEHOVÁ Diospas Jesuspas kusisqa kausananchistan munanku. Chaymanta rimaspan Salmos 119:2 textopi nishan: “May kusisqan yuyarichiyniykikunaman jina puriqkunaqa, tukuy sonqowan payta maskhaqkunaqa”, nispa. Jesuspas nirqanmi: “Diospa siminta uyarispa waqaychaqkunaqa [kasukuqkunaqa] kusisqan kanku”, nispa (Luc. 11:28).

² Jehová Diosta serviqkunaqa kusisqan kausanchis ¿riki? ¿Imakunataq razón kashan kusisqa kausananchispaq? Imaymanan chaypaqqa razón kan. Diospa siminta sapa p’unchay leeypas kusikunapaqmi. Chaypi yachasqanchisman jina kausaypas may kusikuytan apamuwanchis (leey Santiago 1:​22-25).

3. ¿Imakunapin allin Diospa siminman jina kausay?

³ Ichaqa, ¿imakunapitaq allin Diospa siminman jina kausayri? Ñaupaqtaqa paytan kusichinchis. Noqanchispas kusisqan kanchis Diosta kusichispaqa ¿riki? (Ecl. 12:13). Chaymantapas pipas Diospa siminman jina kausaqqa munaytan familian ukhupipas kausan, allintan apanakun hermanokunawanpas. Qanpas allintachá chaytaqa repararqanki. Chaymantapas pipas Diospa siminman jina kausaqqa imaymana llakimanta sasachakuymanta iman ayqen. Jehová Diospa kamachikuyninkunamanta leyninkunamanta rimashaspan Davidpas juj takipi nirqan: “Pipas [chaykunata] kasukuqqa jatun premiotan chaskikun”, nispa (Sal. 19:​7-11).

4. ¿Imaraykun mana facilchu Diospa siminman jina kausay?

 ⁴ Diospa siminman jina kausanapaqqa chaytan allinta leena estudiana ima. Allintan entiendena imatas Jehová Dios munan chaytapas. Ichaqa imaymanataq ruwananchis kan chayqa mayninqa manan facilchu chaykunata ruwayqa. Chaymi kaypi kashan imaymana yanapaykuna. Kaypin yachasun imatas ruwananchis Bibliata sapa p’unchay leenanchispaq chayta. Yachasunmi imatas ruwana leesqanchispi piensanapaq chaytapas, imatas ruwana yachasqanchisman jina kausanapaq chaytapas.

TIEMPOTA T’AQAY DIOSPA SIMIN QELQATA LEENAYKIPAQ

5. ¿Ima ruwaykunapin ocupasqa kashanchis?

⁵ Diosta serviqkunaqa llapanchispas imaymana ruwaykunapin ocupasqa kashanchis. Llapanchismi llank’ananchis familianchista uywananchispaq (1 Tim. 5:8). Wakin hermanokunaqa onqosqa familiankuta kuraq familiankutan cuidashanku. Llapanchismi imaymanata ruwananchis noqanchis kikinchista cuidakunanchispaqpas. Diospa llaqtanpipas imaymanan ruwananchis kashan. Chaymantapas Diosmanta willay jatun llank’aytan aparinanchis kashan. Chaykunataq ruwana kashan chayqa, yaqapaschá tapukuwaq: “¿Imay ratutaq Bibliatari leesaq? ¿Imay ratun chaypi yuyaymanasaq, chaypi yachasqaytapas ruwasaq?”, nispa.

6. ¿Imatan ruwawaq Bibliata mana p’itiyta leenaykipaq? (Qhaway kay parrafopaq fotota).

⁶ Jesusta qatikuqkunapaqqa Bibliata leeymi ima ruwaymantapas aswan allinqa. Chhaynataq chayqa, t’aqananchismi tiempota chayta ruwananchispaq (Filip. 1:10). Salmos libropin qallariy capitulopi willashan imatas ruwana kusisqa kausanapaq chayta. Chaypin nin: “Payqa Jehová Diospa kamachikuyninkunawanmi kusikun; tuta-p’unchaymi chaykunata leen, chaykunapin piensan”, nispa (Sal. 1:​1, 2). Chhaynaqa, allinta kausanapaqqa t’aqanapunin tiempota Diospa siminta leenapaq. Ichaqa, ¿ima ratun chayta leena? Chayqa sapankamantan. Sapankan reparakunan ima ratus allin yuyaywan leenman chayta. Víctor  sutiyoq hermanon nin: “Noqaqa tutamantankunan Bibliataqa leeni. Chay horasmi gustawan leey. Chay ratukunaqa allinmi yuyayniy kashan, allintan imatapas entiendeni. Chaymantapas chay ratukunaqa manan nishuchu bullapas”, nispa. ¿Víctor jinachu personaykipas piensanki? Tapukuy: “Noqapaqrí, ¿ima ratutaq allin kanman Bibliata leey?”, nispa.

IMACHUS LEESQAYKIPI ALLINTA PIENSAY

7, 8. ¿Imaraykun mana allinchu kanman Bibliata apurasqa leey? Juj ejemplota willay.

⁷ T’aqasunña tiempota Bibliata leenanchispaq chaypas manan chaytaqa leeyllachu leenanchis. Yachasqanchis jina, imatapas apurasqa leespaqa mayninqa manan chaytaqa ni yuyanchispaschu. Manan allinchu kanman Bibliawan chayta ruwayqa. Arí, allinmi sapa p’unchay Bibliata iskay kinsa capitulota leeyqa, allinmi chayta ruwanapaq kallpachakuypas (1 Cor. 9:26). Ichaqa Bibliata leeyqa qallariy ruwayllaraqmi. Biblia yanapawananchispaqqa imaymanakunatan ruwananchis.

⁸ Chayta entiendenapaq kaypi piensasun. Paraqa allinpunin plantakunapas mijuykunapas wiñananpaqqa, ichaqa sichus nishuta pararunman chayqa manan allinchu kanman. Para llamp’ullata munayllata paranman chayqa, allintan jallp’apas ch’onqanman; mijuykunapas sumaqtan wiñanman. Chhaynan Bibliata leeypas, sichus apurasqa askha-askhata leesunman chayqa, manan entiendesunmanchu ni yuyasunmanpaschu. Manataq yuyasunmanchu chayqa, manan atisunmanchu chayman jina imayna kausaytapas (Sant. 1:24).

9. ¿Imatan ruwananchis Bibliata ama apuraylla leenanchispaq?

⁹ Kaypi piensay. Bibliatas leeshanki, ichaqa apurasqas chayta ruwashanki. ¿Imatan ruwawaq chayta reparakuspa? Chhikanta sayariy leesqaykipi. Susigollawan leey, piensariq jina khamuriq jina leey. Ñaupaqpi askha versiculota leeq kanki chayqa, yaqapaschá chayta pisiyachiwaq. Chay tiempotataq t’aqawaq imachus leesqaykipi piensarinaykipaq, chaypi  yuyaymananaykipaq. Soqta parrafopi rimamusqanchis hermano Victormi nillantaq: “Noqaqa manan askha versiculokunatachu leeni. Mayninqa juj capitulollatan leeni. Tutamantantaq Bibliata leeni chayqa p’unchay ch’isiyaqpas piensashallanin chay leesqaypiqa”, nispa. Astawanqa valen manan may tukuy leesqaykichu, aswanpas imatas leeshanki, imatas chaymanta yachashanki chaymi (Sal. 119:97; qhaway “ Piensanapaq tapuykuna” nisqa willakuyta).

10. ¿Imaynatan rikuchiwaq Bibliaq nisqanman jina ruwasqaykita? Juj ejemplota willay (1 Tesalonicenses 5:​17, 18).

¹⁰ Ima ratuña Bibliata leenki chaypas kallpachakuy chaypi yachasqaykiman jina imatapas ruwanaykipaq. Chaypaqqa leeshaspan tapukunayki: “¿Imaynatan kay leesqay otaq kay yachasqay yanapawanman kay p’unchaypi, imaynatan yanapawanman jamuq p’unchaykunapipas?”, nispa. Chaypaq kaypi piensasun. Yaqapaschá 1 Tesalonicenses 5:​17, 18 textota leeshanki (leey 1 Tesalonicenses 5:​17, 18). Ichaqa, ¿imatan ruwanayki chay texto yanapanasuykipaq? Leeshaspan juj ratu sayaykunayki, jinaspa piensarinayki chay simikunapi. Yaqapaschá tapukuwaq: “¿Imatan kaymanta yachayman? ¿Sapa kutillanchu Dioswan parlani? ¿Imakunamantan Diosman graciasta qoyman?”, nispa. Chaykunapi piensaspaqa yaqapaschá Diosmanqa ima kinsa ruwaykunallamantapas graciasta qoyta munanki. Chhaynaqa, kallpachakusun Bibliata leesqanchispi piensananchispaq. Iskay kinsa minutollapas chaypi piensasun. Chayta ruwaspan Diosta allinta uyarisun, yachasqanchisman jinan imatapas ruwasun. Sapa p’unchay chayta ruwasun chayqa Diospaq sonqonpaq jinan imatapas ruwasun. Ichaqa, ¿leesqaykiman jina reparakunki imaymanakunapi allinyanayki kasqanta chayri? Chaymanta qatiqpi rimasun.

ATINALLAYKITA RUWAY

11. ¿Imaynapin mayninpi llakisqa tarikusunman Bibliata leespa? Juj ejemplota willay.

¹¹ Bibliata leespa chaypi piensanki chayqa, yaqapaschá mayninqa reparanki imakunapis allinyanayki kashan chayta, chayqa yaqapaschá llakichisunkiman. ¿Imaynapi? Chaypaq kaypi piensasun: Yaqapaschá juj p’unchay leeshanki imaynas llapatapas igualta qhawarinanchis chaymanta rimaq textokunata (Sant. 2:​1-8). Chaypi piensaspataq ninki: “Kaykunapi jaqaykunapi cambiasaq”, nispa. Chhayna piensasqaykiqa allinpunin. Chay p’unchay qhepallamanpaschá leellankitaq imaynas qallunchista watakuyqa allinpuni chaymanta rimaq textokunata (Sant. 3:​1-12). Chaypi piensaspataq ninki: “Kaytaqa Manamá allintachu rimaruni, kallpachakunaychá kanqa ama chhayna kanaypaq”, nispa. Jujkaq p’unchaymantaq leenki imaynas kay pacha runakunawan, Diosta mana serviq runakunawan mana amigota ruwanachu chayta (Sant. 4:​4-12).  Chaypi piensaspataq ninki: “Chay peliculakuna qhawayqa, chay musicakuna uyariypas manamá allinchu kashan”, nispa. Tawa kaq p’unchaypiqa yaqapaschá niwaq: “Imaymanapimá cambianay kashan, manapaschá atisaqchu”, nispa.

12. ¿Imaraykun mana llakikunanchischu imaymanakunapi cambiananchis kasqanta reparakuspa? (Willakuyta qhaway).

¹² Bibliata leeshaspa reparakunki imaymanakunapi cambianayki kasqanta chayqa, ama chaywanqa llakikuychu. Chaykunapi piensaspan qanqa rikuchishanki imaynas Bibliataqa allin yuyaywan leeshanki chayta, imaynas humilde sonqo kanki chaytapas. Chaymantapas qan kikiykiwan honrado kasqaykitan rikuchishanki. a Yachasqanchis jina mosoq runa kaywan p’achawan jina churakuyqa” manan juj ratullapichu ruwakun (Col. 3:10). ¿Iman yanapasunkiman Diospa nisqanman jina imatapas ruwanaykipaq?

13. ¿Iman yanapasunkiman pisi-pisimanta cambianaykipaq? (Qhaway kay parrafopaq fotokunata).

¹³ ¿Iman yanapasunkiman humilde sonqowan imatapas ruwanaykipaq, atinaykiman jinalla pisi-pisimanta ima cambiotapas ruwanaykipaq? (Prov. 11:2). Chaypaqqa juj listapi churay imakunapis allinyanayki kashan chayta. Chaykuna ukhumanta ajllay jujta otaq iskayta mayqenkunatas ñaupaqta ruwayta munawaq chayta, wakintaqa saqellayraq. Ichaqa, ¿mayqenkunawanmi qallariwaq?

14. ¿Imapin ñaupaqta yuyayniykita churawaq?

¹⁴ Yaqapaschá piensawaq imatas ñaupaqta ruwayta munashanki chaypi, imapis allinyayta munashanki chaypi. Sichus sut’iña qanpaq chay kashan chayqa, yaqapaschá chaymanta willaq qelqakunata maskhawaq, Índice de las  publicaciones Watch Tower nisqapi otaq Guía de estudio para los testigos de Jehová nisqapipas. Chaymantapas Jehová Diospa yanapayninta mañakuy “paymi tanqasunki ima ruwayta munanaykipaqpas, payllataqmi atiytapas qosunki chayta ruwanaykipaqpas” (Filip. 2:13). Chaymantataq tukuy atisqaykita kallpachakuy imachus yachasqaykiman jina ruwanaykipaq. Allinyayta qallarinki chayqa kusisqan kanki, aswan ganaswanmi chaytaqa ruwankipas. Astawanmi kallpachakunki imakunachus faltashasunki chaykunapi allinyanaykipaqpas.

DIOSPA SIMINWAN PUSACHIKUY

15. ¿Imaynapin jujniray kanku Jehová Diospa testigonkuna Bibliata leeq wakin runakunamanta? (1 Tesalonicenses 2:13).

¹⁵ Wakin runakunan ninku: “Bibliataqa jayk’a kutitañachá leerunipas”, nispa. Ichaqa, ¿paykuna creenkuchu chaypi imachus willasqanta? ¿Kasukunkuchu chaypi imachus nisqanta? ¿Chayman jinachu kausanku? Manan. Yaqa llapankupas manan chaytaqa ruwankuchu. Jehová Diospa testigonkunan ichaqa paykunamanta jujniray kanchis. Noqanchisqa ñaupa tiempo iñiqkuna jinan Bibliataqa qhawarinchis. Arí, noqanchispaqqa Bibliaqa “Diospa siminpunin”. Chayraykun sapanka testigo kallpachakun chayman jinapuni kausananpaq (leey 1 Tesalonicenses 2:13).

16. ¿Iman yanapawasunman Diospa nisqanman jina imatapas ruwananchispaq?

¹⁶ Kaypi yachasqanchis jina manan facilchu Diospa palabranta leeyqa, chayman jina kausaypas. Mayninqa manan tiempo aypakunchu chayta leenapaq. Mayninqa yaqapaschá apurasqa leespa mana chayta entiendenchischu. Mayninqa yaqapaschá llakikusunman imaymanapi cambiananchis kasqanta reparakuspa. Imapiña tarikushasunman chaypas Jehová Diosqa yanapawasunmi. Ichaqa manan apurasqachu chaytaqa leena. Aswanmi piensarispa yuyaymanaspa, chhaynapin fácil kanqa chayman jina imatapas ruway. Bibliata leespa chayman jina kausanaykipaq kallpachakunki chayqa, kusisqan kausanki (Sant. 1:25).