¿JAYK’AQLLAPAS sapayki rikukurqankichu? Ima llakipipas kashaspapaschá chhaynapi tarikurqanki. Ichaqa “manchakuy sinchi sasa tiempokunapiña” kashanchis chaypas, manan sapallanchischu kashanchis (2 Tim. 3:1). Bibliapi willasqanman jinaqa kashanmi llakikuy tiempokunapi yanapariq amigonchiskuna (Prov. 17:17).

Apóstol Pablotaqa imaymanapin amigonkunaqa yanaparqanku, wakinqa viajasqanpi iman compañarqanku (Col. 4:​7-11). Roma llaqtapi preso kashaqtinpas imaymana ruwaypin yanaparqanku. Amigon Epafroditopas Filipos llaqtapi hermanokunaq imachus juñusqantan payman aparqan (Filip. 4:18). Tiquicopas allintan Pablotaqa yanaparqan, qelqasqan cartakunatan askha iñiq t’aqakunaman rakirqan (Col. 4:7). Rikusqanchis jina Pabloqa amigonkunaq yanapasqanmi allinta junt’arqan imachus ruwananta. Wasinpiña, carcelpiña wisq’asqa kasharqan chaypas willashallarqanmi Diosmantaqa. Noqanchisri, ¿imaynan chaypi kashanchis? ¿Imaynatan amigonchiskunata yanapasunman?

Kay tiempopipas askha iñiqmasikunan imaymanapi rikuchishanku amigonkuna munakusqankuta. Elísabet sutiyoq hermanamanta yachasunchis, payqa España nacionpin tiyan. Paypa mamitanpin tarisqaku cáncer onqoyta, chay onqoypaqqa manañas jampi kasqachu. Chay tiempopis juj hermana rikuchisqa cheqaq amiga kasqanta. Payqa sapa kutillansi juj mensajepi apachiq Bibliamanta munay textokunata. Chaymanta rimaspan hermana Elísabet nin: “Chay mensajekuna apachimusqanpin allinta repararqani imaynas mana sapallaychu kasharqani chayta, chay mensajekunaqa allintan noqataqa kallpachawarqan” (Prov. 18:24).

Chaymantapas hermanokunataqa Diosta servisqankupi iman yanaparinanchis, chayta ruwasun chayqa aswan jujllachasqan kausasun. Ichaqa, ¿imaynatan chayta ruwasunman? ¿Kuraq hermanokunata juñunakuyman predicacionman ima apasunman chayri? Chayta ruwaspaqa noqanchispuran kallpachanakushanchis (Rom. 1:12). Ichaqa, ¿imaynatan yanapasunman wasinkumanta mana lloqsimuy atiq hermanokunata?

Wakin hermanokunaqa onqosqan kashanku, wakintaq chhayna juj sasachakuykunapi tarikushanku. Chaymi mana juñunakuykunamanpas ni predicaqpas riyta atinkuchu. Chaymi pasasqa hermanonchis Davidtapas. Paypin tarisqaku juj millay onqoyta, chaypaqmi soqta killa masta quimioterapia nisqa tratamientota chaskinan karqan. Chay tiempopiqa paypas esposanpas videollamada nisqallantan juñunakuykunaman jaykuqku.

¿Imaynatan hermanokuna payta yanapankuman karqan? Juñunakuy tukuytan wakin hermanokuna tiempochata jap’iqku juñunakuna wasimantapacha videollamada nisqanta paykunawan parlarinankupaq.  Chaymantapas hermano Davidpas esposan Lidiapas juñunakuypi participamuqtinkuqa kallpachaq mensajekunatan apachiqku. Chaykunata rikuspan Davidwan Lidiawanqa may munasqa qhawarikurqanku.

Chaymantapas yaqapaschá paykunawan kuska predicasunman, chhaynapin rikuchisun imaynas paykunaqa sonqollanchispi kashanku chayta (Prov. 3:27). Ichaqa, ¿imaynatan chayta ruwasunman? Yaqapaschá paykunawan kuska cartakunata qelqasunman, telefononta imapaschá predicasunman. Chaymantapas yaqapaschá umalliqkunaqa rimanakunkuman predicanapaq juñunakuyman videollamada nisqanta wakin hermanokuna jaykumunankupaq. Davidpas Lidiapas maytapunin agradecekurqanku iñiq t’aqapi chay aparikusqanmantaqa. Davidmi nin: “Hermanokunawan juj ratu chaypi kayqa, juj textollatapas leeyqa maytan noqataqa kallpachawarqan”, nispa. Pimanpas Bibliamanta estudiota qoshanchis chayqa, ¿wasillanpi kaq hermanoman pusasunman chaypi paywan kuska estudiota qonapaq chayri? Ichaqa, allin yuyaywanmi chaytaqa ruwana.

Chhaynapi tarikuq hermanokunawan tiempota pasasun chayqa, astawanmi paykunawan reqsinakusun, astawanmi munanakusunpas. Chaymantapas imaynatachus Diosmanta willan chayta rikuspaqa astawanmi paykunata valorasun. Chhaynata chay hermanokunata yanaparisun chayqa aswan askhan amigonchiskunapas kanqa (2 Cor. 6:13).

Titopas apóstol Pablotaqa allintan yanaparqan, Pablopas kusisqan kasharqan chay amigon ladonpi kasqanmantaqa (2 Cor. 7:​5-7). ¿Imatan chaymanta yachasunman? Amigonchiskunataqa manan simillanchiswanchu kallpachasunman, paykunawan kuska kaspa yanaparispa iman kallpachasunman (1 Juan 3:18).

Rusia nacionpi hermanokunaqa allintan rikuchishanku imas cheqaq amigo kay chayta. Chaypaq yachasun Serguéi sutiyoq hermanonchismanta esposan Tatianamantawan. Paykunaq wasinkumanmi policiakuna jaykusqaku jinaspa imaymanata chaypi maskhasqaku, chaymantataq paykunata comisariaman apapusqaku. Ñaupaqtaqa Tatianatan kacharipusqaku, payqa wasinmansi kutipusqa. Tatiana wasinman chayapuqtin imachus pasarqan chaymanta rimaspan Serguéi nin: “Esposay wasiman chayapusqan qhepallamansi juj hermana wasita jamusqa, payqa mana manchakuspas jamusqa. Chaymantaqa juj hermanokunapas jamurqankun, paykunan yanapawarqanku wasita allichaypi”, nispa.

Chay hermanonchismi nillantaq: “Noqamanqa gustawanmi Proverbios 17:17 textopi nisqanqa. Chaypin nin: Cheqaq amigoqa tukuy tiempon munakun, sinchi llakikuy tiempopipas wayqe jinan qhawarisunki, nispa. Kay tiempokunapin astawanraq rikushayku chay textoq nisqanta. Noqallaqa manan aguantaymanchu karqan kay sasa tiempotaqa. Maytan Jehová Diosta “gracias” nini khayna amigokuna qowasqanmanta”, nispa. a

Kay tiempokunapiqa sinchi sasa tiempokunapin kausashanchis, chhayna tiempokunapitaq kashanchis chayqa amigonchiskunan chaypiqa yanapawasun. Manchay ñak’ariy tiempokunapiqa astawanraqmi paykunaqa yanapawasun. Chaymi kunanmantapacha kallpachakunanchis cheqaq amigo kananchispaq (1 Ped. 4:​7, 8).