Sasachaykunata atipaq runaqa manan chaykunawan pisipanchu. Tiempoq pasasqanman jinan chaytaqa astawan rikuchisunman. Imaynan juj wawaqa askha kutipi urmaspa puriyta yachan, chhaynallataqmi qhepaman allinta kausananpaqqa imaymana sasachaykunata atipanan.

Wakin wawakunaqa manañan ruwayta munankuchu ruwashasqanku mana allin lloqsiqtin otaq pipas corrigiqtin. Wawakunan ichaqa allinta yachananku kaykunata:

• Manan pipas imatapas allintapuniqa ruwanmanchu (Santiago 3:2).

• Llapanchispas imaymana sasachakuykunapin tarikusunpuni (Eclesiastés 9:11).

• Llapanchispas necesitanchismi corrigiwananchista. Chhaynapin imatapas allinta ruwasun (Proverbios 9:9).

Sichus wawayki sasachayninta atipayta yachanqa chayqa, qhepamanpas atillanqan ima sasachaytapas atipayta.

Imatapas ruwashaspa pantaruqtin

BIBLIAPIN NIN: “Qanchis kutitaña chanin runa urmanqa chaypas, payqa sayaripullanqapunin”, nispa (Proverbios 24:16).

Wawaykita yanapay imapi pantasqanta allin yuyaywan qhawarinanpaq. Yaqapaschá examenta qospa mana allin notata orqokuqtin, payqa ninman: “Manan imatapas allintaqa ruwanichu”, nispa.

Chay sasachayninta atipananpaqqa, yaqapaschá willawaq imatachus ruwanman allin notata orqokunanpaq chayta. Jinan payqa kallpachakunqa chay sasachayta atipananpaq, manataq pisipanqachu.

Ichaqa manayá qanchu tareantaqa ruwapunayki. Aswanpas yanapanaykin payllamanta tareanta ruwananpaq. Wawaykitan tapuwaq: “¿Imatan ruwawaq kay cursota allinta entiendenaykipaq?”, nispa.

Ima llakipipas tarikuqtin

BIBLIAPIN NIN: “¿Acaso qankunari yachankichischu paqarin imachus vidaykichis kananta?”, nispa (Santiago 4:14).

Manan pipas yachasunmanchu imachus paqarin pasawananchistaqa. Qonqayllan qolqeyoq runapas wajcha kapunman, mayqenninchispas qonqayllan onqoyniyoq tarikusunman. Bibliapipas ninmi: “Manan allin phawaqkunachu phawaspaqa llallinku, manan kallpasapakunachu auqa-tinkuypiqa atipan, [...] aswanpas sapankan imaynapipas rikukunku”, nispa (Eclesiastés 9:11).

Wawaykita ima peligromantapas cuidasqaykiqa allinmi, ichaqa yachasqanchis jina manan tukuy llakimantaqa cuidayta atisunmanchu.

Yaqapaschá wawaykiqa llakikunqa jujnin amigon paymanta t’aqakaputin, otaq jujnin familianpa wañupusqanta rikuspa. Ichaqa chaykunata aguantananpaq yanapanki chayqa, kuraq kaspaqa atipanqan juj llakikuykunatapas, wakinmi kanman llank’ananta pierdeqtin, otaq mana qolqeyoq tarikuqtin. *

Allinta ruwananpaq imatapas niqtinku

BIBLIAPIN NIN: “Kunaykusqata uyarikuy, [...] chay jinapin yachayniyoq kapunki”, nispa (Proverbios 19:20).

Imatapas allinta ruwanapaq otaq cambiananchispaq pipas niwanchis chayqa uyarikunanchismi, manan sonqonchista k’iriwananchispaqchu chaytaqa niwanchis.

Sichus wawaykita yanapanki imatapas nisqankuta uyarikuyta yachananpaq chayqa, qhepamanqa manan qanpas nitaq wawaykipas sufrinkichischu. John sutiyoq taytan nin: “Sichus wawaykita jark’arqanki imatapas mana allinta ruwasqanmanta corrigisqa kananta chayqa. Kuraq kaspaqa astawanmi imaymana sasachakuykunapi tarikunqa, jinaspan yanapashanallayki kanqa. Chayta ruwaspaqa manan kusisqachu kausankichis”, nispa.

¿Imaynatan wawaykita yanapawaq imatapas allinta ruwananpaq corrigiqtinku? Sichus escuelapi otaq maypipas wawaykita corrigirqanku chayqa, ama niychu: “Manan allintachu chaytaqa ruwarqanku”, nispaqa. Aswanpas tapuwaqmi:

• “¿Imanaqtintaq corrigisunkikuman karqan?”.

• “¿Imatan ruwawaq aswan allinta ruwanaykipaq?”.

• “¿Imatan ruwawaq juj kutipi corrigisuqtiykiku?”.

Wawaykita corrigisqankuqa yanapanqan qhepaman allin kananpaq.