35 YACHACHIKUY
Allinta piensaykuspa imatapas ruwasun
Ima ruwasqanchispas vidanchistan cambianman, Jehová Dioswan amigontin kasqanchistapas cambianmanmi. Chaymi allinta piensaykuspa imatapas ruwananchis. Yaqapaschá piensashanchis maypis tiyasun, imaynatas mantenekusun, casarakusunchus manachus chaykunapi. Allinta piensaykuspa imatapas ruwasun chayqa, kusisqan kasunchis, Jehová Diostapas kusichisunmi.
1. ¿Yanapasunkimanchu Biblia allinta imatapas ruwanaykipaq?
Imatapas ruwayta munashanchis chayqa, ñaupaqtan Jehová Diosmanta mañakunanchis. Chaymantataq Bibliapi maskhananchis imatas pay piensan chayta (leey Proverbios 2:3-6). Mayninpiqa juj kamachikuytan tarinki imatachus ruwanaykipaq, chhayna kaqtinqa kasukunaykin chayta.
Mayninpin ichaqa mana tarinkichu ima kamachikuytapas. Chhaynaña kaqtinpas Jehová Diosqa rikuchisunkipunin “may ñannintachus purinaykita” (Isaías 48:17). ¿Imaynatan chayta ruwanqa? Bibliapi kaq willakuykunawan yachachikuykunawan iman. Chaykunan reparachiwasun imaynatas Jehová Dios piensan, imaynatas imatapas qhawarin chayta. Mayninpiqa Bibliapi imapas pasasqanmanta leespan chay willakuykunata yachachikuykunatapas tarisun. Chhaynapin Jehová Diospaq jina imatapas ruwasun.
2. ¿Imakunapin piensanayki imatapas manaraq ruwashaspa?
Biblian nin: “Allin yuyayniyoqqa allinta tanteakuspan imatapas ruwan”, nispa (Proverbios 14:15). Chhaynaqa imata ruwananchispaqpas ñaupaqtan allintaraq piensarinanchis. Chaypi piensashaspan tapukunanchis: “¿Bibliapi kaq mayqen yachachikuymi yanapawanman? ¿Thajchu kasaq kayta ruwaspa? ¿Imaninqakun jujkuna kay ruwasqayta rikuspa? ¿Kusikunqachu Jehová Dios kay ruwasqaywan?”, nispa (Deuteronomio 32:29).
Jehová Diosqa derechonpin kashan imachus allin imachus mana allin chayta niwananchispaq. Sichus allinta yachasun kamachikuyninkunata, Bibliapi kaq yuyaychaykunatapas, chayman jinataq kausasunpas chayqa, allin concienciayoqmi kasunchis. Concienciaqa pipas rimapayawashasunman jinan niwanchis imapas allinchus kashan icha manachus chayta (Romanos 2:14, 15). Conciencianchis Bibliawan allin educasqa kanqa chayqa allintan imatapas ruwasunchis.
ASTAWAN YACHASUNCHIS
Kunanqa yachasunchis imaynatas Bibliapi willakuykuna, yachachikuykuna, conciencianchispas yanapawasunman allin yuyaywan imatapas ruwananchispaq chayta.
3. Bibliaq nisqanman jina imatapas ruway
Bibliapi kaq willakuykunapas yachachikuykunapas yanapawasunmanmi allinta piensaykuspa imatapas ruwananchispaq. VIDEOTA qhawaychis, jinaspa jamuq tapuykunaman jina parlariychis:
-
¿Ima regalotan Dios qowarqanchis?
-
¿Imaraykun Dios chay regalota qowarqanchis?
-
¿Ima yanapaykunatan Dios qowarqanchis libreña kanchis chaypas allin yuyaywan imatapas ruwananchispaq?
Juj yachachikuyta Bibliapi qhawasunchis. Leeychis Efesios 5:15, 16 textota. Chay textoqa allintan reparachiwanchis imaynas tiempotaqa mana usuchinachu chayta ¿riki?
-
¿Imaynatan tiempota mana usuchiy yanapawasunman Bibliata sapa p’unchay leenapaq?
-
¿Imaynatan yanapawasunman allin qosa, allin esposa, allin tayta-mama, allin wawa kanapaq?
-
¿Imaynatan yanapawasunman juñukuykunaman mana faltakunapaq?
4. Concienciaykita yachachiy imatapas allinta reparachinasuykipaq
Imata ruwanapaqpas Bibliapi juj kamachikuy kaqtinqa ratullan yachasunman imatas ruwasunchis chayta. Ichaqa, ¿imatan ruwasunman juj kamachikuy mana kaqtin? VIDEOTA qhawaychis, jinaspa jamuq tapuyman jina parlariychis:
-
Videota qhawasqanchisman jina, ¿imaynatan chay hermana conciencianta yachachirqan, chhaynapi ima ruwasqanpas Jehová Diospa munayninman jina kananpaq?
Imata ruwananchis kaqtinpas, sapankanchismi reparananchis imatachus ruwasun chayta, manan jujkunaq imapas niwananchistaraqchu suyananchis. Leeychis Hebreos 5:14 textota, jinaspa jamuq tapuykunaman jina parlariychis:
-
Jujkunaq yanapayninta mañakuy allinña chaypas, ¿imaraykun sapankanchispuni reparananchis imachus allin imachus mana allin chayta?
-
¿Imatan ruwananchis conciencianchis allinta imatapas reparachiwananchispaq, chhaynapi allin yuyaywan imatapas ruwananchispaq?
Juj mapaqa mayninta rinanchispaqmi yanapawanchis. Chhaynallataqmi conciencianchispas imayna kausananchispaq yanapawanchis.
5. Jujkunaq conciencianta respetasun
Llapanchispas jujniraytan piensanchis, chaymi mana igualtachu imatapas ruwanchis. ¿Imaynatan rikuchisunman jujkunaq imaynachus piensasqanta respetasqanchista? Kaypi iskaymanta yachasun.
Juj kaq: Juj hermanas juj iñiq t’aqaman astakunman, paymanqa allin pintasqa puriysi gustanman, chay iñiq t’aqapi hermanakunas ichaqa mana allinpaqchu qhawarinkuman chhayna pintakuyta.
Leeychis Romanos 15:1; 1 Corintios 10:23, 24 textokunata, jinaspa jamuq tapuykunaman jina parlariychis:
-
Chaypi leesqanchisman jina, ¿imatan ruwanman chay hermana? Qanpas concienciaykiman jinaqa atiwaqpaschá ima ruwaytapas, ichaqa manapaschá jujkunaqa allinpaqchu chayta qhawarinkuman, ¿imatan ruwawaq chhaynapi tarikuspa?
Iskay kaq: Juj hermanos kanman manapuni pisillatapas alcoholniyoq ujanakunata tomaq. Manaña Biblia prohibinchu pisilla ujariyta chaypas, chay hermanoqa totaltapunis prohibikunman. Paytas invitankuman juj juñukuyman, chaypis rikunman hermanokuna juj chhikan ujashaqta.
Leeychis Eclesiastés 7:16; Romanos 14:1, 10 textokunata, jinaspa jamuq tapuykunaman jina parlariychis:
-
Chaypi leesqanchisman jina, ¿imatan chay hermano ruwanman? Qanri, ¿imatan ruwawaq mana ruwasqaykikunata jujkuna ruwaqtinku?
¿Iman yanapasunkiman imatapas allinta ruwanaykipaq?
1. Jehová Diosmanta mañakuy, paymi allin yuyayta qosunki (Santiago 1:5).
2. Reparachiq yachachikuykunata maskhay, chaypaqqa Bibliata qelqanchiskunata iman estudianayki, chhaynapin reparanki imaynatas imatapas ruwawaq chayta. Tapurikuwaqmi allin iñiyniyoq hermanokunatapas.
3. Piensay imas pasanman chaypi. ¿Imaynan concienciayki qhepanqa? ¿Imaynatan jujkuna qhawarinqaku ima ruwasqaykitapas? Chaykunapi piensay.
WAKIN RUNAKUNAN NINKU: “Ima munasqaykita ruwakuy, ama runaq rimasqantaqa kasuychu”, nispa.
-
¿Imaraykun Diospa imayna piensasqanta, jujkunaq imayna piensasqantapas respetananchis?
IMATAN YACHAMURQANCHIS
Imatapas allinta ruwananchispaqqa yachananchismi Jehová Diospa imayna piensasqanta. Chaymantapas qhawarinanchismi jujkunata yanapanqachus icha phiñachinqachus chayta.
Yuyarisun
-
¿Imatan ruwanayki ima ruwasqaykiwanpas Jehová Dios kusikunanpaq?
-
¿Imatan ruwanayki concienciayki allinta imatapas reparachinasuykipaq?
-
¿Imaynatan rikuchiwaq jujkunaq piensasqan respetasqaykita?
ASTAWAN YACHANAYKIPAQ
¿Imaynatan Diospaq jina imatapas ruwawaq? Chaymantan kay qelqapi yachanki.
“Diosta jatunchanapaq jina imatapas ruwasun” (Qhawaq, 2011 watapi 15 abril)
¿Imaynatan Jehová Dios yuyayta qowanchis? Chaymantan kay videopi yachanki.
¿Imatan juj runa ruwarqan Diosta servinanpaq? Chaymantan kay videopi yachanki.
Ima ruwanapaqpas Bibliapi mana juj kamachikuy kaqtin, ¿imaynatan yachasunman ima ruwananchistas Jehová Dios munan chayta? Chaymantan kay qelqapi yachanki.
“¿Juj kamachikuy kallaqtinchu imatapas kasukunanchis?” (Qhawaq, 2003 watapi 1 diciembre)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
