JUJ kutinmi juj runa Jesusta maskharan kayta ninanpaq: “Yachachikuq, wayqeyta niykapuway herenciaykuta t’aqanakunaykupaq”, nispa. Chay runaqa jatun herenciatan chaskiyta munashanman karan.

Jesús kaspa, ¿imatan niwaq karan chay runata?... Chay runaqa herencia chaskiyllapin piensasharan. Paypaqqa chaymi karan aswan importante. Chaytan Jesús repararan.

¿Iman noqanchispaq aswan importante kanan? ¿Gustawasqanchis pujllanakuna? ¿Mosoq p’achayoq kaychu?... Manan chaykunachu. Jesusmi niran juj ruwaykuna aswan importante kasqanta. Chayta yachachinanpaqmi Diosta qonqapuq runamanta willaran. ¿Yachayta munawaqchu?...

Chay runaqa qhapaq runas kasqa. Chajrankunapas mijuna waqaychanan cuartokunapas askhas kasqa. Juj kutinsi askhallataña cosechasqa, jinas mijuna waqaychanan cuartokuna junt’arapusqa. ¿Imatan ruwasqa? Kaytas nisqa: ‘Cuartokunata thunispa aswan jatunkunata ruwarusaq, chaymantaq juñumusaq llapa trigoyta llapa kaqniykunatawan’, nispa.

Chay runaqa allinpaqsi qhawarisqa chay ruwasqanta. Chaymi kayta nisqa: ‘Askha watakunapaqmi imaymanay waqaychasqa  kashan. Kunanqa ama llakikuspalla samakusaq, mijukusaq, ujakusaq, kusikusaq ima’, nispa. Ichaqa chay ruwasqanqa manan allinchu kasharan, ¿imarayku?... Payqa payllapin piensaran, allin mijusqa kaypi, kusisqa kayllapi. Diostan ichaqa qonqapuran.

Ichaqa Diosmi niran: ‘Yau mana yuyayniyoq runa, kunan tutan wañunki. ¿Pipaqtaq chay waqaychasqayki kanqa?’, nispa. Chay runa wañupuspa, ¿mijunqachu ujanqachu waqaychasqanta?... Manañan ¿riki? Jujkunan chaykunataqa jap’ikapunqa. Chaymi Jesús niran: “Chhaynapin tarikunqa pipas payllapaq qhapaq kayta juñunqa, manataq Diospaqchu qhapaq kanqa chayqa”, nispa (Lucas 12:13-21).

¿Munawaqchu chay qhapaq runa jina kayta?... Manan ¿riki? Chay runapaqqa imaymanayoq kaymi aswan importante karan.  Payqa payllapaqmi imaymanata ruwaran. Ichaqa manan Diospaq imatapas ruwaranchu.

Chay runa jinan wakinqa imatapas astawan munanku. Chayqa manan allinchu. ¿Kanchu pujllanaykikuna?... ¿Ima pujllanaykikunan kan?... Yaqapaschá amigoykikunaq pelotan, muñecan otaq juj pujllanankuna kashan. ¿Chayta rikuspachu papaykita ninayki: “Noqamanpas chayta rantipuway”, nispa?...

Yaqapaschá kashan munay pujllanaykikuna. Ichaqa tiempo pasaqtin, ¿iman pasan chay pujllanakunawan?... Arí, thantakapuspan p’akikapun. Ichaqa, ¿yachankichu iman chay pujllanakunamanta aswan importante?...

Kausayniykin. Wañupuwaq chayqa manan pujllaytapas nitaq imatapas ruwayta atiwaqchu. Ichaqa, ¿imatan ruwanayki kausashanallaykipaq?... Diospa sonqontan kusichinayki. Manan qhapaq runa jinachu Diosta qonqapunayki.

 Ichaqa manan wawakunallachu chay qhapaq runa jina kanku. Kuraq runakunapas chhaynan kanku. Kanmi mijunanku, p’achanku, wasinkupas, chaywanpas astawanmi munanku. Chaypaqqa askha qolqen necesitakun. Chaymi astawan llank’anku. Qolqenku askha karuqtintaq aswan askhata munanku.

Wakin runakunaqa tuta-p’unchaymi llank’anku askha qolqeyoq kanankupaq. Chaymi mana tiemponku kanchu familiankupaq Diosta adoranankupaqpas. Chay qolqenku, ¿kausaytachu qonqa?... Wañupuqtinkuri, ¿rantinkumanchu imallatapas chay qolqenkuwan?... Manan ¿riki? Wañupuqkunaqa manañan imatapas ruwayta atinkuchu (Eclesiastés 9:5, 10).

Chhaynaqa, ¿juchachu qolqeyoq kay?... Manan juchachu. Qolqewanmi rantinchis mijunata p’achatapas. Biblian nin qolqeqa chaykunapaq kasqanta (Eclesiastés 7:12). Ichaqa qolqeta nishuta munakuymi mana allinchu. Chayta ruwaspaqa qhapaq runa jinan Diosta qonqapusunman. Manan Diospaq qhapaqchu kasunman.

¿Imaynapin Diospaq qhapaq kasunman?... Diosta ñaupaqta servispan. Wakin runakunan ninku: “Noqaqa creenin Diospi”, nispa. Ichaqa, ¿chaywanchu qhapaq kanku Diospaq?... Manan, paykunaqa qhapaq runa jinan Diosta qonqapunku.

Jesusqa manan jayk’aqpas Diosta qonqaranchu. Payqa manan qhapaq kayta maskhaypichu afanakuran. Jesusqa yacharanmi imas aswan importante kasqanta. ¿Iman aswan importante?... Arí, Diospaq qhapaq kaymi.

¿Imatan chaypaq ruwananchis?... Diospa munasqantan ruwananchis. Jesusmi niran: ‘Sonqonpaq jinapunin tukuy imatapas ruwani’, nispa (Juan 8:29). Chaytan Diospas munan. ¿Imatan  qanpas ruwanayki Diosta kusichinaykipaq?... Bibliatan leenayki, juñunakuyman rinayki, Diosmanta mañakunayki, runakunamantaq Diosmanta yachachinayki. Chay ruwaykunan aswan importante.

Jesusqa Diospa munasqantan ruwaran. Chaymi Diosqa cuidaran wiñay kausaytapas qoran. Jesús jina kasun chayqa, Diosmi munakuwasun cuidawasun ima. Chayrayku Jesús jina kasun ama Diosta qonqapuq runa jinachu.