Jesuspa gobiernonqa manan kay pachamantachu karan, chaymi Jesusqa mana Roma rey contrachu jatarisharan. Chayta entiendechinanpaqmi Pilatota niran: “Gobiernoyqa manan kay pachamantachu. Kay pachamantachus gobiernoy kanman chayqa, kamachiykunachá noqarayku maqanakunkuman karan, chhaynapi judiokunaman mana entregasqa kanaypaq. Ichaqa nisqay jina, gobiernoyqa manan kaymantachu”, nispa (Juan 18:36).

Jinan Pilatoqa niran: “Chhaynaqa, ¿reychu kanki?”, nispa. Jesustaq payta niran: “Qan kikiykin ninkiña rey kasqaytaqa. Noqaqa cheqaq kaqmanta willanaypaqmi nacerani, chaypaqtaqmi kay pachamanqa jamuranipas. Pipas cheqaq kaqman jina kausaqqa uyarinmi simiyta”, nispa (Juan 18:37).

Pilatoman nisqan jina, Jesusqa Diospa gobiernonmanta cheqaq kaqta willananpaqmi kay pachaman jamuran, chay cheqaq kaqraykun wañunanpas karan. Juj kutinpas ñan Tomastapas niranña: “Noqan kani ñanpas, cheqaq kaqpas, kausaypas”, nispa. Jinan Pilatoqa niran: “¿Imataq cheqaq kaqri?”, nispa. Chayta nispataq chaymanta lloqsiran. Payqa seguron kasharan ima nispachus Jesusta juzganan karan chaymanta (Juan 14:6; 18:38).

Pilaton jawapi sayashaq runakunaman rispa umalli sacerdotekunata paykunawan kashaqkunatawan niran: “Manan ima juchatapas kay runapiqa tarinichu”, nispa. Chay ratopaqqa Jesusqa Pilatoq ladonpin sayashanman karan. Jinan runakunaqa phiñasqa niranku: “Yachachiyninwanmi llapa Judea provinciantinpi runakunata ch’aqwachin, Galilea provinciamanta qallarimuspa hasta kaykamaraq”, nispa (Lucas 23:4, 5).

Chhayna qaparisqankuta uyarispaqa admirakuranraqchá Pilatoqa. Jinan Jesusta niran: “¿Manachu uyarinki contraykipi imaymana rimasqankuta?”, nispa (Mateo 27:13). Jesustaq mana ima niranpaschu, aswanpas qasilla karan, chaywanmi Pilatoqa anchata admirakuran.

Jinan Pilatoqa Jesús Galilea provinciamanta kasqanta yacharuspa chay provinciapi kamachikuq Herodes Antipasman apanankupaq kamachikuran payña Jesusta juzgananpaq. Payqa jatun Herodespa wawanmi karan, chay p’unchaykunapitaq Jerusalén llaqtapi kasharan. Herodesmi karan bautizaq Juanpa umanta wit’uchiq. Paymi Jesuspa milagrokuna ruwasqanmanta uyarispa preocupasqa kasharan ‘wañuchisqay bautizaq Juanchu kanpas’ nispa (Lucas 9:7-9).

Chaymi Jesusta apamuqtinku Herodesqa anchata kusikuran. Payqa manan Jesustachu yanapayta munasharan, nitaq juchayoqchus manachus chaytachu yachayta munasharan, aswanmi payqa milagro ruwanallanta munasharan (Lucas 23:8). Jesusmi ichaqa mana ima milagrotapas ruwaranchu, Herodes imaymanata tapushaqtinpas ch’inllan karan. Jinan Herodesqa soldadonkunapiwan ‘millayta trataspa Jesusta pisicharanku’ (Lucas 23:11). Ancha sumaq p’achawan churachispataq paymanta burlakuranku. Chaymantataq Herodesqa Jesusta Pilatoman apachipuran. Chaymantapachan Herodeswan Pilatowanqa amigontin kapuranku. Ñaupaqqa enemigontinmi karanku.

Jesusta kutichimuqtinkun Pilatoqa umalli sacerdotekunata, waj umallikunata, runakunatawan juñuspa niran: ‘Noqaqa qankunaq ñaupaykichispin allinta paytaqa tapurani, ichaqa manan contranpi nisqaykichismantaqa imatapas juchachanapaq jinaqa tarinichu. Herodespas manan imatapas tarimusqachu, chaymi kutichimpuwanku. Kay runaqa manan imatapas wañunanpaq  jinaqa ruwasqachu. Chayraykun soq’achispalla kacharipusaq’, nispa (Lucas 23:14-16).

Pilatoqa repararanmi judiokunaqa Jesusta envidiakuspa entregasqankuta, chaymi payta kacharipuyta munasharan. Chayllamanmi esposanpas willachimuran: “Aman imanankipaschu chay chanin runataqa, paymantan sinchi mancharikuyta mosqokuni”, nispa (Mateo 27:19). Chay mosqokusqanqa Diosmantapunin kanman karan.

Jesusqa mana juchayoqmi karan, chaymi Pilatoqa kacharipunanpuni karan. Ichaqa, ¿imaynatan chayta ruwanan karan?