Runakuna Jesuspa nisqanta kasukunankupaqqa imayna sonqoyoqchus kasqankumantan dependeran. Chaymi allinta rikukuran Simón sutiyoq fariseoq wasinpi. Paymi Jesusta wasinman mijuqta invitaran, chhaynapi astawan payta reqsinanpaq. Jesusqa runakunata yanapananraykun chay wasiman riran. Ñaupaq kutikunapipas payqa mijuranmi impuesto cobraqkunawan juchasapakunawanpas, chhaynapi paykunata yanapananpaq.

Chay fariseon ichaqa mana sumaqtachu Jesusta chaskiran. Chay tiempopiqa much’aykuspan invitadokunataqa chaskiqku, chaymantapas usut’allayoqtaq puriqku chayqa chiri unuwanmi chakinkuta maqchiqku, chhaynapi purimusqankumanta samarinankupaq, ima qhellimantapas limpiakunankupaqwan; umankumanpas aceitewanmi jich’aykuqku. Jesustan ichaqa mana chhaynatachu chay fariseo chaskiran.

Mijushaqtinkun ‘llaqtapi juchasapamanta reqsisqa warmi’ mana reparachikuspalla chay wasiman jaykuran Jesusta maskhaq (Lucas 7:37). Chay warmiqa qhelli kausaypi puriq warmin kanman karan. Payqa uyariranchá Jesuspa yachachisqanta, ‘noqaman jamuychis, noqan samachisaykichis’ nispa nisqantapas (Mateo 11:28, 29). Chaypaschá Jesustaqa maskharan.

Chay warmin Jesusman k’umuykuspa waqayta qallariran, weqenkunapas chakinkunamanmi sut’uykuran, chaymi chujchanwan ch’akichiran. Chaymantapas chakinta much’aykuspan sumaq q’apaq jawinawan jich’aykuran. Chayta rikuspan Simonqa sonqollanpi niran: “Kay runa profetapuni kanman chayqa, yachanmanchá llamiykuqnin warmiqa juchasapa kasqanta”, nispa (Lucas 7:39).

Jesustaq chayta reparaspa niran: ‘Simón, jujta nisayki: Iskay runakunan manu karanku juj qolqe manuq runaman. Jujninmi pisqa pachaj denario qolqemanta manu karan, jujnintaq pisqa chunka qolqemanta. Mana imankupas pagapunankupaq kaqtintaq manuqqa tukuy sonqowan iskayninkuta perdonapuran. Niway, ¿mayqenmi chay manuqta aswanta munakunqa?’, nispa. Jinan Simonqa niran: “Askha qolqeta manukuqninchá riki”, nispa (Lucas 7:40-43).

Jinan Jesusqa Simonta niran: “¿Rikushankichu kay warmita? Wasiykiman jaykumuqtiymi qanqa mana chakiypaq unuta qowarankichu; kay warmin ichaqa weqenwan chakiyta maqchin, chujchanwantaq ch’akichinpas. Manan much’aykuwarankichu, kay warmin ichaqa jaykumusqanmantapacha chakiyta much’aykushan. Manan umaymanpas aceitewan jich’aykuwarankichu, kay warmin ichaqa sumaq q’apaq jawinawan chakiyman jich’aykuwan”, nispa. Jesusqa repararanmi chay warmi juchankunamanta mayta pesapakusqanta, chaymi niran: “May askhaña paypa juchankuna chaypas, perdonasqan kapun, chaymi payqa anchata munakun. Pisillapi perdonasqa kaqmi ichaqa pisillata munakun”, nispa (Lucas 7:44-47).

Rikusqanchis jina, Jesusqa anchatan khuyapayaran juchankumanta pesapakuspa payta maskhaqkunataqa. Maytachá chay warmipas kallpachakuran: “Juchaykikunan perdonasqa kapun, [...] iñiyniykin salvasunki, ama llakikuspalla ripuy”, nispa Jesús niqtin (Lucas 7:48, 50).