TAWA T’AQA
Sonqoq huchachasqan tarikuspa: “Huchaymanta ch’uyanchaykuway”
Martha nin: “Allin trabajotan tarirqani, chhaynapin familiaypas aswan allinta kawsarqan, ichaqa chay llank’anaypi ruwachiwasqankuqa manan Diospa siervonpaq hinachu karqan. Kay pachaq ruwasqan fiestakunatan ruwapurqani, participarqanin politicapi, hasta iglesiamanpas rirqanin. 40 watan Diosmanta karunchasqa karqani. Astawan tiempo pasaqtinqa niqmi kani ‘manachus Diosqa perdonawanmanchu’ nispa, nitaqmi ñoqa kikiypas perdonakuyta munaqchu kani. Yacharqaniña imachus cheqaq kasqanta chaypas mana allinkunatan ruwapurqani”, nispa.
SONQOQ huchachasqan kayqa huk llasa q’epi hinan. Rey Davidmi huchankunaq ñit’isqan tarikurqan, chaymi nirqan: “Llasa q’epi hinan ñit’iykuwan”, nispa (Salmo 38:4). Wakin iñiqmasikunaqa piensankun “Diosqa manan hayk’aqpas perdonawanmanchu” nispa, chaymi sinchi llakikuypi tarikunku (2 Corintios 2:7). ¿Ima huchamanpas urmasqaykiraykuchu sientekunki Diosmantapas sinchi karupi kashawaq hina? ¿Ninkichu “huchayqa nishu hatunpunin, Diosqa manapunin perdonawanmanchu” nispa? Ama chhaynataqa niychu, Diosqa yanapaytan munashasunki.
“Hamuychis, parlasunchis”
Jehová Diosqa manan hinallatachu qhawan arrepientekuqkunataqa, aswanpas yanapaytan munan. Jesusmi willarqan mana allinta kawsayta munaspa wasinmanta ripuq waynamanta, ichaqa qhepamanmi kutimpurqan. ¿Iman pasarqan kutimpuqtin? Jesus nirqan: “Karullapiraq kashaqtintaqmi taytanqa payta rikurqan, hinaspan mayta khuyapayaykuspa phawarirqan, oqllaykuspataq much’aykurqan”, nispa (Lucas 15:11-20). ¿Munashankichu kutimpuyta, ichaqa chay wayna hinachu ‘karullapiraq kashanki’? Jehová Diosqa chay tayta hinan munakuq khuyapayakuq, payqa abrazaykunasuykipaqmi suyashasunki.
¿Nishankichu “huchaykunaqa nishupunin, manan Jehová Diosqa perdonawanmanchu” nispa? Chhaynata piensashanki chayqa Jehová Diospa kay nisqanpi yuyaymanay: “Hamuychis, parlasunchis. Sansaq-puka hinaña huchaykichis kashan chaypas, rit’ita hinan yuraqyachisaq”, nispa (Isaías 1:18). Huk yuraq p’achaman puka color tiñina hich’aykukunman chayqa mana hayk’aq lloqsiqpaq hinapaschá qhawarikunman, chhayna hinaña huchanchis kanman chaypas Jehová Diosqa perdonawasunmi.
Jehová Diosqa manan munanchu conciencianchis qhelli kasqanrayku llakikunanchista. Diospa perdonasqan kaspa allin concienciayoq kayqa may sumaqpunin. ¿Imatan ruwawaq chhayna sientekunaykipaq? Rey David hina ruway, nirqanmi: “Diosmanmi mana kasukusqaykunata willakusaq”, nispa (Salmo 32:5). Jehová Diosqa ñan nisunkiña ‘hamuy, parlasunchis’ nispa. Chayta kasukuspa oracionpi payman qayllaykuy, huchaykikunata willakuy, chay hawa imayna sientekusqaykitapas. Davidqa sonqonta kicharispan nirqan: “Huchaymanta ch’uyanchaykuway”, nispa. Nillarqantaqmi: “Diosníy, qanqa manan qhawarparinkichu llakikuq huch’uyyaykukuq sonqoyoqtaqa”, nispa (Salmo 51:2, 17).
Chaymantapas Davidqa dejakullarqanmi Natán yanapananta, Natanqa Diospa churasqan profetan karqan (2 Samuel 12:13). Kunanpas Diosqa umallikunatan churan iñiq t’aqakunapi. Chay umallikunaqa huchankumanta arrepientekuqkunatan yanapanku Dioswan amigontin kapunankupaq. Umallikunawan rimaqtiykiqa Bibliawanmi yanapasunkiku Diosta servishanallaykipaq. Chaymantapas qanwan kuskan Diosmanta orakunqaku chhaynapi thak kapunaykipaq, ama huchachakushanaykipaqpas (Santiago 5:14-16).
Jehová Diosqa munanmi ch’uya concienciayoq kanaykita
“¡Kusisamiyoqmi huchanta pichasqa runaqa!”
Huchaykita Jehová Diosman willakuytapas umallikunawan rimaytapas sasapaqpaschá qhawarinki. Davidpaqpas sasan karqan. Biblian willan Davidqa huk tiempo huchankunata ‘mana willakusqanta’ (Salmo 32:3). Ichaqa repararqanmi aswan allinqa willakuy kasqanta, chhaynapi mana sonqon huchachananpaq.
Davidqa huchanta willakusqanraykun wakmanta kusisqa kapurqan, nirqanmi: “Kusisamiyoqmi huchallikusqan pampachasqa runaqa, kusisamiyoqmi huchanta pichasqa runaqa”, nispa (Salmo 32:1). Chaymantapas Diostan nirqan: “Señor Diosníy, rimarichiway, chaymi yupaychasqayki”, nispa (Salmo 51:15). Davidqa thakmi sientekurqan Diostapas agradecekurqanmi, chaytaqmi kallpacharqan runakunaq ñawpaqenpi Diosta adorananpaq.
Jehová Diosqa kusisqa kanaykitan munan. Diosqa munan allin concienciayoq, ch’uya sonqoyoq, kusisqa paymantapas promesankunamantapas rimanaykitan (Salmo 65:1-4). Jehová Diosmi niwanchis: “Huchaykichista saqepuspa Diosman kutirikuychis huchaykichiskuna pichasqa kananpaq, ahinapin Señor Diosqa sumaq kawsaypi samarichisunkichis”, nispa (Hechos 3:19).
Marthan willakun: “Wawayqa apachimuwashallarqanmi Qhawaq ¡Rikch’ariy! revistakunata, pisi-pisimantan Jehová Diosman qayllaykapurqani. Aswan sasaqa karqan huchakuna ruwasqaymanta perdonta mañakuymi. Ichaqa orakuspaymi rogakurqani perdonawananpaq. ¡40 watamantan kutimpurqani! Chayqa admirakunapaqmi. Askha wataña Diosmanta karunchasqa kashanki chaypas, payqa suyashasunkin munakuywan chaskinasuykipaq llaqtanpi kapunaykipaqpas”, nispa.
Astawan yachanaykipaq
QHAWAQ (JUÑUNAKUYPI ESTUDIANAPAQ)
¿Imaynatan Dios pampachan?
Diosqa sonqomanta arrepientekuqtaqa perdonanmi. Chaytan yachanchis Davidtapas Manasestapas Dios perdonasqanwan.
VIDEOKUNA
Chinkapuq churi kutimpun
Wakin wayna-sipaskunan mana allin amigokunawan juñukusqankurayku, manaña Bibliaq nisqanman jinañachu kausanku. Kay videopin yachasun ima peligrokunapi wayna-sipaskuna tarikusqankuta.
