HUK T’AQA
“Chinkasqa ovejakunatapas maskhampusaqmi”
¡Huk ovejan chinkarqon! Tropanwan kuska mikhushaspan mana reparaylla t’aqarukun. Chay ovejaqa salqa animalkunaq kasqan wayq’okunapiñan tarikun mana piqpa qhawarisqan, ñan intipas chinkaykapushanña. ¡Imapiraqmi tarikunqa! Ichaqa chayllamanmi michiqqa chayan, rikurqospataq phawaylla aypan, hinan marq’ayninpi wasinman apakanpun.
ASKHA kutipin Jehová Diosqa michiqwan tupanachikun. Bibliapin niwanchis: “Ñoqa kikiymi ovejaykunata maskhaspa michikapusaq”, nispa (Ezequiel 34:11, 12).
‘Ovejaykunatan cuidasaq’
¿Pikunan kanku Diospa ovejankuna? Payta munakuqkuna payta adoraqkunan. Biblian nin: “Hamuychis, [...] Kamaqninchis Señor Diosman qonqorikusunchis. Paymi Diosninchis, ñoqanchistaq llaqtan kanchis, michinanpi [michinan] ovejankunan kanchis”, nispa (Salmo 95:6, 7). Jehová Diosta adoraqkunaqa michiqninwan kuskan riyta munanku, chaytan ruwanku ovejakunapas. Ichaqa mayninpiqa Diosta serviqkunapas ovejakuna hinan karunchakunku otaq chinkapunku (Ezequiel 34:12; Mateo 15:24; 1 Pedro 2:25). Chaywanpas Jehová Diosqa pipas t’aqakuqtaqa manan mana kutimuqpaq hinachu qhawarin.
¿Michiqniykita hinallatapunichu Jehová Diosta qhawarishanki? Kay tiempopi, ¿imaynatan huk michiq hina Jehová Dios cuidawanchis?
Espiritual mikhunawanmi mikhuchiwanchis. Jehová Diosmi nin: “Allinnin q’achutan mikhuchimusaq”, nispa. Nillantaqmi: “Q’achuq kasqanpin kanqaku, chaypiraqmi samaraykunqaku, sumaq q’achutataq mikhunqaku”, nispa (Ezequiel 34:14). Jehová Diosqa tiempollanpin imaymana clase espiritual mikhunata qowanchis. Yaqapaschá huk revista huk discurso otaq huk videopas orakusqaykiman kutichiynin karqan. ¿Jehová Diospas yanapashasunkiman hinachu sientekurqanki?
Pakaykuwanchis yanapaykuwanchis. Jehová Diosmi prometewanchis: “K’itakuqtapas kutichikampusaqmi, chakin p’akisqatapas chaqllaykusaqmi, onqosqatapas hampiykusaqmi”, nispa (Ezequiel 34:16). Jehová Diosqa kallpatan qon pisi kallpayoqkunaman llakiq ñit’isqan kaqkunamanpas. Pipas k’iriqtinqa hampinmi, iñiqmasinña k’irinman chaypas chaytan ruwan. Payqa chinkasqakunatan yanapan tropanman kutimpunankupaq, yanapallantaqmi pisipaq qhawarikuqkunatapas.
Chinkakuqtinchisqa maskhawanchismi. Jehová Diosmi nin: “Hinantinman[mi] ch’eqeykurqanku, chaymantan qatikampusaq”, nispa. Prometellantaqmi: “Chinkasqa ovejakunatapas maskhampusaqmi”, nispa (Ezequiel 34:12, 16). Jehová Diosqa manan mayqen chinkaq ovejatapas mana kutimpuqpaq hinaqa qhawarinchu. Payqa reparanmi chinkaq ovejakunataqa chaymi maskhaq rin, tarimuspataqmi anchata kusikun (Mateo 18:12-14). Cheqaq serviqninkunataqa “qankunan michinay ovejaykuna kankichis” nisparaqmi ninpas (Ezequiel 34:31). Chaykunamanta huknin ovejanmi qanqa kanki.
Jehová Diosqa manan mayqen chinkaq ovejatapas mana kutimpuqpaq hinaqa qhawarinchu. Payqa anchatan kusikun tarispaqa
“Imaynan ñawpaq kawsayniyku karqan chay hina kunanpas kachun”
¿Imaraykun Jehová Dios “ñoqaman kutimpuway” nispa nisunki? Kusisqa kanaykita munaspan. Paymi ovejankunaman prometen: “Paranan mitapin saminchay parata chayachisaq”, nispa (Ezequiel 34:26). Manan yanqachu chaytaqa riman. Ñachá chaykunataqa repararqankiña.
¿Imaynan sientekurqanki chayllaraq Jehová Diosta reqsishaspayki? ¿Yuyariwaqchu sutinmantapas promesankunamantapas yachaspayki imayna sientekusqaykita? ¿Imayna kallpachasqaraqmi tarikurqanki asambleapi iñiqmasikunawan kaspa? Bibliamanta runakunawan rimaspapas imayna kusisqaraqchá wasiykimanqa kutipuq kanki.
Atiwaqmi chhaynata wakmanta sientekuytaqa. Ñawpa tiempopi Diosta serviqkunan orakurqanku: “Señor Diosníy, qanman kutirichiwayku, hinan kutirimpusaqku, imaynan ñawpaq kawsayniyku karqan chay hina kunanpas kachun”, nispa (Lamentaciones 5:21). Jehová Diosqa kutichimurqanmi mañakusqankuman, hinan llaqtanqa wakmanta kusikuywan servirqanku (Nehemías 8:17). Chhaynatan Diosqa qanwanpas ruwanqa.
Chaywanpas Jehová Diosman kutimpuyta munaqkunapaqqa kanqan sasachakuykuna. ¿Mayqenkunan chaykuna? ¿Imaynatan atipankuman? Yachasun.
Astawan yachanaykipaq
IMAYMANATA YACHANAPAQ VIDEOKUNA
Jehová Diospa testigonkuna - Iñiyninkuta ruwaywan rikuchinku, juj kaq: Tutayaqmanta lloqsimunku
Diospa llaqtanmanta historia, paykunaqa Bibliamantan astawan yachayta munaranku jujkunaña jark’akuqtinkupas. Allin ejemplon kanku Dios serviyninkupi.
IMAYMANATA YACHANAPAQ VIDEOKUNA
