¿YACHANKICHU pin kay warmi kay qharikunapas? Warmiqa Jesuspa reqsisqan María Magdalenan. Yuraq p’achawan p’achasqa runakunaqa angelkunan. Jesuspa cuerponta churasqanku aya p’anpanatan Mariaqa qhawashan, ichaqa ¡manan kanchu Jesuspa cuerpon! ¿Pin aparun? Chaymantan yachasun.

Jesuspa wañusqan qhepatan, sacerdotekuna Pilatota ninku: ‘Kawsashaspan Jesusqa niran kinsa p’unchaymantan kawsarimusaq, nispa. Chay rayku aya p’anpanata qhawachiy. ¡Chaymi qatikuqninkunaqa mana atinqakuchu Jesuspa cuerpon apayta, kawsarinmi nispa ninankupaq!,’ nispa. Chaymi Pilatoqa kamachin soldadokunawan qhawachinankupaq.

Jesuspa wañusqan kinsa p’unchay qhepatan, Jehová Diospa angelnin tutallamanta rikhurin. Aya p’anpana wisq’aq rumitan tanqan. Sinchita mancharikuspan soldadokunaqa mana kuyuriytapas atinkuchu. ¡Aya p’anpanata qhawaqtinkun, Jesuspa cuerponqa manaña kasqachu! Wakin soldadokunan llaqtata rispa sacerdotekunaman willamunku. ¿Imatan ruwanku kay millay sacerdotekuna? Llullakunankupaqmi paganku. ‘Qatikuqninkunan aparunku puñunaykukama ninkichismi,’ nispan yachachinku.

Chaykaman Jesuspa reqsisqan warmikunaqa aya p’anpanata rinku. ¡Ch’usaqtan tarinku! Chayllamanmi rikhurin k’anchashaq p’achayoq iskay angelkuna. ‘¿Ima raykun Jesusta kaypi maskhankichis?’ nispan tapunku. ‘Payqa kawsarinmi. Usqhayta rispa qatikuqninkunaman willamuychis,’ ninkun. Phawayllan paykuna rinku. Ñanpin ichaqa huk runa paykunata sayachin. ¡Jesusmi chay runaqa! ‘Rispa willamuychis qatikuqniykunaman,’ ninmi.

Jesusqa kawsashanmi, kunallanmi tupamuyku, nispa warmikuna willaqtinmi qatikuqninkunaqa mana creenkuchu. ¡Juanwan Pedrowanmi aya p’anpanaman phawanku, ch’usaqtan ichaqa tarinku! Paykuna ripuqtinmi María Magdalenaqa qhepakun. Chaymi aya p’anpanata qhawarispa rikun iskaynin angelkunata.

¿Iman suceden Jesuspa cuerponta? Diosmi ch’usaqyachin. Diosqa manan ñawpa aycha cuerponpichu Jesusta kawsarichiran. Espíritu cuerpotan qon, angelkunaq cuerponta hina. Qatikuqninkunaman kawsarisqanta rikuchinanpaqmi ichaqa, aycha cuerpopi rikhurin.