KAY munay warmiqa Marian. Nazaret llaqtapi tiyaq israelitan. Diosqa yachanmi allin warmi kasqanta. Chay raykun Gabriel sutiyoq angelninta kachamuran Mariawan rimananpaq. ¿Imaninmi Gabriel Mariata? Chaymanta yachasun.

‘Diospa ancha saminchasqan warmi, napaykuykin, Jehová Diosmi qanwan kashan,’ ninmi Gabriel. Mariaqa manan hayk’aqpas chay angelta rikuranchu. Llakikunmi paypa nisqanta mana entiendesqan rayku. Gabrielmi ichaqa Mariaq sonqonta thak niyachin.

‘Ama manchakuychu María. Jehová Diosmi sumaqta qhawarisunki. Chay raykun qanpaq sumaqta ruwanqa. Wawayoqmi kanki. Chay wawatan Jesús nispa sutichanki,’ nispa.

Nillantaqmi: ‘Hatunmi kay wawa kanqa, hanaq pachapi Diospa Churin nispan sutichasqa kanqa. Jehová Diosmi Davidta hina kamachikuqta churanqa. ¡Jesusmi ichaqa wiñaypaq kamachikunqa, kamachiyninqa manan hayk’aqpas tukukunqachu!,’ nispa.

María tapun: ‘¿Imaynatan kaykuna sucedenman? ¿Imaynapin wawayoq kayman qhariwan manaraq casarakushaspay?,’ nispa.

‘Diospa atiyninwanmi chayqa ruwakunqa,’ ninmi Gabriel. ‘Chaymi wawaqa Diospa Churin nispa sutichasqa kanqa.’ Chaymanta nin: ‘Yuyariy familiayki Elisabetta. Payañan wawayoq kananpaq nirankun. Paypas wawayoqmi kanqa. Rikusqayki hina, Diospaqqa manan imapas mana ruway atiyqa kanchu,’ nispa.

Chaymi Mariaqa nin: ‘¡Jehová Diospa kamachinmi kani! Nisqaykiman hina ruwachun,’ nispa. Chaymantan angelqa ripun.

Elisabetta visitaqmi Mariaqa phawan. Mariaq kunkanta uyarispan, Elisabetpa wiksanpi wawaqa kusikuymanta p’itan. Elisabetqa santo espirituta chaskispa Mariata nin: ‘Qanmi llapan warmikunamanta aswan saminchasqa warmi kanki,’ nispa. Kinsa killa hinan Mariaqa Elisabetta tiyapayan, chaymantan kutipun Nazaretman.

Ñan Mariaqa casarakunqaña José sutiyoq runawan. Wawayoq kananta yachaspan Joseqa manaña munanchu Mariawan casarakuyta. Chaymi Diospa angelninqa Joseta nin: ‘Ama manchakuychu Mariawan casarakuytaqa. Diosmi paymanqa wawata qon,’ nispa. Chaymi Joseqa Mariawan casarakun, iskayninkutaq suyanku Jesús nacenanta.