¡DANIELQA sasachakuypin kashan! ¡Ichaqa manan leonkunaqa imananpaschu! ¿Ima rayku? ¿Pin Danielta wikch’uyuran leonkunaq kasqanman? Chaymanta yachasun.

Chay tiempopi Babilonia kamachiqqa Darío sutiyoq kamachikuqmi. Payqa sumaqtan Danielta rikun yachayniyoq allin runa kasqan rayku, chaymi kamachikuyninpi allin reqsisqa kamachikuq kananpaq churan. Chay raykun huk runakuna Danielta cheqnikuranku chaymi kayta ruwanku:

Dariota ninku: ‘Kamachiqniyku, llapaykun munayku 30 p’unchaypaq mosoq kamachikuy qonaykita, chay tiempopin qanllaman llapa runa mañakunan, manan pipas huk diosman nitaq huk runamanpas mañakunanchu. Kamachisqaykita mana kasukuqqa leonkunaman wikch’uykusqan kanqa,’ nispa. Darioqa manan yachanchu ima rayku munanku chhayna kamachikunanta. Allin kananpaq yuyaykuspan payqa kay kamachikuyta qelqan. Kamachikuqpa kamachisqanqa manan t’ikrakunmanchu.

Chayta uyarispan Danielqa, wasinta rispa costumbrenman hina Jehová Diosmanta mañakun. Millay runakunaqa yacharankun Daniel Jehová Diosman mañakuyninta mana saqenanta. Chayta yachaspan paykunaqa kusikunku, Danielmanta librakunankupaq yuyaykuspa.

Chaykunaq sucedesqanta yachaspan Darioqa anchata llakikun. Manan kamachikuy qosqanta t’ikrayta atinmanchu, chaymi kamachin leonkunaq t’oqonman Danielta wikch’uyunankupaq. Darion ichaqa Danielta nin: ‘Tukuy sonqoykiwan servisqayki Diosqa qespichisunkin,’ nispa.

Chay tutan Darioqa anchata llakikuspa mana puñuytapas atinchu. Tutallamantan usqhaylla rin leonkunaq t’oqonta, kaypi rikusqayki hina. Paymi qaparin: ‘¡Daniel, kawsaq Diospa kamachin! ¿Qespichisunkichu leonkunamanta servisqayki Dios?,’ nispa.

Danielmi kutichin: ‘Diosmi angelninta kachamun, paymi leonkunaq siminta wisq’an mana mikhuwananpaq,’ nispa.

Anchatan kamachikuqqa kusikun. T’oqomantan Danielta horqochin. Chay leonkunaq kasqanmantaq wikch’uyachin Danielpa awqankunata. Manaraq pampaman chayashaqtinkun leonkunaqa chay runakunata hap’ispa tullunkutaraq p’akinku.

Chaymantan Darioqa kamachisqan suyupi llapan llaqtakunaman qelqan: ‘Llapaykichis respetaychis Danielpa Diosninta. Payqa hatun milagrokunatan ruwan. Paymi Danielta qespichiran leonkunaq mikhunanmanta,’ nispa.