¿IMANISHANMI kay sipascha? Jehová Diospa profetan Eliseomanta rimapayashan, Jehová Diospa yanapayninwan imaymana ruwasqanmantawan. Kay warmiqa manan Jehová Diosmanta yachanchu, payqa manan israelitachu. Chhaynaqa, ¿ima raykun kay sipascha kay warmiq wasinpi kashan?, chaymanta yachasun.

Kay warmiqa Siria llaqtayoqmi. Paypa qosanmi Naamán, Siria ejercitopi umalliq. Siria runakunan Israelmanta apanku kay sipaschata, chaymi payqa Naamanpa warminta sirven.

Naamanqa lepra onqoyniyoqmi. Kay onqoyqa cuerpopi aychatapas urmachinmanmi. Kaytan kay sipascha nishan: ‘Israelpi Jehová Diospa profetanman rinman patronniy chayqa, hanpinmanmi lepra onqoyninmanta,’ nispa. Chaytan willanku warmiq qosanman.

Naamanqa qhaliyaytan munan; chaymi rin Israelta. Chayman chayaspan rin Eliseoq wasinta. Eliseon kamachinwan willachin Jordán mayuta rispa chaypi qanchis kutita Naamán bañakunanpaq. Chaywan sinchita phiñakuspan Naamanqa nin: ‘¡Llaqtaypi mayukunan aswan allin Israelpi mayqen mayumantapas!,’ nispa. Chayta nispan kutiripun.

Huknin kamachinmi nin: ‘Señor, imatapas sasa ruwanata Eliseo kamachisunkiman chaypas, ¿manachu kasukuwaq? ¿Ima raykun mana kasukunkichu paypa nisqanta?,’ nispa. Chaymi Naamanqa kamachinta kasuspa Jordán mayuman qanchis kutita chinkaykun. ¡Chayta ruwaqtinmi aychanqa sumaqta pichakun!

Anchatan Naamanqa kusikun. Eliseoq wasinman kutispan nin: ‘Kunanqa allinta yachani Israelpa Diosnin Allpantinpi sapallan cheqaq Dios kasqanta. Chay rayku, ama hina kaspa, chaskiykuway kay regalo apamusqayta,’ nispa. Eliseo nin: ‘Manan, manan chaskiykimanchu,’ nispa. Eliseoqa yachanmi chay regalo chaskiyqa mana allin kasqanta, Jehová Diosmi hanpin Naamantaqa. Eliseoq kamachin Guejazin ichaqa munan chay regalota.

Chaymi Naamán ripuqtin Guejaziqa qhepanta phawan aypanankama. ‘Eliseon kachamuwashan, kunallanmi visitankuna chayaramun paykunapaqsi regaloykita huk chikallanta qoykuwanki,’ nispa. Manan chayqa cheqaqchu. Naamanqa manan yachanchu llullakusqanta, chaymi regalo apasqanmanta wakinta qon.

Guejazí kutimunanpaqqa, ñan Eliseoqa yachanña ima ruwasqanta. Jehová Diosmi paymanqa willanña. Chaymi nin: ‘Chay ruwasqaykimanta, Naamanpa lepran qanta hap’isunki,’ nispa. ¡Chaymi suceden kaq ratopacha!

¿Imatan chaymanta yachanchis? Chay sipascha hinan ñoqanchispas Jehová Diosmanta huk runakunaman willananchis. Chayqa allintan yanapanman. Chaymantapas, manan qallariypi hatunchakuq Naamán hinachu kananchis, aswanmi Jehová Diospa kamachinkunata kasukunanchis. Chaymantapas, manan Guejazí hinaqa llullakunanchischu. Askhatan Bibliamantaqa yachanchis, ¿riki?