JERUSALENPI David kamachiyta qallariqtinmi, Jehová Diosqa askha kutita yanaparan maqanakuykunapi atipananpaq. Jehová Diosqa prometeranmi Canaán allpata israelitakunaman qonanpaq. Chaymi Jehová Diospa yanapayninwan chay allpata chaskiranku.

Davidqa allintan kamachin. Payqa Jehová Diostan munakun. Chay raykun Jerusalenta atipaspa hina, Jehová Diospa rimanakuynin arcata chay llaqtaman apan. Yupaychana wasita ruwayta munan arcata chaypi churananpaq.

Watakuna qhepatan Davidqa hatun huchapi urman. Payqa yachanmi huk runamanta imapas qechuyqa hucha kasqanta. Huk tardetan kamachikunan wasi patapi purikushaspa rikusqa sumaq rikch’ayniyoq warmita, Bat-seba sutiyoqta, paypa qosanqa Davidpa soldadon Uriasmi.

Davidqa anchatan Bat-sebata munapayan, chaymi kamachikunan wasiman waqyachin. Paypa qosanqa maqanakuypin kashan. Chaymi Bat-sebawan puñukun, chaymantan yachan Bat-sebaq wiksallikusqanta. Chay raykun Davidqa sinchita llakikun, ejercitonpi umalliq Joabtan kamachin Uriasta ñawpaqman churananpaq, chaypi maqanakuspa wañunanpaq. Urías wañuqtinmi, Davidqa Bat-sebawan casarakun.

Jehová Diosqa sinchitan phiñakun Davidpaq. Chaymi Natanta kachan huchanta reparachinanpaq. ¿Rikushankichu kaypi Natanta Davidtawan? Davidqa anchatan pesapakun ruwasqanmanta, chay raykun Jehová Diosqa mana wañuchinchu. Kaytan ichaqa nin: ‘Kay millay ruwasqaykimantan wasiykipi askha sasachakuykuna kanqa,’ nispa. ¡Arí, hatun sasachakuykunapin Davidqa tarikun!

Ñawpaqtaqa, Bat-sebaq wawanmi wañun. Chaymantan Davidpa phiwi churin Amnón panan Tamarwan puñun mana munashaqtin. Chay ruwasqanmanta phiñakuspan Davidpa churin Absalonqa Amnonta wañuchin. Chay qhepamantaq Absalonqa runakunaq sonqonta suwan Israelpi kamachiqta churanankupaq. Maqanakuypi David atipaqtinmi Absalonqa wañun. Arí, Davidqa sinchitan ñak’ariran chaykunawan.

Kay sasachakuykuna ukhupin Bat-sebaqa Salomonta wachakun. David machuña, onqosqa kashaqtinmi churin Adoniasñataq kamachiq kananpaq hatarin. Chaymi Davidqa wakyachin sacerdote Sadocta, churin Salomonpa umanman aceiteta hich’ananpaq kamachiq kasqanta yachanankupaq. Chay qhepallamanmi Davidqa wañun 70 watanpi. 40 watan kamachiran. Kunanqa Salomonmi kamachikun.