SASACHAKUYKUNAPI tarikuspan israelitakunaqa Jehová Diosta waqyakunku. Mañakusqankuta uyarispan payqa churan mana manchakuq allin umalliqkunata. Juezkuna nispan Bibliaqa sutichan. Ñawpaq kaq juezqa Josué karan, qhepanmantaq: Otniel, Aod, Samgarpiwan. Karanmi Israelpi yanapaq iskay warmikunapas hukninmi Débora huknintaq Jael.

Deboraqa profetisan karan. Jehová Diosmi ñawpaqmanta willan imapas sucedenanta, payñataq runakunaman willan. Deboraqa Juezllataqmi. Orqo patapi palmera sach’aq chakinpi tiyan, chaytan runakuna rinku sasachakuyninku allichaypi yanapananpaq.

Chay tiempopiqa Jabinmi Canaán suyupi kamachiq. 900 carretankunan karan maqanakunapaq. Askhan ejercitonpi soldadonkuna, chaymi wakin israelitakunaqa manchakuymanta Jabinta servinku. Sisaran Jabinpa ejercitonpi umalliqqa.

Huk p’unchaymi Débora Baracta nin: ‘Jehová Diosmi kayta nin: “Chunka waranqa runakunantin riy Tabor monteta. Chaymanmi pusamusaq Sisarata. Chaypin yanapasayki Sisaratapas ejercitontapas atipanaykipaq,”’ nispa.

Baracmi Deborata nin: ‘Ñoqawan riqtiykiqa risaqmi,’ nispa. Deboraqa rinmi, kaytan ichaqa Baracta nin: ‘Manan qanchu hatunchasqa kanki maqanakuypi atipasqamanta, Jehová Diosmi huk warmiwan Sisarata wañuchinqa,’ nispa. Nisqanman hinan suceden.

Sisaraq soldadonkunawan maqanakunanpaqmi Tabor orqomanta Baracqa urayamun. Qonqayllamantan Jehová Diosqa sinchita parachimun chaymi unu hunt’aqtin askha awqanku heq’epaspa wañunku. Sisarataq carretanmanta uraykuspa ayqekun.

Chay qhepallamanmi Sísara Jaelpa karpanman chayan. Payqa karpanman haykuchispan lecheta ukyachin. Chaymi Sisarata puñuchin. Chaymantan Jaelqa Sisaraq umanpi estacawan takaspa wañuchiran. ¡Barac hamuqtintaq, Jael Sisarata wañusqata rikuchiran! Chaywanmi hunt’akuran Deboraq rimasqan.

Kamachiq Jabintapas wañuchiqtinkun israelitakunaqa unay tiempo thakpi kawsanku.