Rey Ajabmi palacionpa ventananmanta rikurqan Nabotpa chajranta. Jinan chay chajrata rantiyta munarqan. Nabotmi ichaqa Diosta kasukuspa mana vendeyta munarqanchu. ¿Imarayku? Jehová Diosmi kamachirqan: “Tayta-mamaykimanta chaskisqayki herenciataqa aman vendenkichu”, nispa. ¿Respetarqanchu Ajab Nabotpa decidisqanta? Manan, aswanmi sinchita phiñakuspa cuartonpi wisq’arukuspa mana mijuytapas munarqanchu.

Jinan Ajabpa esposan Jezabelqa nirqan: “Qanmi Israelpi rey kanki, chhaynaqa ima munasqaykitan jap’ikuwaq. Noqan chay jallp’ata qosayki”, nispa. Chaymi llaqtapi umallikunaman cartata apachirqan. Chaypin nirqan: “Runakuna tumpachunku: Nabotqa Diostan ñakan, nispa. Chhaynapi rumiwan ch’aqespa wañuchinankupaq”, nispa. Jinan umallikunaqa chayta ruwarqanku. Chay qhepamantaq Jezabelqa Ajabta nirqan: “Nabotqa wañusqan kashan. Kunanqa chajranta jap’ikapuy”, nispa.

Jezabelqa manan Nabotllatachu wañuchirqan, aswanpas Jehová Diosta munakuq askha runakunatawanmi. Jinaspapas payqa idolokunatan adorarqan. Jehová Diosmi ichaqa Jezabelpa ruwasqanta rikumusharqan. Chhaynaqa, ¿imatan ruwarqan?

Ajabpa wañupusqan qhepamanmi wawan Jehoram rey karqan. Jinan Jehová Diosqa Jehuta kacharqan Jezabelta familiantawan castigananpaq.

Jehuqa carretanpin Jezabelpa tiyasqan Jezrel llaqtaman rirqan. Jehoramtaq carretanpi aypamurqan Jehuwan parlananpaq. Tupaqtinkun Jehoramqa tapurqan: “¿Sumaqpichu jamushanki?”, nispa. Jehutaq nirqan: “¿Imaynan sumaqpi jamushayman mamayki Jezabel millaykunata  ruwashaqtin?”, nispa. Jinan Jehoramqa kutirimurqan ayqekunanpaq, Jehutaq flechaspa wañurachirqan.

Chaymantan Jezabelpa palacionman rirqan. Jamunanta yacharuspan Jezabelqa uyanta pintakurqan, chujchantapas ñaqch’akurqan, altos ventanamanta qhawamuspataq suyarqan. Jehú chayaqtintaq Jezabelqa millayta k’amirqan, Jehutaq Jezabelwan kashaq runakunata kamachirqan: “¡Wijch’uykamuychis!”, nispa. Jinan ventananmanta tanqaymuqtinku pampaman urmaykamuspa wañurqan.

Chaymantan Jehuqa Ajabpa 70 wawankunata wañuchirqan, Baal adoraytapas chinkachirqanmi. Diosqa tukuy ruwasqanchistan rikumushan, tiempollanpitaqmi millay ruwaqkunata castiganqa.