Egiptopi tiyashaqtinku Jacobpa familianta “Israel runakuna” nispa nirqanku. Jacobpas Josepas wañupusqanku qhepamanmi juj faraonñataq kamachikuyta qallarirqan. Chay faraonmi manchakurqan Israel runakuna astawan askhayasqanmanta. Chaymi paykunata esclavoman tukuchipurqan. Obligarqanmi ladrillokunata ruwanankupaq campopipas llank’anankupaq. Chhaynataña tratashaqtinkupas Israel runakunaqa astawanmi askhayasharqanku. Faraonmanqa manan chay gustarqanchu, chaymi kamachirqan llapa qhari wawakunata wañuchinankupaq. Chaywanqa anchatachá Israel runakunaqa manchakurqanku.

Israelmanta Jokébed sutiyoq warmin munay rijch’ayniyoq qhari wawata onqokurqan. Jinaspa wawanta mana wañuchinankupaq juj canastapi Nilo mayuq cantonpi churarqan. Miriamtaq imachus pasananta yachananpaq qayllallamanta qhawasharqan.

Faraonpa ususinmi chay mayuman bañakuq jamurqan, jinan canastapi rikurqan wawa  waqashaqta, chaymi khuyapayarqan. Jinan Miriamqa tapurqan: “¿Maskhampuykimanchu juj warmita kay wawata uywapunasuykipaq?”, nispa. Paytaq “arí” nispa nirqan. Chaymi Miriamqa mamanta pusamurqan, jinan faraonpa ususinqa nirqan: “Kay wawata uywapuway, pagapusaykin”, nispa.

Wawa wiñaqtinmi Jokebedqa faraonpa ususinman aparqan. Moisés sutitan churarqan, wawanta jinataq uywakapurqan. Moisesqa faraonpa wawan jinan wiñarqan, chaymi mana imanpas faltarqanchu. Chaywanpas payqa manan Jehová Diosta qonqarqanchu. Moisesqa yacharqanmi Israelmanta kasqanta, chaymi ajllakurqan Jehová Dios serviyta.

Moisesqa 40 watanpi kashaqtinmi llaqtamasinkunata yanapayta munarqan. Juj p’unchaymi Egipto llaqtayoq runa Israel runata maqasharqan, chayta rikuspan Moisesqa maqaspa wañurachirqan, jinaspa cuerponta aqopi p’amparqan. Chayta yachaspan faraonqa Moisesta wañuchiyta munarqan, chaymi Moisesqa Madián llaqtaman ayqekurqan. Chaypin Diosqa payta cuidarqan.