Moiseswan Aaronwanmi faraonman willarqanku Diospa nisqanta, nirqankun: “Manachus llaqtayta kacharinki chayqa, llaqtaykimanmi jatuchachaq ch’uspikunata kachaykamusaq”, nispa. Chay ch’uspikunaqa kanikuqmi kanku. Aqo jinaraqmi ch’uspikunaqa llaqtantinman junt’aykurqan. Israel runakunaq tiyasqanku Gosén llaqtapin ichaqa mana jujllapas karqanchu. Kay tawa kaq plagamanta wichaymanqa Egipto runakunallatan castigarqan. Faraonmi Moisesta valekurqan: “Diosmanta mañakuy ch’uspikunata chinkachinanpaq, jinan llaqtanta kacharisaq”, nispa. Dios chinkachiqtintaq faraonqa mana junt’arqanchu rimasqanwan. ¿Jayk’aqllapas kasukunmanchu?

Chay qhepamanmi Diosqa nirqan: “Sichus faraón llaqtayta mana kacharinqachu chayqa, llaqtanpi kaq animalkunan onqospa wañupunqaku”, nispa. Qhepantin p’unchaytaq Diospa nisqanman jina pasarqan, Israel runakunaq animalninmi ichaqa mana wañurqanchu. Chaywanpas faraonqa manan kasukurqanchu.

Jinan Diosqa Moisesta nirqan: “Faraonpa ñaupaqenpin usphata wayraman jach’inki”, nispa. Chay usphan cielopi ch’eqerispa Egipto runakunaq patanman urmaykurqan. Jinan runakunaq animalkunaq cuerponpi “lleq” nishaq heridakuna rijurirqan. Chaywanpas faraonqa manan kacharirqanchu Israel runakunata.

Jujmantan Diosqa Moisesta kacharqan faraonta nimunanpaq: “Llaqtayta mana kacharisqaykiraykun  paqarin chijchichimusaq”, nispa. Jinan Diosqa chijchichimurqan, rayota ninatawan chayachimurqan. Chayqa manan jayk’aqpas Egipto llaqtapiqa karqanchu. Llapa campokunatan q’ara pampaman tukuchirqan, Gosén llaqtatan ichaqa mana. Chaymi faraonqa nirqan: “Diosmanta mañakuy amaña chijchichimunanpaq, jinan ripunkichis”, nispa. Manaña chijchimuqtintaq faraonqa rimasqanwan mana junt’arqanchu.

Chaymi Moisesqa nirqan: “Kunanqa langostakunan llapa puchuq plantakunata mijupunqa”, nispa. Millonninpi langostakunan puchuq sach’akunata plantakunatapas mijupurqanku. Jinan faraonqa Moisesta valekurqan: “Jehová Diosmanta mañakuy langostakunata chinkachipunanpaq”, nispa. Jehová Diosqa chinkachirqanmi, faraonmi ichaqa mana kasukuqlla kasharqan.

Chaymantan Diosqa Moisesta nirqan: “Cieloman makiykita oqariy”, nispa. Jinan tutayapurqan, kinsa p’unchaymi Egipto llaqtapi nishu tutayaq kasqanrayku mana imatapas rikurqankuchu. Israel runakunapaqmi ichaqa wasinkupi k’anchay karqan.

Faraonmi Moisesta nirqan: “Ripuwaqchismi, ichaqa animalniykichista saqeychis”, nispa. Moisestaq nirqan: “Jehová Diosman ofrendata jaywanaykupaqmi animalniykutaqa apanaykupuni”, nispa. Jinan faraonqa sinchita phiñakuspa nirqan: “¡Lloqsiy kaymanta! ¡Jamuruwanki chayqa wañuchisaykin!”, nispa.