Juj tutan rey Nabucodonosorqa musphanata mosqokurqan, jinan mana puñuytapas atirqanchu. Chaymi watuqkunata wajachimuspa nirqan: “Mosqokusqayta explicawaychis”, nispa. Jinan paykunaqa nirqanku: “Reyníy, willawayku mosqokusqaykita”, nispa. Reytaq nirqan: “Qankuna willawaychis mosqokusqayta, mana willawaqtiykichisqa wañuchisaykichismi”, nispa. Paykunataq nirqanku: “Willawayku mosqokusqaykita, jinan explicasaykiku”, nispa. Reytaq nirqan: “Engañaytan munawankichis”, nispa. Jinan watuqkunaqa nirqanku: “Manan pipas mañakusqaykitaqa ruwayta atinmanchu”, nispa.

Jinan Nabucodonosorqa sinchita phiñakurqan, jinaspa kamachirqan llapa yachayniyoqkunata wañuchinankupaq. Chay pasaqtinqa Danielpas amigonkunapas wañunankun karqan. Chaymi Danielqa reymanta tiempota mañakurqan, jinaspa paypas amigonkunapas Diosmanta mañakurqanku. ¿Imatan Dios ruwarqan?

Danielmanmi rijuriypi willarqan reypa mosqokusqanta, explicarqantaq significasqanta. Jinan Danielqa reypa oficialninman rispa nirqan: “Ama wañuchiychischu yachayniyoqkunata, yachanin reypa mosqokusqanta”, nispa. Jinan oficialqa reyman pusarqan. Danielmi reyta nirqan: “Diosmi willarqasunki jamuq tiempopi imachus pasananta. Mosqoyniykipin rikurqanki juj imagenta, umanmi qorimanta kasqa, qhasqonwan makinkunawantaq qolqemanta, wijsantaq cobremanta, chakankunataq fierromanta, chakinkunataq fierromanta t’urumantawan. Jinan orqomanta qaqa ch’eqtakamuspa imagenpa chakinpi chayarqan jinaspa ñut’urqan, wayrataq phukurparirqan, jinan mana imapas karqanñachu. Chay qaqataq jatun orqoman tukuspa pachantinman junt’aykurqan”, nispa.

Chay qhepamanmi nirqan: “Gobiernoykin chay imagenpa umanqa, chay  qhepamanmi qolqewan tupaq juj gobierno kanqa. Chaymantataq cobrewan tupaq juj gobierno kanqa, chay qhepamantaq fierrowan tupaq gobierno kallanqataq. Ultimotataq juj gobierno kanqa fierro jina kallpayoq, mayninpitaq t’uru jina pisi kallpayoq. Chay qhepamanmi rikurqanki juj qaqata, chayqa Diospa gobiernontan representan. Chay gobiernon llapa gobiernokunata ch’usaqyachispa wiñaypaq kamachikunqa”, nispa.

Nabucodonosorqa Danielpa ñaupaqenpin pampakama qonqorikuspa nirqan: “Diosniykin mosqokusqaytaqa willarqasunki, manan mayqen diospas Diosniyki jinaqa kanchu”, nispa. Chay qhepamanmi Danielta churarqan yachayniyoq runakunata umallinanpaq, Babilonia provinciata kamachinanpaqpas. Jehová Diosqa uyarirqanmi Danielpa mañakusqanta ¿riki?