Salmos 106:1-48
106 ¡Jehová* Diosta jatunchaychis!*
Jehová Diosta “gracias” niychis,payqa sumaq sonqo Diosmi;+mana tukukuq munakuyninqa wiñay-wiñaypaqmi.+
2 ¿Pin Jehová Diospa ancha jatun ruwasqankunata willanman?
¿Pin jatunchanapaq jina ruwasqankunata reqsichinman?+
3 May kusisqan chaninta imatapas ruwaqkunaqa,may kusisqan allin kaqllata ruwaqkunaqa.+
4 Diosníy Jehová, llaqtaykita sumaqta qhawarispa yuyariway.+
Allinta qhawariway, mana allin kaqmanta libraway.
5 Chhaynapin ajllakusqayki runakuna jina sumaq sonqo kayniykita chaskisaq,+chhaynapin nacionniykiwan kuska kusisqa kasaq,herenciayki llaqtawan kuskan may kusisqa jatunchasayki.
6 Ñaupa taytayku jinan juchallikurqayku,+mana allinkunatan ruwarqayku,mana chanin kaqkunatan ruwarqayku.+
7 Ñaupa taytaykuqa pisipaqmi qhawarirqanku Egiptopi musphanapaq ruwaykuna ruwasqaykitaqa,*manan yuyarqankuchu may jatunchus mana tukukuq munakuyniyki karqan chaytapas,aswanmi paykunaqa Puka lamar-qocha qayllapi qan contra jatarirqanku.+
8 Diosmi ichaqa sutinrayku paykunata librarqan,+may jatun atiyniyoqchus kasqanta rikuchinanpaqmi paykunata salvarqan.+
9 Puka lamar-qochatan anyarqan, unutaq ch’akipurqan;chay lamar-qocha ukhuntan ch’aki aqo pampanta jina pusamurqan.+
10 Contranpi kaqkunaq makinmantan librarqan,+enemigonkuq makinmantan paykunata salvarqan.+
11 Unun contrankupi sayariqkunata p’ampapurqan,manan ni jujninkupas kausarqanchu.+
12 Chaywanmi paykunaqa promesankunapi iñirqanku,+jatunchay takikunatan paypaq takipurqanku.+
13 Ichaqa manaraq imapin imachus ruwasqankunata qonqapurqanku;+manataqmi paypa pusarinantapas* suyakurqankuchu.
14 Ch’in ladopi kashaspaqa aychankuq munasqanwanmi apachikurqanku;+ch’aki pampapi kashaspan Diosta pruebaman churarqanku.+
15 Diosqa qorqanmi paykunaq mañakusqankuta,chaymantan ichaqa wañuchiq onqoywan paykunata jap’ichirqan.+
16 Karpa-karpapi kashaspan Moisesta envidiakurqanku,Jehová Diospa ajllakusqan+ Aarontapas envidiakurqankun.+
17 Chayraykun jallp’aqa kicharikuspa Datanta p’ampapurqan,Abiramta paywan juñusqa kaqkunatapas p’ampapurqanmi.+
18 Ninan chay t’aqa runakuna ukhupi raurarirqan,ninan chay mana allin runakunataqa ch’usaqman tukuchipurqan.+
19 Horeb orqopi kashaspan juj torillota ruwakurqanku,runaq ruwasqan* idolomanmi k’umuykurqanku.+
20 Ancha jatun Diosninkuta jatunchanankutaqa,q’achuta mijuq torilloq rijch’aynintan yupaycharqanku.+
21 Libraqninku Diostan qonqapurqanku,+Egiptopi ancha jatun ruwaykuna ruwaqtan saqepurqanku.+
22 Cam runakunaq jallp’anpi musphanapaq ruwaykuna ruwaqtan,+Puka lamar-qochapi manchay ruwaykuna ruwaqtan qonqapurqanku.+
23 Diosqa paykunata tukuchinan patapiñan kasharqan,ajllakusqan Moisesmi ichaqa paykunarayku valekurqan,k’araq phiñakuyninta ama chayachimunanpaqmi valekurqan.+
24 Paykunaqa wijch’uykukurqankun chay munay jallp’ata,+promesa ruwasqanpipas manan iñirqankuchu.+
25 Sapankan karpankupi rimapakuyta qallarirqanku,+manan Jehová Diospa simintapas uyarikurqankuchu.+
26 Chaymi payqa makinta oqarispa jurarqan,ch’inneq ladopi paykunata tukuchinanpaqmi jurarqan.+
27 Mirayninkuta nacionkunaman entregananpaqmi jurarqan,llaqtakunaman ch’eqerichisqa kanankupaqmi jurarqan.+
28 Chaymantan paykunaqa Peorpi Baalta yupaychayta qallarirqanku,+wañusqakunaman jaywasqa sacrificiokunatan mijurqanku.
29 Imachus ruwasqankuwanmi Diosta phiñachirqanku,+jinan paykuna ukhupi wañuy onqoy mast’arikurqan.+
30 Finehasmi ichaqa jatarispa chanin kaqta ruwarqan,chaywanmi chay wañuy onqoyqa sayapurqan.+
31 Chayta ruwasqanraykun Diosqa chaninpaq qhawarirqan,wiñay-wiñaypaqmi payqa chaninpaq qhawarisqa kapurqan.+
32 Meribá* lado unupin paykunaqa Diosta phiñachirqanku,paykunaq causanpin Moisespas mana allinpi tarikurqan.+
33 Nishutan payta* phiñachirqanku,jinan payqa comunta rimarqan.+
34 Manan Jehová Diosta kasukurqankuchu,+llaqtakunata ch’usaqyachinankupaq kamachisqantan mana junt’arqankuchu.+
35 Aswanmi chay nacionkunawan chhaqrukurqanku,+chay llaqtakunaq ruwasqantan ruwarqanku.+
36 Chay llaqtakunaq idolonkunatan yupaycharqanku,+chay ruwasqankuqa trampa jinan paykunapaq karqan.+
37 Churinkunata ususinkunatawanmi supaykunaman sacrificiopi jaywarqanku.+
38 Sapa kutillanmi mana juchayoqkunaq yawarninta jich’arqanku,+churinkuq ususinkuq yawarnintan jich’arqanku,Canaán runakunaq idolonmanmi paykunata jaywarqanku;+mana juchayoq runakunaq yawarninwanmi jallp’ata qhellicharqanku.
39 Imakunachus ruwasqankuwanmi qhellichakurqanku,imachus ruwasqankuwanmi Diosta wasancharqanku.*+
40 Jinan Jehová Diosqa llaqtan contra phiñakurqan,herencian llaqtatan millakapurqan.
41 Yapa-yapamantan waj nacionkunaman entregarqan,+cheqnikuqnin runakunaq kamachisqan kananpaqmi entregarqan.+
42 Paykunataqa sinchitan chay enemigon runakuna ñak’arichiqku,manan imaynanmanta kacharichikuyta atiqkuchu.
43 Sapa kutillanmi Diosqa paykunata kacharichiq,+paykunan ichaqa yapa-yapamanta mana kasukuqkuchu;+mana kasukuq kasqankuraykun sarunchasqa kaqku.+
44 Diosqa rikusharqanmi ñak’arisqankuta,+uyarisharqanmi auxilio mañakusqankutapas.+
45 Allinninkupaqmi rimanakusqanta yuyariq,mana tukukuq jatun munakuyninpin paykunata khuyapayaq.+
46 Preso jap’iqninkuq sonqontan kuyurichiq,paykunata khuyapayanankupaqmi sonqonkuta kuyurichiq.+
47 Diosniyku Jehová, librawayku,+nacionkunamanta juñumuwayku,+chhaynapi ch’uya sutiykita jatunchanaykupaq,kusisqa sonqowan qanta jatunchanaykupaq.+
48 Jatunchasqa kachun Israelpa Diosnin Jehová Diosqa,wiñay-wiñaypaq alabasqa kachun.+
Llapa runakuna nichun: “¡Amén!”,* nispa.
¡Jehová* Diosta jatunchaychis!*
Uraypi willakuykuna
^ Chaypiqa “¡Aleluya!” nillanmantaqmi.
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
^ Chaypiqa “manan yuyaymanarqankuchu Egiptopi musphanapaq ruwaykuna ruwasqaykipi” nillanmantaqmi.
^ Chaypiqa “yuyaychaynintapas” nillanmantaqmi.
^ Chaypiqa “unuyachisqa metalmanta ruwasqa” nillanmantaqmi.
^ Meribá sutiqa “discutiy” otaq “churanakuy” ninantan nin.
^ Hebreo rimaypiqa “espiritunta” ninmi.
^ Chaypiqa “idolokunawanmi qhelli juchata ruwarqanku” nillanmantaqmi.
^ Chaypiqa “¡Chhayna kachun!” nillanmantaqmi.
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
^ Chaypiqa “¡Aleluya!” nillanmantaqmi.
