Efesios 3:1-21
3 Noqa Pabloqa Cristo Jesusrayku, qankuna waj nacionkunamanta kaqkunarayku iman presochasqa kashani.+
2 Yachasqaykichis jina, Diosmi qankunaq allinniykichispaq juj jatun llank’anata qowarqan,+ chhaynapi paypa ancha sumaq sonqo kayninta qankunaman reqsichinaypaq.
3 Arí, Diosmi pakasqa ch’uya yachayninta reqsichiwarqan, chaymanta wakintaqa ñan qelqamurqaykichisña kanpas.
4 Chhaynaqa, kay qelqamusqayta leespaykichisqa reparankichischá may tukuytachus Cristomanta pakasqa ch’uya yachayta entiendeni chayta.+
5 Ñaupa tiempopiqa manan pimanpas Diosqa chay pakasqa yachayta allintaqa reqsichirqanchu, kunanmi ichaqa santo espiritunwan allinta reqsichishan ajllasqa* apostolkunaman profetakunaman ima.+
6 Chay pakasqa yachayqa kaymi: Waj nacionkunamanta runakunan Cristowan jujllachasqa kasqankurayku allin willakuykunarayku ima paypa herencia chaskiqmasinkuna kanqaku, juj t’aqallataqmi* kanqakupas.+ Paykunaqa noqayku jinallataqmi Diospa promesankunatapas chaskinqaku.
7 Diosmi regalota jina qoykuwarqan ancha sumaq sonqo kayninta, chaymi noqaqa chay pakasqa yachaymanta willaq kamachi kapurqani, Diosqa atiyninta qowaspan chhayna sumaq kasqanta rikuchiwarqan.+
8 Arí, paymi ancha sumaq sonqo kayninta rikuchiwarqan+ llapa iñiqmasinchiskunamanta* aswan juch’uyllaña kashaqtiypas+ waj nacionniyoq runakunaman Cristoq mana tukukuq qhapaq kayninkunamanta allin willakuykunata willanaypaq,
9 imaynatachus Diosqa chay pakasqa ch’uya yachayman jina imatapas ruwashan chayta lliuman willanaypaqwan.+ Tukuy imaymanata kamaq Diosmi chay yachaytaqa ñaupa tiempomantapacha pakarqan;
10 chayqa karqan Diospa tukuy imaymanapi rikukuq yachaynin+ janaq pachapi gobiernokunaman autoridadkunamanpas iñiq t’aqawan kunan tiempo reqsichisqa kananpaqmi.+
11 Chayqa wiñay munayninman jinan karqan, chaytan payqa Señorninchis Cristo Jesuswan ruwarqan.+
12 Noqanchisqa paypi iñisqanchisraykun mana manchakuspa mana iskayaspa ima Diosman qayllaykushanchis.+
13 Chhaynaqa, amapuni pisipaychischu qankunarayku imaymanapi ñak’arisqaywanqa, qankuna jatunchasqa kanaykichispaqmi noqaqa ñak’arishani.+
14 Llapa chaykunaraykun noqaqa Tayta Diosman qonqorikuni,
15 paymi janaq pachapipas kay pachapipas llapa familiakunata paqarichirqan.
16 Payqa ancha qhapaq atiyniyoq Diosmi, chaymi paymanta mañakuni santo espiritunpa atiyninwan sonqoykichispi+ yuyayniykichispi ima kallpachanasuykichispaq,
17 iñisqaykichisrayku Cristopas munakuywan sonqoykichispi tiyananpaq.+ Chaymantapas iñiyniykichispi allin saphichasqa+ allin teqsichasqa+ ima kanaykichispaqmi mañakullanitaq,
18 chhaynapi qankunapas juj iñiqmasinchiskuna jina cheqaq kaqpa anchonta, largonta, altonta, ukhuntapas allintapuni entiendenaykichispaq.
19 Cristoq munakuyninqa+ tukuy yachaymantapas aswan jatunraqmi, chaymi Diosmanta mañakuni chay munakuyninta reqsinaykichispaq, chhaynapi Diospa imayna sumaq sonqochus kasqanwan junt’aykusqa kanaykichispaq.
20 Diosqa imaymanatan noqanchispi atiyninwan ruwan,+ imakunachus mañakusqanchismantapas piensasqanchismantapas mana creey atiytaraqmi payqa aswan askhata imatapas ruwanman.+
21 Chayrayku payqa jatunchasqa kachun; arí, iñiq t’aqawan Cristo Jesuswan ima imaymanata ruwasqanrayku wiñay-wiñaypaq payqa jatunchasqa kachun. Amén.*
Uraypi willakuykuna
^ Griego rimaypiqa “ch’uya” ninmi.
^ Chaypiqa “kaq cuerpoq partenkunallataqmi” nillanmantaqmi.
^ Griego rimaypiqa “ch’uya kaqkunamanta” ninmi.
^ Chaypiqa “Chhayna kachun” nillanmantaqmi.
