Deuteronomio 17:1-20
17 ”Toroykichispas ovejaykichispas onqosqa kanman, imanpas mana allin kanman chayqa, aman chaytaqa Jehová Diosmanqa jaywankichischu. Jehová Diosqa cheqnikunmi chay ruwaytaqa.+
2 ”Qankuna ukhupichus Jehová Diosniykichispa qosqan jujnin llaqtapi mayqen qharipas mayqen warmipas Jehová Diosniykichispa ñaupanpi mana allin ruwaykunata ruwanman, Diospa rimanakusqantachus p’akinman,+
3 kamachisqayta mana kasukuspachus+ waj dioskunaman pantanman, chaykunatachus yupaychanman, chaykunamanchus qonqorikunman, intiman, killaman, cielopi llapa kaqkunaman imachus qonqorikunman,+
4 chhaynatachus pipas willasunkichisman, chhayna rimaqtachus uyariwaqchis chayqa, allintan chaymanta tapuykachakunkichis cheqaqpunichus icha manachus chayta yachanaykichispaq. Cheqaqtapuni Israel llaqtapi chay sinchi mana allin ruway kanqa chayqa,+
5 llaqta punkumanmi chay mana allin ruwaq runataqa apamunkichis qhariña warmiña kanqa chaypas, chaypin rumiwan ch’aqespa wañuchinkichis.+
6 Ichaqa chay runataqa wañuchinkichis iskaypas kinsapas rikuqkuna kallaqtinmi,+ paykunaq willakusqanta uyarispan chaytaqa ruwakunqa. Jujllachus rikuq kanqa chayqa, manan chay runaqa wañunqachu.+
7 Rikuq runakunan ñaupaqtaqa ch’aqenqaku, chaymantataq llaqtantin runakuna ch’aqenqaku. Chhaynatan qankuna ukhumantaqa chinkachinkichis mana allin ruwayta.+
8 ”Mayqen llaqtaykichispipas wañuchinakuy kanman,+ jallp’a qechunakuypas kanman, maqanakuypas kanman, chaykuna jina ima problemapas kanman, manataq chayta allichayta atiwaqchischu chayqa, maytachus Jehová Diosniykichis ajllakunqa chay llaqtatan rinkichis.+
9 Chaypin Leví ayllu sacerdotekunaman, mayqen juezmanchus chay p’unchaykunapi llank’anan tupan chay juezman ima rinkichis,+ paykunamanmi chayta willankichis, paykunan chayta sut’inchanqaku.+
10 Jehová Diospa ajllakusqan llaqtapi imatachus nimusunkichis chayman jinan qankunaqa ruwankichis, llapa kamachisqankutan kasukunkichis.
11 Ima kamachikuytachus qhawachisunkichis, ima ruwanaykichispaqchus kamachimusunkichis chayman jinan ruwankichis.+ Aman paykunaq nisqankumantaqa lloq’emanpas ni pañamanpas rinkichischu.+
12 Pipas umata oqarispa mana kasukunqachu jueztapas Jehová Diosta serviq sacerdotetapas chayqa, wañuchisqan kanqa.+ Chhaynatan Israel llaqtamanta chinkachinkichis mana allin kaqta.+
13 Chayta uyarispan llaqtantin runakuna manchakunqaku, manataqmi pipas jatunchakunqañachu.+
14 ”Jehová Diospa qonan jallp’aman jaykuspachus, chaypi tiyashaspaykichischus niwaqchis: Imaynan muyuriqniyku nacionkunapi runakunapas reyniyoq kanku chhaynatan noqaykupas juj reyta ajllakuyta munashayku, pay kamachiwanankutan munashayku, nispa chayqa,+
15 Jehová Diosniykichispa ajllasqan runatan rey kananpaq churankichis.+ Llaqtamasiykichis runatan ajllankichis, wayqeykichistan churankichis, aman waj llaqtayoq runataqa ajllankichischu.
16 Chay reyqa aman askhatachu caballokunata juñunqa,+ aman Egiptomanpas runakunataqa kachanqachu astawan caballokunata rantiqtaqa.+ Jehová Diosqa sut’itan nirqasunkichis: Aman jayk’aqpas kay ñannintaqa kutimunkichischu, nispa.
17 Aman askha warmiyoqchu kanqa, chhaynapi sonqon ama Diosmanta karunchakunanpaq.+ Amallataqmi askhatachu qoritapas qolqetapas juñunqa.+
18 Rey kananpaq churasqa kaspan payqa kay kamachikuy qelqata sapaqta paypaq copiakunqa. Leví ayllu sacerdotekunaq waqaychasqan kamachikuy qelqamantan chayta copianqa.+
19 ”Chay copiasqanqa paypaqmi kanqa, chaytan tukuy kausasqan tiempo sapa p’unchay leenqa,+ chhaynapin Jehová Diosnin manchakuyta yachanqa, kasukunqan chaypi kaq llapa kamachikuykunatapas leykunatapas.+
20 Chaymantapas chayta ruwanqa chayqa, manan wayqenkunamanta aswan allinpaqchu qhawarikunqa, manan kamachikuy simimantaqa lloq’emanpas ni pañamanpas rinqachu, chhaynapin paypas churinkunapas unay watakuna Israel llaqtata kamachinqaku.
