2 Corintios 10:1-18
10 Noqaqa maytan munayman imakunachus nisqayta kasukunaykichista, qankunataqa Cristoq ejemplonta qatikuspan rimapayamushaykichis, payqa llamp’u sonqo sumaq sonqo iman.+ Wakinniykichispaqqa uya-uyapurapi kaspaqa común runa jinallas kani,+ cartakunallapis manchakunapaq jinaraq rimamuni.+
2 Qankunaman chayamunaypaqqa ojalayá cambiankumanña aychaq munayninman jinalla purinaykupaq piensaq runakunaqa, chhaynapi paykunata mana k’araqtachu anyanaypaq.
3 Noqaykuqa runalla kayku chaypas, manan runakunaq piensayninman jinachu guerrataqa ruwayku.
4 Maqanakunayku armakunapas manan kay pachamantachu,+ aswanpas Diospa qowasqanku atiyniyoq armakunan chaykunaqa,+ chhaynapi allin perqachasqa kaqkunata thuninaykupaq.
5 Arí, noqaykuqa llapa pantasqa piensaykunata, Diosmanta yachay contrapi jatariq lliu jark’anakunata iman thunishayku,+ chaymantapas tukuy ima piensaykunatan presochashayku, jinaspa Cristo kasukuqman tukuchishayku.
6 Chaymantapas preparasqan kashayku tukuy imapi kasukuq kasqaykichista rikuchiqtiykichis jina, pipas mana kasukuy munaqtaqa wanachinaykupaq.+
7 Qankunaqa jawallantan imatapas qhawarinkichis. Pipas mana iskayaspa “Cristoqmi kani” niqqa, kayta allinta yuyarichun: Noqaykupas Cristoqmi kayku.
8 Señormi atiyta qowarqanku qankunata iñiyniykichispi wiñachinaykupaq, manan thuninaykupaqchu,+ chay atiy chaskisqaykumanta anchataña alabakuyman chaypas, manan p’enqasqachu kayman.
9 Noqaqa manan munaymanchu cartakuna apachimusqaywan manchasqa kanaykichista.
10 Wakinsi nishankichis: “Cartakuna apachimusqallanpin manchakunapaq jinaraq k’araqta rimamun; kaypi kaspaqa común runa jinallan, rimaspapas yanqallatan imatapas riman”, nispa.
11 Chhayna rimaqkuna yachachunku kayta: Imaynatachus cartakunapi qelqamuyku chhaynallatataqmi chayamuspapas ruwasaqku.+
12 Noqaykuqa manan munaykumanchu alabakuqkunawan yupasqa kayta ni paykuna jina kaytapas.+ Chay runakunaqa imatachus allinpaq qhawarinku chayman jinallan paykuna kikinkuta juzgakunku, chhaynapitaq rikuchinku mana yuyayniyoq kasqankuta.+
13 Noqaykuqa manan mana tupawaqniyku llank’anamantachu alabakusaqku, aswanmi Diosmanta chaskisqayku llank’anallamanta; chay llank’anayku ukhupin qankunapas kashankichis.+
14 Qankunaman jamushaspaykuqa manan Diospa qowasqanku llank’anamanta jujtachu ruwarqayku, aswanmi noqayku karqayku Cristomanta allin willakuykunata ñaupaqta qankunaman chayachimuqkuna.+
15 Noqaykuqa Diospa qowasqanku llank’anapi imachus ruwasqaykumantan alabakushayku, manan jujkunaq ruwasqankumantachu. Chaymantapas noqaykuqa yachaykun iñiyniykichis wiñasqanman jina qankuna ukhupi imakunachus ruwasqaykuqa astawan wiñananta. Chaytaqmi noqaykuta kallpachawanqaku astawanraq
16 allin willakuykunata willanaykupaq, jinan chay willakuykunata apasaqku qankunamanta aswan karu llaqtakunamanraq, mana piqpa llank’asqan llaqtakunaman, chhaynapi mana jujkunaq llank’asqanmantachu alabakunaykupaq.
17 Diospa siminpi nisqan jina, “pipas alabakuqqa Jehová* Diosmanta alabakuchun”.+
18 Jehová* Diospa jatunchasqan runakunan+ allinpaq qhawarisqaqa kanqaku, manan paykuna kikinkuta jatunchakuqkunachu.+
Uraypi willakuykuna
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
