Kay 2020 watapin Jehová Diospa testigonkunaqa pachantinpi grabasqa asambleata qhawanqaku kaq killakunallapi: julio agosto killakunapi, chay jinaqa manan jayk’aqpas karanchu. Chaypaqmi 500 más rimaykunapi t’ijrakuran llapa asambleata. Chhayna jatun asambleaqa yaqa wata maspi jinan t’ijrakunman, ichaqa coronavirus onqoy kasqanwanmi 2020 watapaq “¡Kusisqalla kashaychis!” nisqa asambleata t’ijraqkunaqa yaqa tawa killallapi t’ijrayta tukururanku.

 Chaypaqmi qelqakunata t’ijraymanta encargakuqkunaqa rantiymanta encargakuqkunawan kuska llank’aranku. Qelqakunata t’ijraymanta encargakuqkunan repararanku mundontinpi t’ijraqkunaqa chay llank’anata ruwanankupaq imaymanata necesitasqankuta, astawanqa grabanapaq allin microfonokunata necesitasqankuta. Chaymi rantiymanta encargakuqkunaqa 1.000 microfonokunata rantiranku, jinaspa yaqa 200 t’ijrana wasikunaman apachiranku.

 Qolqeta ama nishuta gastanankupaqmi askhallanpiña microfonokunata rantiranku. Juj jawallaman juñuspataq chay microfonokunata paquetaspa mundontinman apachiranku. Chhayna askhanpi rantisqankuraykun sapanka microfonota yaqa 600 solesllawan rantiranku, chhaynapin yaqa 150.000 solesta jina ahorrakuran.

 Chay microfonokunataqa kay 2020 watapi abril mayo killakunapin rantispa apachiranku, chay killakunapiqa coronavirus onqoy kasqanraykun mana facilchu karan rantiypas apachiypas. Chaywanpas chay microfonokunaqa mayo killa tukuypaqqa ñan chayaranña llapa t’ijrana wasikunaman, wakin sucursalkunaman ima.

 Rantiymanta encargakuq Jay Swinney hermanonchismi nin: “Kay onqoykunaña kasharan chaypas microfonokunata vendeqkunaqa vendemuwarankupachan. Jehová Diospa yanapaynillanwanmi chaykunaqa ratulla ruwakuran pisi qolqellapaqtaq kanpas, chhaynapin t’ijraq hermanokunata yanaparayku chay asambleata rimasqanku simipi grabanankupaq”, nispa.

 Qelqakuna t’ijraymanta encargakuq Nicholas Ahladis hermanonchismi nin: “Qelqa t’ijraqkunaqa manan tiyasqanku wasimanta lloqsiyta atinkuchu, chaywanpas kusisqan chay microfonokunata chaskikuranku. Manaña ñaupaq jinachu t’ijraqmasinkuwan kuska llank’ashanku chaypas, allintan yanapanakuranku sapanka yachachikuykunata t’ijraspa grabaspa ima, jinallataq videokunatapas takikunatapas grabaspa, chaykunataqa ruwakuran 500 más simikunapin”, nispa.

 Ichaqa 2020 watapaq “¡Kusisqalla kashaychis!” nisqa asambleata hermanokuna rikunankupaqqa imaymanakunataraqmi ñaupaqtaqa ruwakuran, chaymantañan juj simikunapi t’ijraspa grabakuran. Chay microfonokunataqa rantikuran donacionpi churasqaykichis qolqewanmi, wakinniykichismi chay donacionkunata internetninta churashankichis donate.jw.org nisqapi.