Salmos 30:1-12
-
Llakikuy kusikuyman tukusqanmanta
-
Diospa sumaq sonqo kaynin wiñaypaq kasqanmanta (5)
-
Davidpa takin. Wasi inauguraymanta taki.
30 Jehová Diosníy, aysariwasqaykimantan jatunchasayki;manan munarqankichu llakipi tarikusqaywan enemigoykuna kusikunankuta.+
2 Diosnilláy Jehová, yanapawanaykipaqmi wajakamurqayki,qantaq sumaqta jampiwarqanki.+
3 Diosníy Jehová, Sepulturamantan* oqariwarqanki,+kausashaqllatan jap’iwarqanki.
Manan munarqankichu aya p’ampanaman jaykunayta.+
4 Junt’aq sonqo runakuna, allin sonqo runakuna,+Jehová Diosman takiychis,* jatunchay takikunata takiychis,ch’uya sutinmanta graciasta qoychis.+
5 Phiñakuyninqa juj ratullapaqmi,+sumaq sonqo kayninmi ichaqa wiñaypaq.+
Tardeyaykuytaqa yaqapaschá waqay kanqa,tutamantanmi ichaqa kusikuymanta qapariy kanqa.+
6 Thaj kausashaspan nirqani:
“Manan imapas kuyurichiwanqachu”, nispa.
7 Jehová Diosníy, khuyapayawasqayki tiempopin qaqata sayachiwarqanki,mana kuyuriq orqota jinan sayachiwarqanki.+
Noqamanta uyaykita pakaqtiykin may manchasqa tarikurqani.+
8 Diosníy Jehová, noqaqa wajakamushallarqaykin.+
Sapa kutillanmi Jehová Diospa khuyapayayninta mañakuq kani.
9 ¿Iman kanqa noqa wañuqtiy? ¿Imatan chaskiwaq aya p’ampanaman jaykupuqtiy?+
¿Ñut’u jallp’a yupaychasunkimanchu?+ ¿Polvo willanmanchu junt’aq kasqaykita?+
10 Diosnilláy Jehová, uyariykuway, khuyapayaykuway.+
Diosníy Jehová Dios, qan yanapaqniyqa kay.+
11 Llakikuyniytan tusuyman tukuchirqanki;qhasqa p’achaytan ch’utiwarqanki,kusikuywantaqmi sumaqta p’achachiwarqanki,
12 jatunchay takikunata mana ch’innispa takipunaypaqmi chayta ruwarqanki.
Jehová Diosníy, qantaqa wiñaypaqmi jatunchasayki.
Uraypi willakuykuna
^ Chaypiqa “Jehová Diospaq musicata tocaychis” nillanmantaqmi.
