Salmos 22:1-31
Takiqkunata pusariqpaq. “Pacha illarimuy taruka”* nisqaman jina. Davidpa takin.
22 Diosníy, Diosníy, ¿imaraykun saqerpariwanki?+
¿Imaraykun librawanaykipaq mana jamunkichu?
¿Imaraykun sinchi llakisqa wajakamusqayta mana uyarinkichu?+
2 Diosníy, p’unchay-p’unchaymi wajakamushayki,qantaq mana uyarimuwankichu.+
Tutakunapas mana upallakuspan wajakamushayki.
3 Chaywanpas qanqa ch’uya Diosmi kanki,+Israelpa yupaychaynintapas chaskishallankin.
4 Ñaupa taytaykuqa qanpin confiaqku,+qanpi confiasqankuraykun paykunata libraq kanki.+
5 Qanmantan wajakamuqku jinaspa librasqa kaqku,qanpin jap’ipakuqku, manataqmi p’enqaypichu qhepaqku.+
6 Noqan ichaqa kurulla kani, manan runachu.
Runakunaq p’enqachisqanmi, llaqtaq pisichasqanmi kani.+
7 Llapa rikuwaqkunan asipayawanku;+millaytan noqamanta rimanku,umankuta maywisparaqmi burlakuwanku.+
8 “Jehová Diospitaq jap’ipakun chayqa, ¡payyá librachun!
¡Munakun chayqa salvachunyá payta!”+ nispan rimanku.
9 Qanmi mamaypa wijsanmanta orqomuwarqanki,+qanmi mamaypa marq’ayninpi sumaqta uywawarqanki.
10 Nacesqaymantapachan qanman jap’ichisqa* karqani,mamaypa wijsanmantapachan qanqa Diosniy karqanki.
11 Amayá noqamantaqa karunchakunkichu,imaymana sasachakuykunan chayamushan,+manan pipas yanapaqniy kanchu.+
12 Askha malta torokunan muyuykushawan,+Basanmanta kallpasapa torokunan qayllaykamushawan.+
13 Noqa contran siminkuta jatuntaraq kicharinku,+qaparishaq león jinan, mijunanta llik’irpariq león jinan kashanku.+
14 Jich’asqa unu jinan kashani,tulluykunapas phawasqan kashan,sonqoypas chulluriq wira jinan kashan,+qhasqoy* ukhupin lliu chullurishan.+
15 Kallpaypas t’uru manka jinan ch’aki kashan,+qalluypas simiypin k’askasqa kashan.+
Aya p’ampanamanmi jaykuchipuwanki.+
16 Alqokunan muyuykushawanku,+suwakuna jinan muyuykushawanku,+león jinan chakiykunaman makiykunaman phawaykamushawanku.+
17 Tulluykunapas yupanallañan kashan.+
Paykunaqa* qhawamushallawankun, ñawillankupin kashani.
18 P’achaykunatan rakinakapunku,p’achaytan sorteanku.+
19 Diosníy Jehová, ama karullamantaqa qhawamuwaychu,+qanmi kallpay kanki, usqhaylla yanapawanaykipaq phawarimuy.+
20 Espadamanta libraway,vidayta alqokunaq sillunmanta* kacharichiy.+
21 Leonpa siminmanta libraway,+salqa torokunaq waqranmanta ayqechiway.
Diosníy, uyarimuway, qespichiway.
22 Sutiykitan wayqeykunaman willasaq,+runakuna ukhupin jatunchasayki.+
23 ¡Jehová Diosta manchakuqkuna, payta jatunchaychis!
¡Jacobpa miraynin runakuna, payta alabaychis!+
¡Israelmanta jamuq runakuna, payta anchata respetaychis!
24 Ñak’ariq runataqa manan jinatachu qhawarirqan,+pisichasqa runamantapas manan uyantaqa pakarqanchu.+
Chay runa wajarikuqtinqa uyarimurqanmi payqa.+
25 Askha runakuna ukhupin jatunchasayki,+qanta manchakuqkunaq ñaupanpin promesa ruwasqayta junt’asaq.
26 Llamp’u sonqokunaqa sajsanankukaman mijunqaku,+Jehová Diosta maskhaqkunaqa paytan jatunchanqaku.+
Wiñay kausay qankunapaq kachun.*
27 Kay pachaq k’uchunkunapi runakunan Jehová Diosta yuyarinqaku, jinaspa kutimpunqaku.
Llapa nacionkunapi familiakunan qanpa ñaupaykipi k’umuykunqaku.+
28 Kamachikuy atiyqa Jehová Diospan,+paymi llapa nacionkunata kamachiqqa.
29 Kay pachapi llapa qhapaqkunan mijuspa payman k’umuykunqaku,jallp’aq sonqonman* llapa uraykuqkunan paypa ñaupanpi qonqorikunqaku.
Manan mayqenpas vidantaqa librayta atinmanchu.
30 Paykunaq miraynin runakunaqa paytan servinqaku;qhepa miray runakunatan Jehová Diosmanta yachachikunqa.
31 Paykunan paypa chanin ruwasqankunata willanqaku,manaraq nacemuq llaqtamanmi paypa imaymana ruwasqanta willanqaku.
Uraypi willakuykuna
^ Chaypiqa yaqapaschá musicaq imayna uyarikusqanmanta otaq imayna tocakusqanmanta rimashan.
^ Hebreo rimaypiqa “wijch’uykusqa” ninmi.
^ Qhasqotaqa “pecho” nillankutaqmi.
^ Chaypiqa “Enemigoykunaqa” nillanmantaqmi.
^ Hebreo rimaypiqa “makinmanta” ninmi.
^ Chaypiqa “Sonqoykichis wiñaypaq kausachun” nillanmantaqmi.
^ Hebreo rimaypiqa “polvoman” ninmi.
