Romanos 1:1-32
1 Cristo Jesuspa kamachin noqa Pablon qelqamushaykichis, noqan kani apóstol* kanaypaq ajllasqa, Diospa allin willakuyninkunata willanaypaq t’aqasqa.+
2 Chay allin willakuykunatan Diosqa ñaupaqmantaraq prometerqan profetankunawan, chay willakuykunaqa ch’uya qelqakunapin kashan.
3 Churinmantan chay willakuykunaqa willashan, paymi runa jina Davidpa mirayninmanta nacerqan.+
4 Santo espirituq* atiyninwanmi chay Churiqa kausarichisqa karqan,+ chhaynapitaq sut’ita rikukurqan Diospa Churin kasqanta,+ paymi Señorninchis Jesucristo;
5 paymi ancha sumaq sonqowan qhawariwan,* apóstol kanaypaqpas ajllawarqan,+ chhaynapi lliu nacionkunamanta runakuna iñinankupaq,+ kasukuq kanankupaq, sutintapas jatunchanankupaqwan.
6 Chay nacionkuna ukhumantan qankunapas wajasqa karqankichis Jesucristoq discipulon kanaykichispaq.
7 Roma llaqtapi Diospa lliu munakusqankunamanmi qelqamushaykichis, qankuna ch’uya kanaykichispaq ajllasqa kaqkunaman:
Qankunawan kachun Taytanchis Diospa jinallataq Señor Jesucristoq ancha sumaq sonqo kaynin thaj kayninpas.
8 Ñaupaqtaqa Jesuspa sutinpin Diosniyta “gracias” nini qankunaq iñiyniykichismanta; jinantinpin iñiyniykichismantaqa allinta rimashanku.
9 Noqaqa tukuy sonqoywanmi Diosta servishani Churinmanta allin willakuykunata willaspay, payqa allintan yachan sapa mañakuspay qankunamanta rimasqayta,+
10 anchatan rogakushani, Dios munaqtinqa qankunata watukuq jamunaypaq.
11 Maytapunin qankunawanqa tupayta munashani qankunata kallpachanaypaq, chhaynapi astawan Diosman jap’ipakunaykichispaq, iñiypi qaqata sayanaykichispaqwan.
12 Arí, noqaqa munayman noqanchispura kallpachanakunanchistan,+ chhaynapi iñiyniykichis noqata kallpachawananpaq, noqaq iñiyniytaq qankunata kallpachanasuykichispaq.
13 Wayqeykuna,* askha kutipin noqaqa qankunaman jamuyta munarqani waj nacionkunapi jina chaypipas lliuman yachachinaypaq, chhaynapi wakillanpas Jesuspa discipulon kanankupaq, ichaqa manan atimushanichu.
14 Noqaqa manun kani griego runakunamanpas waj llaqtayoqkunamanpas, yachayniyoqkunamanpas mana yuyayniyoqkunamanpas,
15 chaymi maytapuni munashani qankuna Roma llaqtapi tiyaqkunamanpas allin willakuykuna willayta.+
16 Noqaqa manan p’enqakunichu chay allin willakuykuna willaytaqa,+ chay willakuykunawanmi Diosqa atiyninta rikuchin, chhaynapi lliu iñiqkuna salvasqa kanankupaq;+ ñaupaqtaqa judiokunamanmi willakushan,+ chaymantataq griegokunaman.*+
17 Iñiqkunaqa iñisqankuraykun Diospa chanin kayninta allin willakuykunapi rikunku,+ chaytaqmi iñiyninkuta astawan kallpachan. Qelqasqan kashanpas: “Chanin runan ichaqa iñisqanrayku kausanqa”,+ nisqa.
18 Diosqa janaq pachamantan phiñakuyninta rikuchimushan+ payta mana manchakuq runakunaman, mana chanin runakunamanwan. Paykunan mana chanin kaqta ruwaspa runakunata jark’anku cheqaq kaqta mana yachanankupaq.+
19 Diosqa imaymanatan paykunaman sut’ita rikuchin,+ chhaynapi payta reqsinankupaq.
20 Diostaqa manaña rikunchischu chaypas, paypa wiñay atiyninpas+ Diospuni kasqanpas+ kay pacha kamasqa kasqanmantapachan sut’ita rikukun, arí, imaynachus kasqanqa imachus kamasqankunapin sut’ita reparakun,+ chaymi mana pipas ninmanchu: “Manan yacharqanichu”, nispaqa.
21 Chhayna runakunaqa yacharqankuña pay Dios kasqanta chaypas, manan jatuncharqankuchu ni “gracias” nirqankupaschu; aswanmi mana yuyayniyoq kapurqanku, mana entiendeq sonqonkupas tutayapurqanmi.+
22 “Yachayniyoqmi kayku” nirqankuña chaypas, mana yuyayniyoqmi karqanku.
23 Chaymi mana jayk’aq ismuyta atiq qhapaq atiyniyoq Diosta adoranankumantaqa ismuq runaq rijch’ayninta adorarqanku; adorallarqankutaqmi phalaq animalkunaq rijch’ayninta, tawa chakiyoq animalkunaq rijch’ayninta, pampan suchuq animalkunaq rijch’aynintapas.+
24 Chayraykun Diosqa sonqonkuq munasqanman jina millakunapaq ruwaykunaman saqerparirqan, chhaynapi paykuna kikinku cuerponkuta p’enqayman churanankupaq.
25 Diosmanta cheqaq yachachikuypi creenankumantaqa pantasqa yachachikuypin creerqanku, kamaqta adoranankumantapas kamasqakunatan adorarqanku servirqanku ima, ichaqa kamaqllan wiñaypaq jatunchasqaqa kanan. Amén.*
26 Chayraykun Diosqa paykunata saqerparirqan cuerponkuq sinchi munapayasqan qhelli ruwaykunaman.+ Chhaynapin warmikunapas mana ruwanata ruwaspanku manaña qhariwan puñuyta munarqankuchu, aswanmi warmipurallaña puñurqanku;+
27 qharikunapas mana ruwanata ruwaspankun manaña warmikunawan puñuyta munarqankuchu, aswanmi aychankuq munayninpi raurarispanku qharipura millay qhellikunata ruwarqanku;+ chhaynata pantasqankuraykun paykunaqa castigasqa karqanku.+
28 Paykunaqa manan Diosta kasukuytapas ni paypi piensaytapas munarqankuchu, chaymi Diosqa juchachasqan qhelli yuyayniyoq kayman paykunata saqerparirqan, chhaynapi mana ruwanakunata ruwanankupaq.+
29 Paykunaqa tukuy mana chanin kaywan,+ tukuy millay ruwaywan, tukuy sinchi munapayaywan,+ tukuy mana allin kaywan iman junt’a kasharqanku. Chaymantapas envidiakuywan,+ wañuchiywan,+ churanakuywan, engañaywan,+ jujkunaq ñak’arinanta munaywan+ iman junt’a kasharqanku. Jinaspapas paykunaqa cuento q’epikuna,
30 yanqamanta tumpaqkuna,+ Diosta cheqnikuqkuna, mana respetoyoqkuna, uma oqariqkuna, alabakuqkuna, mana allin kaqta paqarichiqkuna, tayta-mamankuta mana kasukuqkuna,+
31 mana yuyayniyoqkuna,+ rimasqankuta mana junt’aqkuna, runamasinkuta mana munakuqkuna, mana khuyapayakuqkuna iman karqanku.
32 Kunanpas chhayna runakunaqa allintan yachanku Diospa chanin kamachikuyninman jinaqa, chaykunata ruwaqkunaqa wañunanku kasqanta,+ chaywanpas paykunaqa ruwashallankun chaykunata, chhayna ruwasqankutapas “allinmi” ninkuraqtaqmi.
Uraypi willakuykuna
^ Qhaway Explicasqa simikuna nisqapi “Santo espíritu” nisqata.
^ Griego rimaypiqa “qhawariwanku” ninmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa griego simi rimaq mana judío runakunamantan rimashanman.
^ Chaypiqa “Chhayna kachun” nillanmantaqmi.
