Lucas 9:1-62
-
Imayna willanankupaq apostolkunata yachachikusqanmanta (1-6)
-
Herodes Jesusmanta anchata admirakusqanmanta (7-9)
-
Pisqa waranqa runakunata Jesuspa mijuchisqanmanta (10-17)
-
Pedroq Jesusta “Criston kanki” nisqanmanta (18-20)
-
Wañunanmanta Jesuspa willakusqanmanta (21, 22)
-
Cheqaq discípulo kaymanta (23-27)
-
Jesuspa jujnirayman tukusqanmanta (28-36)
-
Supaypa junt’aykusqan waynacha qhaliyachisqa kasqanmanta (37-43a)
-
Wañunanmanta Jesús wajmanta willakusqanmanta (43b-45)
-
Kuraq kayta munaspa discutisqankumanta (46-48)
-
Pipas mana contranchispichu kaqqa noqanchiswan kasqanmanta (49, 50)
-
Juj ayllupi Jesusta mana chaskisqankumanta (51-56)
-
Jesusta imayna qatikunamanta (57-62)
9 Chunka iskayniyoq apostolkunata juñuspan Jesusqa paykunaman atiyta qorqan llapa supaykunata qarqonankupaq,+ onqosqakunatapas qhaliyachinankupaq.+
2 Jinaspan paykunata kacharqan Diospa gobiernonmanta willamunankupaq, onqosqakunata qhaliyachimunankupaqwan;
3 nirqantaq: “Aman imatapas ñanpaqqa apankichischu, ni taunatapas ni qoqawatapas ni t’antatapas ni qolqetapas ni juj p’achatawanpas.*+
4 May llaqtapipas juj wasiman jaykuspaykichisqa chaypin qhepakunkichis chay llaqtamanta lloqsipunaykichiskama.+
5 May llaqtapipas mana chaskisunkichischu chayqa, chay llaqtamanta lloqsipushaspan chakiykichispi kaq jallp’ata chhafchirparinkichis, chhaynapi mana allin ruwasqankuta rikuchinaykichispaq”,+ nispa.
6 Jinan paykunaqa rispa ayllun-ayllunta purirqanku jinantinpi allin willakuykunata willaspa, onqosqakunata qhaliyachispa ima.+
7 Kamachiq Herodesmi* yacharurqan lliu chaykuna pasasqanmanta, ancha admirasqataq kasharqan runakuna imachus nisqankumanta. Wakinmi nisharqanku: “Bautizaq Juanmi wañusqanmanta jatarimun”,+ nispa.
8 Wakintaq “Eliasmi rijurimun” nisharqanku. Wakinñataq “ñaupa profetakunamanta jujninmi kausarimun”+ nisharqanku.
9 Chaymi Herodesqa nirqan: “Juanpa umantaqa wit’uchirqanimá riki.+ Chhaynaqa, ¿pitaq kanman chay runari kaykunata uyarinaypaq?”, nispa. Chaymi paytaqa rikuytapuni munasharqan.+
10 Apostolninkunataq kutimuspanku tukuy imaymana ruwamusqankuta Jesusman willarqanku.+ Jinaqtinmi payqa mana reparachikuspalla Bejsaida nisqa llaqtaman paykunata pusarqan.+
11 Runakunataq chayta yacharuspanku Jesuspa qhepanta rirqanku. Paytaq sumaqta chaskispa Diospa gobiernonmanta yachachiyta qallarirqan, onqosqakunatapas qhaliyachirqanmi.+
12 Tardeña kaqtintaq chunka iskayniyoq apostolkunaqa Jesusman qayllaykuspa nirqanku: “Kachapullayña kay runakunata, chhaynapi kay muyuriqpi ayllukunaman jawa llaqtakunamanpas rispa alojakunankupaq, mijunatapas maskhakunankupaqwan; kayneqpiqa ch’inpin kashanchis”,+ nispa.
13 Jinan Jesusqa paykunata nirqan: “Qankunayá imallatapas mijuchiychis”,+ nispa. Paykunataq nirqanku: “Pisqa t’antallaykun iskay challwallaykupiwan kashan; icha, ¿risaqkuchu kay llapa runakunapaq mijuna rantiq?”, nispa.
14 Chaypiqa pisqa waranqa jina qharikunan kasharqanku. Jinan Jesusqa discipulonkunata nirqan: “Runakunata tiyachiychis pisqa chunka pisqa chunkamanta”, nispa.
15 Paykunataq llapa runakunata Jesuspa nisqanman jina tiyachirqanku.
16 Jinan Jesusqa pisqa t’antata iskay challwatawan jap’ispa cielota qhawarispa Diosman graciasta qorqan, phasmispataq discipulonkunaman jaywayta qallarirqan runakunaman rakinankupaq.
17 Jinan llapanku sajsanankukama mijurqanku, puchuq phasmikunatataq chunka iskayniyoq canastata juñurqanku.+
18 Juj kutinmi Diosmanta Jesús mañakushaqtin discipulonkuna payman jamurqanku, jinan Jesusqa paykunata tapurqan: “Runakunari, ¿pin niwankutaq?”,+ nispa.
19 Paykunataq nirqanku: “Wakinqa bautizaq Juanmi ninkun, wakintaq Eliasmi ninku, wakinñataq ñaupa profetakunamanta jujninchá kausarimun ninku”,+ nispa.
20 Chaymi Jesusqa paykunata nirqan: “Qankunari, ¿pin niwankichistaq?”, nispa. Jinan Pedroqa nirqan: “Qanqa Diospa ajllasqan Criston kanki”,+ nispa.
21 Chayta niqtinmi Jesusqa paykunata allin-allinta kamachirqan ama pimanpas chayta willanankupaq.+
22 Jesusqa nillarqantaqmi: “Runaq Churinqa imaymanawanmi ñak’arinan, chaymantapas umalliq runakunaq,* umalli sacerdotekunaq, kamachikuy simita yachachiqkunaq pisichasqanmi kanan, chaymantataq wañuchisqa kanan,+ kinsa p’unchaymantataq kausarichisqa kanan”,+ nispa.
23 Jesusqa llapankutan nillarqantaq: “Pipas qhepayta jamuyta munaqqa pay kikinta negakuchun,+ jinaspa sapa p’unchay ñak’arina k’aspinta* apaspa qhepayta jamushallachun.+
24 Pipas vidanta salvayta munaqqa chinkachinqan, pipas noqarayku vidanta chinkachiqmi ichaqa salvanqa.+
25 Juj runachus kay pachapi tukuy imata tarinman, pay kikintataq ichaqa mana allinta ruwakunman otaq vidantapas chinkachinman chayqa, ¿ima allintaq paypaqri kanman?+
26 Pipas noqamanta rimasqaymantawan p’enqakunqa chayqa, runaq Churinpas p’enqakullanqataqmi chay runamantaqa; chaymi kanqa lliflli kayninwan, Taytanpa lliflli kayninwan, ch’uya angelkunaq lliflli kayninpiwan chayamuqtin.+
27 Cheqaqtan niykichis: Kaypi sayashaqkunamanta wakinqa manapunin wañunqakuchu ñaupaqta Diospa gobiernonta rikunankukama”,+ nispa.
28 Chay nisqanmanta pusaq p’unchay qhepamantaq Jesusqa Pedrota, Juanta, Santiagotawan pusarikuspa juj orqoman wicharqan Diosmanta mañakuq.+
29 Mañakushaqtinmi rijch’ayninqa jujnirayman tukurqan, p’achanpas yuraq lliphipipishaqmanmi tukurqan.
30 Chayllamanmi iskay runakuna paywan rimashaq rijurimurqanku. Paykunaqa Moiseswan Eliaspiwanmi karqanku.
31 Paykunaqa k’ancharishaqmi rijurimurqanku, jinaspa paywan rimayta qallarirqanku Jerusalenpi kashaspa ripunanmanta.+
32 Pedropas paywan kashaqkunapas puñuy-puñuyllañan kasharqanku, allinta rijch’arispankutaq Jesuspa lliflli kayninta rikurqanku,+ paywan sayashaq iskay runakunatawan.
33 Chay iskay runakunaqa ripusharqankuñan, jinan Pedroqa Jesusta nirqan: “Yachachikuq, noqaykupaqqa ancha allinmi kaypi kasqaykuqa; kinsa karpakunata ruwarusaqku, jujta qanpaq, jujta Moisespaq, jujtataq Eliaspaq”, nispa. Pedroqa manan repararqanchu imatachus rimashasqanta.
34 Chayta rimashallaqtinraqmi phuyu phuyuchakuspa paykunata llanthuykurqan, jinaspa pakaykurqan; chaywanmi paykunaqa mancharikurqanku.
35 Jinan phuyu ukhumanta juj kunka+ nimurqan: “Kaymi ajllakusqay Churiyqa,+ payta uyariychis”,+ nispa.
36 Chay kunkata uyarisqanku qhepamantaq Jesustaqa sapallantaña rikurqanku. Paykunaqa ch’inllan qhepakurqanku, manan chay p’unchaykunaqa pimanpas willarqankuchu imachus rikusqankutaqa.+
37 Qhepantin p’unchay orqomanta uraykamuqtinkutaq ancha askha runakuna Jesuswan tupaq jamurqanku.+
38 Chayllamanmi juj runa runakuna ukhumanta wajakamurqan: “Yachachikuq, ama jinachu kay, qhawaykapuway churiyta, pay sapallanmi wawayqa.+
39 Juj espiritun jap’ispa qonqaylla qaparichin, ataquewan jap’ichispataq siminmanta phosoqota aqtuchimun, q’oyu-q’oyutaraqmi cuerpontapas ruwan, ñak’aytan kacharinpas.
40 Chaymi discipuloykikunata rogakurqani chay espirituta paymanta qarqonankupaq, ichaqa manan atinkuchu”, nispa.
41 Jinan Jesusqa nirqan: “Yau mana iñiyniyoq juchasapa runakuna,*+ ¿jayk’aqkaman qankunawan kasaq? ¿Jayk’aqkaman aguantasaykichispas? Kayman pusamuy wawaykita”,+ nispa.
42 Jesusman qayllaykushaqtintaq supayqa chay waynachata pampaman wijch’uspa sinchi ataquewan jap’ichirqan. Jinan Jesusqa chay millay espirituta phiñarikuspa waynachata qhaliyachirqan, chaymantataq taytanman qopurqan.
43 Chayta rikuspan runakunaqa llapanku Diospa jatun atiyninmanta manchaytaraq admirakurqanku.
Tukuy imaymana ruwasqanmanta llapa runakuna admirasqa kashaqtinkun Jesusqa discipulonkunata nirqan:
44 “Kay nisqayta allinta uyariychis, amataq qonqankichischu: Runaq Churinqa enemigonkunaq makinmanmi jap’ichisqa kanqa”,+ nispa.
45 Paykunan ichaqa mana chay nisqanta entienderqankuchu, pakasqa jina paykunapaq kasqanrayku, manchakurqankutaqmi chaymanta tapukuytapas.
46 Discipulokunan discutiyta qallarirqanku mayqenninkuchus kuraq karqanku chaymanta.+
47 Jesustaq imachus piensasqankuta reparaspa juj erqechata wajaspa ladonpi sayaykachirqan,
48 jinaspa paykunata nirqan: “Pipas kay wawata sutiypi chaskiqqa noqatawanmi chaskiwan, pipas noqata chaskiwaqtaq kachamuwaqniytawan chaskin.+ Pipas qankuna ukhupi k’umuykuq kaqmi kuraqqa kanqa”,+ nispa.
49 Jinan Juanqa nirqan: “Yachachikuq, juj runatan rikumuyku sutiykipi supaykunata qarqoshaqta, chaymi payta jark’arqayku mana noqanchiswanchu purisqanrayku”,+ nispa.
50 Jesustaq payta nirqan: “Aman paytaqa jark’ankichischu, pipas mana contraykichispichu kaqqa qankunawanmi kashan”, nispa.
51 Janaq pachaman oqarisqa kananpaq tiempo chayamushaqtinmi+ Jesusqa “risaqpunin Jerusalentaqa” nisharqan.
52 Chaymi payqa wakin discipulonkunata ñaupachirqan. Jinan paykunaqa rispa Samaria runakunaq tiyasqan juj aylluman jaykurqanku, chhaynapi Jesús chayamuqtin imapas listoña kananpaq.
53 Chay llaqtayoqkunan ichaqa Jesusta mana chaskirqankuchu+ Jerusalenman rishasqanrayku.
54 Chayta rikuspan Santiagowan Juanwanqa+ nirqanku: “Señor, munanki chayqa, niwayku cielomanta ninata uraykachimunaykupaq, chhaynapi kay runakunata ruphananpaq”,+ nispa.
55 Chaymi Jesusqa kutirispa paykunata anyarqan.
56 Chaymantataq juj kaq aylluman rirqanku.
57 Ñanta rishaqtinkun juj runa Jesusta nirqan: “Maytaña riqtiykipas qatikusaykin”, nispa.
58 Jinan Jesusqa nirqan: “Atoqkunapas t’oqoyoqmi, phalaq animalkunapas q’esayoqmi, runaq Churinpan ichaqa mana kanchu umanta maypi samaykachinallanpas”,+ nispa.
59 Chaymantataq Jesusqa juj runata nirqan: “Qatikamuway”,* nispa. Chay runataq nirqan: “Señor, taytaytaraq ñaupaqta p’amparamusaq”,+ nispa.
60 Jesustaq payta nirqan: “Wañusqakunaña wañupuqninkutaqa p’ampashachunku,+ qan ichaqa rispa tukuyneqpi willamuy Diospa gobiernonmanta”,+ nispa.
61 Juj runapas nillarqantaqmi: “Señor, qatikusaykin; ichaqa ñaupaqta wasiypi kaqkunataraq ripushanin niramusaq”, nispa.
62 Jinan Jesusqa nirqan: “Pipas aradoman makinta churaspa qhepaman qhawariqqa,+ manan Diospa gobiernonpaq jinachu”,+ nispa.
Uraypi willakuykuna
^ Chaypiqa “iskay p’achatawanpas” nillanmantaqmi.
^ Chaypiqa Jatun Herodespa wawan Herodes Antipasmantan rimashan. Qhaway Explicasqa simikuna nisqapi “Herodes” nisqata.
^ Chaypiqa “kuraq runakunaq” nillanmantaqmi.
^ Qhaway Explicasqa simikuna nisqapi “Ñak’arina k’aspi” nisqata.
^ Chaypiqa “kay tiempo runakuna” nillanmantaqmi.
^ “Qatikamuway” nispaqa Jesuspa discipulon kapuymantan rimashan.
