Job 29:1-25
29 Jobqa rimashallarqanmi, paymi nirqan:
2 “May allinchá kanman ñaupaq killakunaman kutiruyman chayqa,Diospa cuidawasqan p’unchaykunaman kutiruyman chayqa.
3 Chay tiempopin payqa umayman k’anchaykuwaq,laqhayaqpi* purishaqtiymi k’anchayninwan k’anchaykuwaq.+
4 Chay p’unchaykunaqa allin kallpayoqmi karqani,Dioswanpas amigontinmi karqani,+
5 tukuy atiyniyoqqa noqawanmi kasharqan,wawaykunapas noqawanmi kasharqan.
6 Mantequilla patapin puriq kani,aceiteypas rumi-rumimantan lloqsimuq.+
7 Llaqta punkuman riqtiypas,+llaqta plazapi tiyaykuqtiypas,+
8 noqata rikuwaq waynakunaqa juj ladomanmi suchuriqku,kuraq runakunapas sayariqkun.+
9 Autoridadniyoq runakunapas ch’inllan kaqku,siminkuta makinkuwan tapakuspan chaypi kaqku.
10 Allin respetasqa runakunapas ch’innipuqkun,qallunkuraqmi paykunaqqa watakuq.
11 Llapa uyariwaqniykunan allinta noqamanta rimaqku,noqata rikuwaq runakunapas favorniypin rimaqku.
12 Noqaqa yanapayta mañakuq wajchakunatan yanapaq kani,+mana taytayoqkunatan yanapaq kani,mana piniyoqkunatan yanapaq kani.+
13 Noqataqa wañuy patapiña kashaq runapas bendeciwaqmi,+noqaqa viudaq sonqontan kusichiq kani.+
14 Allin kausaymi noqaq p’achayqa karqan,chanin ruwaymi noqaq p’istunaypas uma k’uyunaypas karqan.
15 Noqaqa ñausakunaq ñawinmi karqani,wist’ukunaq chakinmi karqani,
16 wajchakunaq taytanmi karqani.+
Mana reqsisqaykunatan yanapaq kani justiciata tarinankupaq.+
17 Mana allin runakunaq qhaqllintan* p’akiq kani,+siminkumantan jap’isqan runakunata qechuq kani.
18 Noqan nirqani: Wasiypin wañukapusaq,+kausasqay p’unchaykunapas aqo jinaraqmi kanqa.
19 Sach’aq saphin jinan saphiykunaqa unuman chayanqa,raphiykunapas tutantinmi apilla, sullalla* kashanqa.
20 Runakunaqa respetashallawanqakun,arcowanpas flechashallasaqmi, nispa.
21 Runakunaqa makillan uyariwaqku,yuyaychanaytapas ch’inllan suyakuqku.+
22 Rimasqay qhepamanqa manan pipas imaniqpasñachu,rimasqayqa sumaqmi kaq paykunaq ninrinpaqqa.
23 Runakunaqa parata jinan suyakuwaqku;rimasqayta uyarinankupaqmi yanqallaña suyakuwaqku.+
24 Kusisqa uyantin qhawariqtiyqa manan creewaqkupaschu,kusisqa uyaymi k’anchay jina paykunataqa kusirichiq.
25 Umallinku jinan yuyaychaq kani,paykuna ukhupin rey jina karqani,+wañupuqniyoqkunata kallpachaq jinan karqani.+
Uraypi willakuykuna
^ Laqhayaqtaqa “tutayaq” nillankutaqmi.
^ Qhaqllitaqa “kallachu” nillankutaqmi.
^ Sullataqa “chhulla” nillankutaqmi.
