Hechos 2:1-47
2 Pentecostés Fiesta+ p’unchay kashaqtinmi iñiqkunaqa llapallanku juñunasqa kasharqanku.
2 Chayllamanmi cielomanta juj suenay uyarikurqan sinchi wayraq rimarisqan jina, chay suenaymi tiyashasqanku wasiman junt’aykurqan.+
3 Chayllamanmi qallu jina nina rauraykunata rikurqanku, chay nina rauraykunaqa ch’eqerispan sapankankuq uman pataman tiyaykurqan,
4 jinan llapanku santo espirituwan junt’a karqanku,+ chaymi paykunaqa espirituq rimachisqanman jina juj rimaykunapi rimayta qallarirqanku.+
5 Chay p’unchaykunapin kay pachapi llapa nacionkunamanta Dios sonqo judiokuna Jerusalenpi kasharqanku.+
6 Chay suenayta uyarispan askha runakuna juñukamurqanku, sapankankuq rimayninpi Jesuspa discipulonkunaq rimasqanta uyarispankutaq maytapuni admirakurqanku.
7 Paykunaqa ancha admirasqapunin kasharqanku, chaymi ninakurqanku: “¿Manachu kay runakunaqa llapankupas Galilea runakuna+ kashanku?
8 Chhaynaqa, ¿imaynapitaq paykunari sapankanchispa rimayninchispipuni rimashanku?
9 Kaypiqa kashanchis Partia runakuna, Media runakuna,+ Elam runakuna;+ jinallataq Mesopotamia ladomanta kaqkuna, Judeamanta kaqkuna, Capadociamanta kaqkuna, Pontomanta kaqkuna, Asia provinciamanta kaqkuna,+
10 Frigiamanta kaqkuna, Panfiliamanta kaqkuna, Egiptomanta kaqkuna, Cirene qaylla Libia ladokunamanta kaqkuna; Roma llaqtamanta jamuq judiokuna, chay llaqtapi tiyaq judioman tukupuqkuna;+
11 Creta runakuna, Arabia runakuna iman ¿riki?, chaywanpas paykunaqa rimayninchispipunin rimashanku Diospa admiranapaq ruwasqankunamanta”, nispa.
12 Paykunaqa llapankun ancha admirasqapuni kasharqanku, chaymi ninakurqanku: “¿Imataq kaypiri pasashan?”, nispa.
13 Wakinmi ichaqa paykunata asipayaspa nirqanku: “Kaykunaqa misk’i vinowanchá* macharapunku”, nispa.
14 Jinan Pedroqa chunka jujniyoq+ apostolkunapiwan sayarispa alto kunkawan nirqan: “Judeamanta runakuna, Jerusalenpi tiyaq llapa runakuna, allinta uyariwaychis.
15 Qankunaqa kay runakuna machasqa kanankupaqpaschá piensashankichis, ichaqa manan machasqachu kashanku, las nuevellaraqmá* kashanpas.
16 Aswanpas paykunawanqa profeta Joelpa nisqanmi junt’akushan, paymi nirqan:
17 Diosmi nin: Tukukuy p’unchaykunapin imaymana clase runakunaman espirituyta jich’aykamusaq, jinan churiykichiskunapas ususiykichiskunapas profetizanqaku, qankuna ukhupi kaq waynakunapas rijuriykunatan rikunqaku, kuraq runaykichiskunapas imaymanatan mosqokunqaku;+
18 qhari kamachiykunamanpas warmi kamachiykunamanpas, chay p’unchaykunapin espirituyta jich’aykamusaq, jinan paykunapas profetizanqaku.+
19 Chaymantapas admirakunapaq ruwaykunatan cielomanta rikuchimusaq, kay pachapitaq kay señalkunata rikuchisaq: yawarta, ninata, q’osñita ima.
20 Manaraq Jehová* Diospa k’anchashaq jatun p’unchaynin chayamushaqtinmi inti laqhayanqa,* killapas yawarman tukunqa.
21 Jehová* Diospa sutinta llapa wajakuqkunataq salvasqa kanqaku,+ nispa.
22 ”Israel runakuna, uyariwaychis: Nazaret llaqtayoq Jesusqa Diospa kachamusqanmi karqan, paytaqa sut’itan Dios reqsichirqan ñaupaykichispi milagrokunata,* admirakunapaq kaqkunata, señalkunata ima ruwachispa;+ qankunaqa allintan chaytaqa yachashankichis.
23 Chay Jesusmi ñaupaqmantaraq Diospa yachasqanman piensasqanman jina jap’ichisqa karqan.+ Paytan qankunaqa juchasapa runakunawan k’aspipi warkuchispa wañuchirqankichis.+
24 Diosmi paytaqa wañuymanta kacharichispa kausarichimpun,+ paytaqa manapunin wañuyqa jap’irayayta atirqanchu.+
25 Davidmi paymanta nirqan: Jehová* Diosqa tukuy tiempon piensayniypi kashan, payqa paña ladoypin kashan mana imapas kuyurichiwananpaq;
26 chayraykun sonqoy kusirikun ancha kusisqataqmi rimanipas, suyakuyniyoqmi kausasaqpas.
27 Qanqa manan Sepulturapi* saqerpariwankichu,* manataqmi cuerpoy ismunantapas munankichu,+ tukuy sonqowan qanpaq junt’aq kasqayrayku.
28 Kausayman apaq ñantan reqsichiwarqanki; anchatan kusikusaq sumaqta qhawariwasqaykiwan,+ nispa.
29 ”Wayqeykuna, ñaupa taytanchis Davidmanta sut’inta nisaykichis. Yachasqaykichis jina, payqa wañupurqanmi, jinaspa p’ampasqa karqan,+ sepulturanqa kunankamapas kaypin kashan.
30 Payqa profetan karqan; paymanmi Diosqa juramentota ruwaspa prometerqan mirayninmanta jujnin runata trononpi tiyachinanpaq,+ chayta yachaspan Davidqa
31 rikushanmanpas jina Cristoq* kausarimpunanmanta rimarqan; arí, Sepulturapi* mana saqerparisqachu kananmanta, aychanpas mana ismunanmantan rimarqan.+
32 Chay Jesustan Diosqa kausarichimurqan, chaytaqa llapaykun rikuyku.+
33 Payqa Diospa paña ladonpi tiyaykunanpaqmi jatunchasqa karqan,+ jinaspa prometesqa santo espirituta Tayta Diosmanta chaskirqan,+ chaytan payqa noqaykuman jich’aykamun, chaytataqmi qankunaqa rikushankichispas uyarishankichispas.
34 Manan Davidchu janaq pachamanqa wicharqan, aswanmi payqa nirqan: Jehová* Diosmi Señorniyta nirqan: Paña ladoypi tiyaykuy,
35 enemigoykikunata chaki sarunaykiman churanaykama,+ nispa.
36 Chayrayku, Israel llaqta runakuna, kayta allinta yachaychis: K’aspipi wañuchisqaykichis+ Jesustan Diosqa churan Señor+ kananpaq Cristo kananpaqwan”, nispa.
37 Chayta uyarispan chay runakunaqa sinchita sonqonkupi llakikurqanku, chaymi Pedrota wakin apostolkunatawan nirqanku: “Wayqeykuna, ¿kunanri imatataq ruwasaqku?”, nispa.
38 Jinan Pedroqa paykunata nirqan: “Juchaykichismanta pesapakuspa+ Diosman kutirikuychis, jinaspa sapankaykichis bautizakuychis+ Jesucristoq sutinpi, chhaynapi juchaykichismanta perdonasqa kanaykichispaq,+ jinan Diospa gratislla qosqan santo espirituta chaskinkichis.
39 Chayta chaskinapaq promesaqa+ Jehová* Diosninchispa llapa wajasqankunapaqmi: qankunapaq, wawaykichiskunapaq, llapa karupi kaqkunapaqwan”,+ nispa.
40 Astawan rimaspan Pedroqa allin willakuykunata paykunaman allinta entiendechirqan, kallpachashallarqantaqmi: “Kay millay runakunamanta* t’aqakuychis,+ chhaynapin salvasqa kankichis”, nispa.
41 Rimasqanta tukuy sonqowan uyarikuqkunaqa bautizasqan karqanku,+ chaymi chay p’unchayqa iñiqkunaman yapakurqan kinsa waranqa jina runakuna.+
42 Paykunaqa uyarishallaqkun apostolkunaq yachachisqanta, juñunakushallaqkutaqmi kanpas; mijunatapas kuskan mijuqku,+ Diosmantapas mañakushallaqkun.+
43 Apostolkunaqa askha milagrokunata askha señalkunatawanmi ruwasharqanku,+ chaymi llapa runakuna Diosta manchakuyta qallarirqanku.
44 Chayllaraq iñipuqkunapas llapankun kuskalla kasharqanku, tukuy imankupas llapankupaqmi karqan.
45 Jallp’ankutapas ima kaqninkutapas vendespan+ llapankuman rakiqku, sapankaq necesitasqanman jinan qoqku.+
46 Sapa p’unchaymi juj sonqolla temploman riqku, sapanka iñiqpa wasinpitaq mijuqku. Mijunankutapas ancha kusisqan tukuy sonqowan jaywarinakuqku,
47 Diostapas jatunchaqkun, llapa runakunaq sumaq qhawarisqantaqmi kaqkupas. Jehová* Diosqa sapa p’unchaymi paykunaman juñumusharqan salvakuy ñanman jaykuq runakunata.+
Uraypi willakuykuna
^ Chaypiqa “mosoq vinowanchá” nillanmantaqmi.
^ Griego rimaypiqa “kinsa kaq horallaraqmá” ninmi, chaytaqa yupaqku intiq lloqsimusqanmantapachan.
^ Qhaway “Astawan yachanapaq A5” nisqata.
^ Laqhayaqtaqa “tutayaq” nillankutaqmi.
^ Qhaway “Astawan yachanapaq A5” nisqata.
^ Chaypiqa “atiywan ruwaykunata” nillanmantaqmi.
^ Qhaway “Astawan yachanapaq A5” nisqata.
^ Chaypiqa “manan almayta saqerparinkichu” nillanmantaqmi. Qhaway Explicasqa simikuna nisqapi “Alma” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Chaypiqa “Kay tiempo millay runakunamanta” nillanmantaqmi.
^ Qhaway “Astawan yachanapaq A5” nisqata.
