Esdras 7:1-28
7 Persia rey Artajerjes+ kamachikushaqtinmi Esdrasqa*+ Babiloniamanta kutimurqan. Esdrasqa Serayaq+ churinmi karqan, Serayataq Azariaspa churin, Azariastaq Hilquiaspa+ churin,
2 Hilquiastaq Salumpa churin, Salumtaq Sadocpa churin, Sadoctaq Aitufpa churin,
3 Aituftaq Amariaspa churin, Amariastaq Azariaspa+ churin, Azariastaq Merayojpa churin,
4 Merayojtaq Zeraiaspa churin, Zeraiastaq Uzipa churin, Uzitaq Buquipa churin,
5 Buquitaq Abishuaq churin, Abishuataq Finehaspa+ churin, Finehastaq Eleazarpa+ churin, Eleazartaq umalli sacerdote Aaronpa+ churin karqan.
6 Esdrasqa qelqakunata allin copiaqmi* karqan, payqa Moisesman Israelpa Diosnin Jehová Diospa qosqan kamachikuykunatan allinta yachaq.+ Jehová Diosmi paywan kasharqan, chaymi reyqa tukuy ima mañakusqanta qorqan. Paymi Babiloniamanta Jerusalenman kutirqan.
7 Chaymantapas kutillarqankutaqmi wakin Israel runakunapas, sacerdotekunapas, Leví runakunapas,+ takiqkunapas,+ punku qhawaqkunapas,+ Diospa wasinpi llank’aqkunapas.*+ Chayqa karqan qanchis wataña rey Artajerjes kamachikushaqtinmi.
8 Chay watan Esdrasqa pisqa kaq killapi Jerusalenman chayarqan.
9 Babiloniamantan puririrqan ñaupaq kaq killaq ñaupaq kaq p’unchayninpi, Jerusalenmantaq chayarqan pisqa kaq killaq ñaupaq kaq p’unchayninpi. Tukuy chay tiempon Diosqa paywan kasharqan.+
10 Esdrasqa sonqontan kicharisqaña Jehová Diospa kamachikuyninkunata estudiananpaq, chayman jina kausananpaq,+ chay kamachikuykunata leykunata Israel runakunaman yachachinanpaqpas.+
11 Esdrasqa allintan yacharqan* Israel llaqtaman Jehová Diospa qosqan kamachikuykunata leykunatapas. Payqa sacerdote qelqaq iman karqan. Kay cartatan rey Artajerjes payman qorqan, chaypin nin:
12 * “Reykunaq reynin noqa Artajerjesmi+ janaq pacha Diospa kamachikuyninkunata copiaq sacerdote Esdrasman qelqamushayki: Thaj kay qanpaq kachun.
13 Juj kamachikuytan orqomuni kamachisqay nacionpi tiyaq llapa Israel runakunapaq, sacerdotekunapaq, Leví runakunapaqwan, chhaynapi munaspankuqa qanwan kuska Jerusalenta rinankupaq.+
14 Noqa reymi qanchis yuyaychaqniykunapiwan kachashaykiku, makiykipi kaq Diosniykiq leyninkunata Judapi Jerusalenpipas junt’ashankuchus manachus chayta yachamunaykipaq.
15 Chaymantapas qolqeta qoritan apanki Jerusalenpi kashaq Israelpa Diosninman. Chaykunatan qoshayku noqawan yuyaychaqniy runakunapiwan.
16 Jinaspapas apallankitaqmi llapa Babilonia provinciapi qosqanku qolqeta qorita, apallankitaqmi llaqtamasiyki runakunawan sacerdotekunapiwan Diospa wasinpaq qosqanku regalokunatapas.+
17 Chay qolqewanmi Jerusalenman chayaspa jina rantinki torokunata,+ carnerokunata,+ ovejakunata,+ jak’uta,+ vinotawan.+ Chaykunatan Jerusalenpi kashaq Diosniykiq wasinpa altarninpi jaywanki.
18 ”Puchuq qolqewan qoriwan imatachus ruwankichis chaytaqa qanña qhawarinki sacerdotemasiykikunapiwan, Diosniykichispa munasqanman jinan chaytaqa ruwankichis.
19 Chaymantapas llapa chaskisqayki serviciokunatan Jerusalenpi kashaq Diosniykiq ñaupanman churapunki. Chaykunaqa servinqa Diospa wasinpi payta yupaychanapaqmi.+
20 Imapas necesitakunqa Diospa wasinpaq chayqa, reypaq juñusqanku qolqewanmi chaykunataqa rantinki.+
21 ”Éufrates mayuq inti jaykuy ladonpi kaq llapa qolqe waqaychaqkunatan noqa rey Artajerjes kamachimuykichis, janaq pacha Diospa leyninta copiaq* sacerdote Esdrasman+ llapa mañakusqanta usqhaylla qonaykichispaq.
22 Qolqetaqa pachaj talentoman* chayanankamapas qonkichismi, trigotapas chunka soqtayoq waranqa kiloman* chayanankamapas qonkichismi; vinotapas+ iskay waranqa iskay pachaj litroman* chayanankamapas qonkichismi, aceitetapas+ iskay waranqa iskay pachaj litroman chayanankamapas qonkichismi, kachitataq+ mana tukukuqta qonkichis.
23 Imatachus janaq pacha Dios wasinpaq munanqa chaytan usqhaylla ruwankichis, chhaynapin janaq pacha Diosqa+ mana phiñakunqachu reypa kamachisqan llaqtapaq, reypa wawankunapaqpas.+
24 Chaymantapas aman ima impuestotapas* cobrankichischu+ sacerdotekunamanta, Leví runakunamanta, takiqkunamanta, tocaqkunamanta,+ punku qhawaqkunamanta, Diospa wasinpi llank’aqkunamanta,*+ Diospa wasinpi juj llank’aqkunamantapas.
25 ”Qantaq Esdras, Diosniykiq yachay qosqasuykiwan kamachikuqkunata juezkunata churay, Éufrates mayuq inti jaykuy ladonpi tiyaq runakunata kamachinankupaq juzganankupaqwan, Diosniykiq kamachikuyninkunata reqsiq runakunata kamachinankupaq. Mana yachaq runakunamantaq Diosniykichispa leyninkunata yachachinkichis.+
26 Diosniykichispa leyninkunata reypa kay leynintapas mana kasukuq runaqa, wañuchisqan kanqa, otaq qarqosqapas, multasqapas, carcelman wisq’asqapas kanqa”, nispa.
27 ¡Jatunchasqa kachun ñaupa taytanchiskunaq Diosnin Jehová Diosqa! Paymi reyta kallpacharqan Jerusalenpi Jehová Diospa wasinta sumaqchananpaq.+
28 Diosqa mana tukukuq munakuytan* rikuchiwarqan, jinaspapas reywan,+ yuyaychaqninkunawan,+ atiyniyoq autoridadninkunawan iman sumaqta qhawarichiwarqan. Jehová Dios noqawan kashasqanraykun kallpachasqa karqani, jinan Israelpi umalli runakunata noqawan kuska kutinankupaq juñurqani.
Uraypi willakuykuna
^ Esdras sutiqa “yanapaq” ninantan nin.
^ Chaypiqa “qelqaqmi” nillanmantaqmi.
^ Chaypiqa “netineo runakunapas” nillanmantaqmi. Hebreo rimaypiqa “entregasqa runakunapas” ninmi.
^ Chaypiqa “allintan copiaq” nillanmantaqmi.
^ Esd 7:12 textomanta 7:26 textokamaqa arameo simipin qelqakurqan.
^ Chaypiqa “qelqaq” nillanmantaqmi.
^ Juj talentoqa 34,2 kilotan pesaq. Qhaway “Astawan yachanapaq B14” nisqata.
^ Hebreo rimaypiqa “pachaj coro medidaman” ninmi. Juj coro medidamanqa iskay pachaj iskay chunka litron jaykuq. Qhaway “Astawan yachanapaq B14” nisqata.
^ Hebreo rimaypiqa “pachaj bato medidaman” ninmi. Juj bato medidamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Hebreo rimaypiqa kinsa impuestokunamantan rimashan: sapanka runaq impuesto pagananmanta, ima rantisqamantapas impuesto paganamanta, viajaspa impuesto paganamantawan.
^ Chaypiqa “netineo runakunamanta” nillanmantaqmi. Hebreo rimaypiqa “entregasqa runakunamanta” ninmi.
^ Qhaway Explicasqa simikuna nisqapi “Mana tukukuq munakuy” nisqata.
