Deuteronomio 34:1-12
34 Chaymantataq Moisesqa Moab ch’in pampamanta Nebo+ orqoman wicharqan, Jericó+ llaqtaq chimpanpi Pisgá+ orqo pataman. Chaymantapachan Jehová Diosqa llapa jallp’ata rikuchirqan, Galaadmanta Dankama,+
2 rikuchirqanmi Neftalipa, Efrainpa, Manasespa jallp’ankunatapas. Judapa jallp’antapas llapantan rikuchirqan inti jaykuy ladopi lamar-qochakama.*+
3 Rikuchirqanmi Négueb+ ladota, Jordán lado jallp’atapas,+ askha palmera sach’akunayoq Jericó llaqta wayq’okunamanta Zóar+ llaqtakaman rikuchirqan.
4 Chaymantataq Jehová Diosqa Moisesta nirqan: “Kaymi Abrahanman, Isaacman, Jacobmanwan jurasqay jallp’a, paykunatan nirqani: Kaytan mirayniyki runakunaman qopusaq,+ nispa. Kay jallp’atan qhawachishayki qan kikiyki rikunaykipaq, ichaqa manan chaymanqa chimpankichu”,+ nispa.
5 Chay qhepamantaq Jehová Diospa kamachin Moisesqa Jehová Diospa nisqanman jina chay Moab jallp’api wañupurqan.+
6 Chaymantataq payqa, Bej-Peorpa chimpanpi kaq Moab wayq’opi Moisesta p’ampapurqan. Ichaqa manan pipas yachanchu maypipunichus p’ampasqa karqan chaytaqa.+
7 Moisesqa pachaj iskay chunka watanpi kashaspan wañupurqan.+ Ñawinqa allintaraqmi rikusharqan, kallpanpiraqmi kasharqanpas.
8 Israel runakunaqa kinsa chunka p’unchaymi Moab ch’inneqpi Moisesmanta waqarqanku.+ Chaymantataq waqananku p’unchaykunaqa tukupurqan.
9 Moisesmi Nunpa churin Josuepa umanman makinta churaykurqan, chaywanmi payqa yachaywan* junt’aykusqa kasharqan.+ Jinan Israel runakunaqa Josueta kasukurqanku; Moisesman Jehová Dios kamachisqanman jinapunin ruwarqanku.+
10 Moisés jina profetaqa manañan jayk’aqpas Israel llaqtapiqa karqanchu,+ paytaqa allintapunin Jehová Diosqa reqsirqan.+
11 Payqa Jehová Diospa kamachisqanman jinan Egiptopi faraón* contra, kamachinkuna contra, llaqtan contra ima tukuy señalkunata, milagrokunatapas ruwarqan.+
12 Chaymantapas Moisesqa llapa Israel runakunaq ñaupanpin rikuchirqan ancha jatun atiyniyoq kasqanta, manchay jatun ruwaykunatan paykunaq ñaupanpi ruwarqan.+
Uraypi willakuykuna
^ Chaypiqa Jatun lamar-qochamantan rimashan, chay lamar-qochataqa “mar Mediterráneo” nikullantaqmi.
^ Chaypiqa “Diospa atiyninpa qosqan yachaywan” nillanmantaqmi.
^ Egipto reykunatan “faraón” nispa niqku.
