Deuteronomio 29:1-29
29 Moab jallp’api kashaqtinkun Jehová Diosqa Moisesta kamachirqan Israel runakunawan wajmanta juj rimanakuyta ruwananpaq. Chayqa Horeb orqopi rimanakusqankumanta sapaqmi karqan.+
2 Chaymi Moisesqa llapa Israel runakunata juñuspa nirqan: “Qankuna rikushaqtiykichismi, ñawiykichispa qhawashasqanmi Jehová Diosqa faraontapas,* kamachin runakunatapas, llapa Egipto jallp’atapas imaymanata ruwarqan.+
3 Rikushaqtiykichismi imaymanawan sinchita castigarqan, ñaupaykichispin jatun señalkunatapas jatun milagrokunatapas ruwarqan.+
4 Chaywanpas kunankaman Jehová Diosqa manaraq qorqasunkichischu reparaq sonqota, rikuq ñawita, ni uyariq ninritapas.+
5 Diosmi nin: Tawa chunka watan ch’inneqninta pusamurqaykichis,+ manan p’achaykichispas ni usut’aykichispas thantakurqanchu.+
6 Manan t’antatapas mijurqankichischu, manan vinotapas tomarqankichischu, manataqmi chhayna ima ujanatapas ujarqankichischu, chhaynapi noqa Diosniykichis Jehová Dios kasqayta yachanaykichispaq, nispa.
7 Kay jallp’aman chayamushaqtinchismi Esbonpi Sehón reyqa+ Basanpi Og reypas+ noqanchiswan maqanakuq jamurqanku, ichaqa atiparqanchismi paykunata.+
8 Chaymantataq jallp’ankuta noqanchis jap’ikapurqanchis, chaytataq Rubén ayllu runakunaman, Gad ayllu runakunaman, kuskan Manasés ayllu runakunamanwan qopurqanchis.+
9 Chhaynaqa kasukuychis llapan kay rimanakuy simikunata, allinta chaykunata junt’aychis, chhaynapin llapa ima ruwasqaykichispas allillan kanqa.+
10 ”Kunanqa llapaykichismi kaypi Jehová Diospa ñaupanpi kashankichis: ayllukunapi umallikuna, umalliqkuna,* kamachikuq runakuna, llapa Israel runakuna,
11 wawakuna, warmikuna ima,+ kaypin kashanku qankuna ukhupi tiyaq waj llaqtayoq+ llant’a pallamuqkunapas, unu orqomuqkunapas, juj ruwaykunata ruwaqkunapas.
12 Kaypiqa kashankichis Jehová Diosniykichiswan rimanakunaykichispaqmi, juramentota ruwaspa Jehová Dioswan rimanakunaykichispaqmi.+
13 Chhaynapi ñaupa taytaykichiskuna Abrahanman,+ Isaacman,+ Jacobman+ jurasqanman jina paypa llaqtan kanaykichispaq,+ paytaq Diosniykichis+ kananpaq.
14 ”Kay juramentowan rimanakuytaqa manan qankunallawanchu ruwashani.
15 Aswanpas kunan p’unchay kaypi Jehová Diospa ñaupanpi kashaqkunawan, qhepaman jamuq mirayninchis runakunawan iman.
16 Qankunaqa allintan yachankichis imaynatachus Egiptopi kausamurqanchis chayta, imaynatachus askha nacionkunaq chaupinta pasamurqanchis chaytapas.+
17 Yachasqaykichis jina chay llaqtakunapiqa millakunapaq kaqkunan, millay idolokunan*+ kasqa: k’aspimanta, rumimanta, qolqemanta, qorimanta ruwasqa idolokuna.
18 Aman qankuna ukhupiqa kanqachu mayqen qharipas, warmipas, familiapas, ayllupas, Jehová Diosmanta karunchakuspa waj nacionkunaq diosninkunata serviqqa.+ Chaytaq qankuna ukhupi pipas rijurinman jaya qora* jina venenoyoq qora jina.+
19 ”Pipas kay juramentowan rimanakuy simikunata uyarishaspa jatunchakunman, jinaspa sonqonpi ninman: Allillanmi kasaq munasqayman jinaña kausasaq chaypas, nispa, chhaynapitaq paytapas llapa paywan kaqkunatapas mana allinman churanman chayqa,
20 manapunin Jehová Diosqa chay runataqa perdonanqachu.+ Aswanmi Jehová Diosqa paywan sinchita phiñakunqa, jinaspa kay qelqapi qelqasqa llapa ñakaykunata payman chayachimunqa.+ Jehová Diosqa chinkachinqan kay pachamanta chay runaq sutinta.
21 Chaymantapas Jehová Diosqa Israelpi llapa ayllukunamantan payta t’aqanqa, jinaspa kay kamachikuy qelqapi qelqasqa kaq llapa rimanakuy ñakaykunata payman chayachimunqa.
22 ”Qhepaman jamuq mirayniykichis runakuna, karu llaqtakunamanta jamuq runakuna iman rikunqaku Jehová Dios jallp’aykichisman imaymana castigokuna chayachimusqanta.
23 Payqa azufreta, kachita, ninata iman jallp’aman kachaykamunqa, manan chaypiqa ima tarpusqapas wiñanqachu, manan imapas ch’ijchimunqachu, manan ima plantapas wiñanqachu, Sodoma, Gomorra,+ Ajmá, Zeboyin+ llaqtakuna jinan kanqa; chay llaqtakunatan Jehová Diosqa sinchi phiñakuyninpi ch’usaqyachirqan.
24 Chaykunata rikuspan paykunapas waj nacionkunamanta runakunapas ninqaku: ¿Imaraykutaq Jehová Diosri khaynata kay jallp’ata ruwapurqan?+ ¿Imataq chhaynaniraqtari phiñachirqan?, nispa.
25 Runakunataq ninqaku: Ñaupa taytankuq Diosnin Jehová Dioswan rimanakusqankuta saqepusqankuraykun.+ Egiptomanta orqomushaspan Diosqa paykunawan chay rimanakuyta ruwasqa.+
26 Paykunataq Diospa kamachikusqanta mana kasuspa waj dioskunata serviyta qallarisqaku, mana reqsisqanku yanqa dioskunamanmi qonqorikusqaku.+
27 Chaywanmi Jehová Diosqa chay runakuna contra sinchita phiñakusqa, jinan chay jallp’aman chayachimusqa kamachikuy qelqapi qelqasqa kaq llapa ñakaykunata.+
28 Sinchi k’araq phiñakuyninpin Jehová Diosqa llaqtankumanta paykunata qarqospa juj llaqtaman apachipusqa,+ chaypin paykunaqa kunankama tiyamushanku,+ nispa.
29 ”Pakasqa kaqkunaqa Diosninchis Jehová Diospan,+ sut’inchasqa kaqkunataq noqanchispa mirayninchis runakunaq ima, chhaynapi kay kamachikuykunata llapanta junt’ananchispaq.+
Uraypi willakuykuna
^ Egipto reykunatan “faraón” nispa niqku.
^ Chaypiqa “kuraq runakuna” nillanmantaqmi.
^ Hebreo rimaypiqa uywa phusnumantapas rimashanman jinan kashan. Chaywanmi rikuchishan chay idolokunaqa sinchi millaypuni kasqanta.
^ Qhaway Explicasqa simikuna nisqapi “Jaya qora” nisqata.
