Deuteronomio 25:1-19
25 ”Iskay runakuna ima problemapipas kanqaku chayqa, juezkunamanmi rinqaku,+ paykunan chayta chaninchanqaku, jinaspa ninqaku mayqenchus juchayoq mayqentaqchus mana chayta.+
2 Juchayoq runachus waqtanapaq jina imatapas ruwarqan chayqa,+ juezmi kamachinqa uyanpamanta pampaman thallachinankupaq jinan paypa ñaupanpi waqtanqaku. Jayk’a kutitachus waqtanqaku chayqa kanqa ima juchatachus ruwarqan chayman jinan.
3 Ichaqa tawa chunka kutikamallan payqa waqtasqa kanqa.+ Tawa chunkamanta masta waqtanqaku chayqa, wayqeykichismi qankunaq ñaupaykichispi sarunchasqa kashanman.
4 ”Aman erata* sarushaq torotaqa senq’apankichischu.+
5 ”Wayqentin runakunachus kuska tiyankuman jujnintaqchus manaraq wawayoq kashaspa wañupunman chayqa, manan viuda warmiqa waj runawanqa casarakunqachu, aswanmi qosanpa familianmanta kaqllawan casarakunqa. Wañuqpa wayqenmi paywan casarakunqa, chhaynapin chay runaqa cuñado kasqanta* junt’anqa.+
6 Chay warmipi churiyasqan phiwi* churiqa wañuqpa wawanpas kanman jinan kanqa,*+ chhaynapin wañuqpa sutinqa mana chinkanqachu Israel llaqtamanta.+
7 ”Chay runa wañupuq wayqenpa warminwan mana casarakuyta munanqachu chayqa, viuda warmin llaqta punkupi umalliqkunaman* rinqa, jinaspa ninqa: Qosaypa wayqenqa manan munanchu noqawan casarakuyta, manan munanchu cuñado kasqanwan junt’ayta, manan munanchu qosaypa miraynin Israel llaqtapi kananta, nispa.
8 Jinan llaqtapi umalliqkunaqa chay runata wajachimunqaku. Chay runachus chaypipas ninqa: Manan paywan casarakuytaqa munanichu, nispa chayqa,
9 chay viudan qosanpa wayqenman qayllaykunqa, jinaspa umalliqkunaq ñaupanpi chay runaq usut’anta ch’utinqa,+ uyanpi thoqaykuspataq ninqa: Chhaynatan ruwana wayqenpaq mana churiyapuyta munaq runataqa, nispa.
10 Chaymantapachan chay runaq familianqa Usut’an Ch’utisqa Familia nisqa kapunqa.
11 ”Iskay runakuna maqanakushaqtinchus jujninpa warmin jamunman qosanta yanapaq, chaypitaqchus qosanta maqaq runaq qhari kayninta jap’inman chayqa,
12 mana khuyapayaspan chay warmiq makinta wit’unkichis.
13 ”Aman costalniykichispiqa kanqachu pesanapaq iskay clase rumikunaqa,+ aman kanqachu nishuta pesaq rumipas ni pisita pesaq rumipas.
14 Aman wasiykichispiqa kanqachu iskay clase tupunaqa,+ aman kanqachu askha jaykuq tupunapas ni pisi jaykuq tupunapas.
15 Pesanaykichispas tupunaykichispas chaninmi kanqa, junt’asqan kanqa, chhaynapin qankunaqa unayta kausankichis Jehová Diosniykichispa qonasuykichis jallp’api.+
16 Jehová Diosniykichisqa cheqnikunmi mana chaninta ruwaq runakunataqa.+
17 ”Yuyariychis Egiptomanta jamushaqtiykichis imatachus Amalec runakuna ruwarqasunkichis chayta.+
18 Sayk’usqa pisi kallpayasqa jamushaqtiykichismi paykunaqa qankuna contra jamurqanku, jinaspa qhepaykichista jamuq pisipasqa runakunaman phawaykurqanku. Manan Diostapas manchakurqankuchu.
19 Jehová Diosniykichis enemigoykichiskunamanta samachisuqtiykichismi, Jehová Diosniykichispa qonan jallp’a muyuriqpi+ enemigoykichiskunamanta samaspan chay Amalec runakunata kay pachamanta chinkachinkichis,+ chhaynapi ama pipas paykunata yuyarinanpaq. Aman jayk’aqpas qonqankichischu chay ruwanaykichistaqa.
Uraypi willakuykuna
^ Era patataqa “wayrachina pata” nillankutaqmi.
^ Qhaway Explicasqa simikuna nisqapi “Cuñadowan casarakuy” nisqata.
^ Hebreo rimaypiqa “wañuqpa sutintan apanqa” ninmi.
^ Chaypiqa “kuraq runakunaman” nillanmantaqmi.
