Deuteronomio 2:1-37
2 ”Chaymantataq noqanchisqa Jehová Diospa kamachisqanman jina Puka lamar-qochaman riq ñanninta ch’inneq ladoman kutirqanchis.+ Unayña Seír orqo-orqopi muyushaqtinchismi
2 Jehová Diosqa niwarqan:
3 Unayñan kay orqo-orqopi purishankichis, kunanqa wichay ladoman riychis.
4 Llapa runakunata niy, Diosmi nin: Wayqeykichiskunaq jallp’an linderontan* pasankichis, Esaupa miraynin runakunaq linderontan pasankichis,+ paykunaqa Seirpin tiyashanku.+ Paykunaqa sinchitan qankunata manchakusunkichis,+ chhaynaqa cuidakunkichismi.
5 Aman paykunawanqa maqanakunkichischu. Manan paykunaq jallp’ankutaqa qosaykichischu, manan chaki saruy sayayllatapas chay jallp’ataqa qosaykichischu. Chay Seír orqo-orqotaqa Esaumanmi qopuni.+
6 Imankutaña mijunkichis chaypas pagaspan mijunkichis, ununkutapas pagaspan ujankichis.+
7 Yachasqaykichis jina, noqa Jehová Diosniykichisqa tukuy imapin bendicionta churamushaykichis. Kay mana tukurikuq ch’inneqninta purisqaykichispipas makillan cuidashaykichis. Kay tawa chunka watantinmi noqa Jehová Diosniykichisqa qankunawan purishani, mana imata faltachispan pusashaykichis,+ nispa.
8 Jinan noqanchisqa wayqenchiskunaq jallp’anpa cantollanta pasamurqanchis, Seirpi tiyaq Esaupa miraynin runakunaq jallp’an cantollanta.+ Manan asuykurqanchischu Arabá ñanmanqa ni Elaj ñanmanpas ni Ezión-Guéber ñanmanpas.+
”Purisqanchisman jinataq Moab ch’inneqmanñataq muyuykamurqanchis.+
9 Chaypin Jehová Diosqa niwarqan: Aman Moab runakunawanqa maqanakunkichischu, manan paykunaq jallp’ankutaqa qosaykichischu. Chay Ar jallp’ataqa Lotpa churinkunamanmi qopuni,+ nispa.
10 (Chaypin tiyarqanku emin runakuna,+ chay runakunaqa askhan karqanku, kallpasapakunan karqanku, Anac runakuna jinataqmi jatunkaray runakuna karqankupas.
11 Refaín runakunapas+ Anac runakuna jinan rikusqa karqanku.+ Paykunatan Moab runakunaqa emin runakuna nispa niqku.
12 Seír orqo-orqopiqa horeo runakunan tiyarqanku,+ paykunatan Esaupa miraynin runakunaqa chinkachirqanku, jinaspa llapa jallp’ankuta jap’ikapurqanku.+ Israel runakunapas chhaynatan ruwanqaku Jehová Diospa qosqan jallp’awanqa, chaytan paykunaqa jap’ikapunqaku).
13 Diosqa niwallarqantaqmi: Riychis jinaspa Zerej wayq’ota chimpaychis, nispa. Jinan noqanchisqa Zerej wayq’ota chimpamurqanchis.+
14 Cadés-Barneamanta puririmusqanchismanta Zerej wayq’ota chimpamusqanchiskamaqa kinsa chunka pusaqniyoq watan karqan. Chay watakunapin ejercitopaq churasqa runakunaqa Jehová Diospa nisqanman jina wañupurqanku.+
15 Llapanku chinkapunankukaman Jehová Diospa makinqa paykuna contra kasharqan.+
16 ”Ejercitopaq churasqa llapa runakuna wañupuqtin jinan+
17 Jehová Diosqa niwallarqantaq:
18 Kunanmi Moab runakunaq jallp’anta, Ar jallp’anta pasankichis.
19 Anmón runakunaq jallp’an qayllaman chayaspaqa aman chay runakunataqa imanankichispaschu, aman paykunawanqa maqanakunkichischu. Manan paykunaq jallp’antaqa qosaykichischu, chay jallp’ataqa Lotpa miraynin runakunamanmi qopuni,+ nispa.
20 (Chay jallp’akunapas refaín runakunaq jallp’an nisqan kallarqantaq.+ Chaypin refaín runakunaqa tiyarqanku, paykunatan Anmón runakunaqa niqku zanzumin runakuna nispa.
21 Chay runakunaqa askhan karqanku, kallpasapakunan karqanku, Anac runakuna jinataqmi jatunkaray runakuna karqanku.+ Ichaqa Jehová Diosmi Anmón runakunaq ñaupanpi paykunataqa atiparqan, jinan Anmón runakunaqa paykunata qarqospa llaqtankuta jap’ikapurqanku.
22 Chhaynatan Esaupa miraynin runakunapaqpas ruwallarqantaq, horeo runakunatan Diosqa atiparqan,+ chhaynapin Esaupa miraynin runakunaqa chay jallp’ata jap’ikapurqanku. Chay Seír jallp’apin paykunaqa kunan p’unchaykama tiyashanku.+
23 Gaza qaylla llaqtakunapiqa avin runakunan tiyarqanku,+ chay runakunatan Caftormanta* lloqsimuq Caftor runakunaqa chinkachirqanku+ jinaspa chaypi tiyapurqanku).
24 ”Diosqa niwallarqantaqmi: Alistakuychis jinaspa Arnón wayq’ota chimpaychis.+ Qankunamanmi entregaykichis amorreo runakunaq reynin Esbón llaqta rey Sehonta.+ Paykunawan maqanakamuychis jinaspa qechumuychis jallp’ankuta.
25 Kunan p’unchaymantapachan kay pachapi tiyaq llapa runakunata mancharichisaq, qankunamanta uyarispan paykunaqa sinchi q’aqchasqa* kanqaku. Qankuna jawan paykunaqa mana imanakuyta atinqakuchu, manchakuymantan khatatatanqakuraq,*+ nispa.
26 ”Jinan noqaqa Quedemoj ch’inneqmantapacha+ Esbón llaqta rey Sehonman willaqkunata kacharqani, sumaq simillapin paytaqa nichimurqani:+
27 Jallp’aykita pasarichiway. Ñannintakamallan risaqku, manan pañamanpas ni lloq’emanpas jaykusaqkuchu.+
28 Mijunatapas unutapas qolqewanmi rantikusaykiku. Jallp’ayki pasaruyllatan munashayku.
29 Imaynan Seirpi tiyaq Esaupa miraynin runakunapas, Arpi tiyaq Moab runakunapas yanapawarqanku chhaynata qankunapas yanapariwayku. Jehová Diosniykuq qowananku jallp’aman jaykunaykupaq Jordán mayuta chimpanaykukamalla pasarichiwayku, nispa.
30 Esbón rey Sehonmi ichaqa mana munarqanchu pasananchista. Jehová Diosmi paypa sonqonta rumiyachirqan,+ chhaynapi makinchisman entregawananchispaq. Chay pasasqantan qankunaqa rikushankichis.+
31 ”Chaymantataq Jehová Diosqa niwarqan: Sehontapas jallp’ankunatapas ñan qopuykichisña, riychis chay jallp’ata jap’ikampuychis,+ nispa.
32 Rey Sehonqa llapa soldadokunantinmi Jazpi noqanchiswan maqanakuq lloqsimurqan.+
33 Diosninchis Jehová Diostaq makinchisman payta entregawarqanchis, jinan noqanchisqa paytapas churinkunatapas llapa soldadonkunatapas atiparqanchis.
34 Chay kutipin noqanchisqa llapa llaqtankunata thunirqanchis; llapa runakunatan warmikunantinta wawakunantinta wañuchirqanchis. Manan jujpas kausashaqqa qheparqanchu.+
35 Jaykusqanchis llaqtakunapi uywakunata cosaskunatawanmi ichaqa apakampurqanchis.
36 Noqanchisqa Arnón wayq’o patapi Aroer llaqtamanta+ Galaad wichaykaman llapanta jap’ikapurqanchis. Arnón wayq’opi llaqtapas noqanchispan kapurqan. Llapantan Jehová Diosqa noqanchisman entregapuwarqanchis.+
37 Ichaqa, manan Jehová Diospa prohibisqan ima llaqtamanpas asuykurqanchischu. Manan Anmón runakunaq jallp’anman,+ Jaboc wayq’o tukuymanpas+ ni orqo-orqopi llaqtakunamanpas asuykurqanchischu.
Uraypi willakuykuna
^ Linderotaqa “colinda, qorpa” nillankutaqmi.
^ Caftortaqa “Creta” nikullantaqmi.
^ Q’aqchaytaqa “mancharichiy” nillankutaqmi.
^ Khatatataytaqa “kharkatiy” nillankutaqmi.
