Jeremías 40:1-16
40 Soldadokunaq umallin Nebuzaradán+ Ramá llaqtamanta+ kacharipuqtinmi Jeremiasqa Jehová Diospa siminta chaskirqan. Cadenawan makin watasqatan chayman apasqa, Jerusalenmantawan Judamantawan Babiloniaman preso apasqakunawan kuskan kasharqan.
2 Jinan soldadokunaq umallinqa Jeremiasta juj ladoman pusaspa nirqan: “Jehová Diosniykin kay ñak’ariyta kayman chayachimunanpaq willarqan,
3 chay willasqanman jinan Jehová Diosqa chayachimun, qankunaqa Jehová Dios contran juchallikurqankichis, manan imachus nisqanta kasukurqankichischu, chaymi khaynapi tarikushankichis.+
4 Kunanmi chay cadenata makiykimanta orqopusayki. Babiloniaman noqawan riyta munanki chayqa, jaku, noqan qhawarisayki. Mana noqawan Babiloniaman riyta munankichu chayqa, ama riychu. ¡Qhawariy! Suyuntinmi ñaupaykipi kashan, libren kanki maychus munasqaykiman rinaykipaq”,+ nispa.
5 Manaraq ripushaqtinmi Nebuzaradanqa Jeremiasta nirqan: “Safanpa+ churin Aicampa+ churin Guedaliaspa+ kasqanman kutipuy, paytan Babilonia reyqa Judá llaqtakunata umallinanpaq churan, paykunawan tiyamuy, mana chayqa may munasqaykimanpas rillawaqmi”, nispa.
Chaymantan soldadokunaq umallinqa mijuykunata juj regalotawan qoykuspa kacharipurqan.
6 Jinan Jeremiasqa Mizpá llaqtapi+ Aicampa churin Guedaliaspa kasqanman ripurqan, chaypin paywan, suyupi puchuq runakunawan kuska tiyarqan.
7 Tiempowanmi campokunapi soldadokunaq umallinkunaqa yacharurqanku Babilonia reyqa Aicampa churin Guedaliasta suyupi kamachiqta churasqanta, Babiloniaman mana preso apasqa wajchakunata, qharikunata, warmikunata, wawakunatapas paypa makinpi saqesqanta+ ima.
8 Jinan Mizpá llaqtaman rirqanku Guedaliaswan tupaq.+ Netaniaspa churin Ismael,+ Careaq churinkuna Joanán+ Jonatanpiwan, Tanumejpa churin Seraya, Netofá llaqtayoq Efaipa churinkuna, Macaj llaqtayoq runaq churin Jezanías+ ima, paykunawan kuskan runankunapas rirqanku.
9 Jinan Safanpa churin Aicampa churin Guedaliasqa chay umallikunata runankunatawan juraspa nirqan: “Ama manchakuychischu Caldea runakuna serviytaqa. Babilonia reyta servinkichis chayqa, allillanmi kay jallp’api tiyankichis.+
10 Noqaqa Mizpapin qhepakusaq Caldea runakuna jamuqtin qankunamanta rimanaypaq. Qankunaqa vinota, poqosqa frutakunata,* aceiteta iman juñumunkichis, chaykunatan waqaychanakunapi waqaychankichis, jinaspan jap’ikusqaykichis llaqtakunapi tiyankichis”,+ nispa.
11 Moabpi, Anmonpi, Edompi wakin suyukunapi kaq judío runakunapas uyarirqankun Babilonia rey Judapi qhepaqkunata kamachinanpaq Safanpa churin Aicampa churin Guedaliasta churasqanta.
12 Chaymi judío runakunaqa maykunamanchus ch’eqechisqa karqanku chaykunamanta kutimpurqanku, Judá jallp’amanmi kutimpurqanku, Mizpá llaqtaman Guedaliaspa kasqanman. Chaypin askha vinota poqosqa frutakunata* ima juñurqanku.
13 Careaq churin Joanán campopi kaq soldadokunaq umallinkuna iman jamurqanku Mizpá llaqtaman Guedaliaspa kasqanman.
14 Paykunataq nirqanku: “¿Manachu reparanki Anmón runakunaq+ reynin Balís Netaniaspa churin Ismaelta qan wañuchiqta kachamusqanta?”,+ nispa. Aicampa churin Guedaliasmi ichaqa mana creerqanchu.
15 Jinan Careaq churin Joananqa Mizpá llaqtapi Guedaliasta pakallapi nirqan: “Netaniaspa churin Ismaeltan wañuchimusaq, manan pipas yachanqachu. ¿Imaraykun pay wañuchisunkiman? ¿Imaraykutaq qanman juñukamuq Judá runakunari ch’eqechisqa kankuman? ¿Imaraykun Judá runakunamanta puchuqkuna chinkapunkuman?”, nispa.
16 Aicampa churin Guedaliasmi+ ichaqa Careaq churin Joananta nirqan: “Ama chayta ruwaychu, Ismaelmanta nisqaykiqa manan cheqaqchu”, nispa.
Uraypi willakuykuna
^ Chaypiqa “q’oñi tiempopi poqosqa frutakunata” nillanmantaqmi, chayqa yaqapaschá karqan higospiwan datilespiwan.
^ Chaypiqa “q’oñi tiempopi poqosqa frutakunata” nillanmantaqmi, chayqa yaqapaschá karqan higospiwan datilespiwan.
