Isaías 59:1-21
59 Jehová Diospa makinqa manan juch’uychu mana salvananpaqqa,+ninrinqa manan roqt’uchu mana uyarinanpaqqa.+
2 Qankunaq juchaykichismi Diosniykichismantaqa t’aqasunkichis.+
Juchaykichisraykun payqa uyanta pakan,mana allinkuna ruwasqaykichisraykun mana uyarimunchu.+
3 Qankunaq makiykichispas yawarkamallañan kashan,+dedoykichisqa juchaq atipasqanmi kashan.
Simiykichismantaqa llullakuyllan lloqsimun,+qalluykichispas mana chanin rimayllatan paqarichin.
4 Manan pipas justicia kananpaqqa wajakunchu,+juiciomanpas llulla simikunatan apanku.
Paykunaqa ch’usaq kaqkunapin confianku,+ yanqa rimaykunatan rimanku.
Mana allin kaqtan wijsallikunku, mana allin ruwaytan onqokunku.+
5 Sinchi picakuq mach’aqwaypa runtuntan oqllanku,chay runtuta mijuqqa wañunqan;p’akikuq runtumantaqa mach’aqwaymi lloqsimunqa.
Chaymantapas paykunaqa araña llikakunatan tejenku.+
6 Chay llikaqa manan p’achakunapaqqa servinchu,manan p’istukunapaqpas valenchu.+
Paykunaqa mana allinllatan imatapas ruwanku,makinkupas mana chanillantan ruwan.+
7 Chakinkuqa mana allin ruwaymanmi ima jinaraq phawan,mana juchayoq runaq yawarnin jich’aqmi apurasqa phawan.+
Paykunaqa mana allin kaqkunallapin piensanku;thuniypi runa sufrichiypi imallan purinku.+
8 Manan thaj ñantaqa reqsinkupaschu,paykunaq ñanninkuqa q’ewi-q’ewin kashan,chay ñanpiqa manan chanin ruway kanchu,+pipas chay ñanman saruykuqqa manan thaj kayta tarinqachu.+
9 Chayraykun justiciaqa noqaykumanta karupi kashan,chanin kaypas manan chayamuwankuchu.
K’anchaytaña suyakushayku chaypas, laqhayaqllan* kashan,p’unchaytaña suyakushayku chaypas, tutallapin purishayku.+
10 Ñausakuna jinan perqata llamipakuspa purishayku,mana ñawiyoqkuna jinan llamipakuspa-llamipakuspa purishayku.+
Tutayashanmanñapas jinan chaupi p’unchaypi laq’a-laq’a purishayku,kallpasapa runakuna ukhupiqa wañusqa jinan kayku.
11 Llapallaykun oso jina qaparkachashayku,urpi jinan khuyayta qhorqoyashayku.
Justicia kanantan suyakushayku, manataq justiciaqa kanchu,librasqa kaytan munashayku, manataq pipas libraqniyku kanchu.
12 Contraykipi juchallikusqaykuqa nishu jatunpunin,+juchaykuqa sut’itan riman noqaykuq contraykupi.+
Allintan yachayku qan contra juchallikusqaykuta,allintan yachayku imakunapichus pantasqaykuta.+
13 Qan contran Diosniyku Jehová juchallikuyku, qan contran rimapakuyku,qanmanmi wasaykuta kutirimuyku, qantan qhepanchaykiku.
Simiykupipas runa ñak’arichiyllan, qan contra jatariyllan karqan,+llullakuytan wijsallikurqayku, yanqa rimaykunatan sonqoykupi paqarichirqayku.+
14 Justiciatan qhepaman kutichikun,+chanin kaytaq karullapi qhepakun,+cheqaq kaqtaq* plazapi wijch’ukun,allin kaqtaq mana jaykumuyta atinchu.
15 Cheqaq kaqqa* manan kanñachu,+mana allinkunamanta t’aqakuqkunatapas suwashankun.
Jehová Diosqa manan chanin kayta rikurqanchu,+manan imapas sonqonpaq jinaqa karqanchu.
16 Chanin runataqa manan jujtapas tarirqanchu,admirakurqanmi mana yanapakuqkunata tarispa,chaymi payqa makinwan paykunata salvarqan,chanin kayninwanmi chayta ruwarqan.
17 Justiciawanmi maqanakuna chalecowan* jina churakurqan,salvasqa kananwanmi cascowan jina umanman churakurqan,+vengakunan p’achawanmi p’achakurqan,+may sientesqanwanmi capawan jina p’istukurqan.
18 Imachus qonantan paykunaman qonqa;+contranpi kaqkunamanmi k’araq phiñakuyninta chayachimunqa,enemigonkunamanmi castigonta chayachimunqa.+
Islapi kaqkunamanpas imachus chayachinantan chayachinqa.
19 Inti jaykuy ladopi kaqkunan Diospa sutinta manchakunqaku,inti lloqsimuy ladopi kaqkunataq Jehová Diospa jatun kayninta manchakunqaku.
Payqa askha jamuq mayu jinan phawamunqa,Jehová Diospa atiyninpa tanqasqan unu jinan phawamunqa.
20 “Rantiqmi+ Sionman jamunqa,+Jacobpa miraynin runakunamanmi jamunqa,paykunamanta jucha saqeqmanmi jamunqa”+ ninmi Jehová Dios.
21 “Noqan paykunawan rimanakuni”+ ninmi Jehová Dios. “Qanman qosqay espirituyqa,* simiykiman churasqay rimaykunaqa, manan qanmantaqa qechusqachu kanqa. Manan qechusqachu kanqa wawaykikunamantapas ni paykunaq wawankunamantapas. Kunanmanta wiñay-wiñaypaqmi chhayna kanqa” ninmi Jehová Diosqa.
Uraypi willakuykuna
^ Laqhayaqtaqa “tutayaq” nillankutaqmi.
^ Chaypiqa “honrado kaytaq” nillanmantaqmi.
^ Chaypiqa “Honrado kayqa” nillanmantaqmi.
^ Maqanakuna chalecoqa soldadoq qhasqonta pakananpaqmi karqan.
